“Neftchi” — “Andijon” (3:0) uchrashuvidan keyin tashkil qilingan matbuot anjumanining ikkinchi qismida mezbonlar ustozi Islom Ismoilov fikrlari bilan o‘rtoqlashdi.
— Bugungi g‘alaba bilan bizni qo‘llab-quvvatlab turgan barchani tabriklayman. O‘yinga keladigan bo‘lsak, baribir derbilarda o‘yin qiyin o‘tadi. Derbi o‘z nomi bilan derbi. Derbilar bo‘layotgan paytda jamoalarni jadvaldagi o‘rniga qaralmaydi. Ikkala jamoa bor kuchini maydonda ko‘rsatishga harakat qiladi. Bu derbidan oldin bir statistikaga ko‘zim tushgandi, Samvel Babayan hali “Neftchi” bilan o‘yinlarda mag‘lub bo‘lmagan ekan. Har o‘yinda biz qandaydir noxush an’analarga chek qo‘yyapmiz. O‘tgan safar ham “Surxon” bilan bahsda jamoa 22 yildan beri safarda g‘alaba qozona olmayotgandi. Bunga barham berdik. O‘ylaymanki, derbidagi o‘yin hammaga manzur bo‘ldi, jamoa ajoyib o‘yin ko‘rsatdi.
— Jurnalistlarga ham ish qoldirmayapsiz. Sizga savolim yo‘q, taklifim bor. Futbolchilar 60 daqiqada ikkita gol urib qo‘yishyapti. Uchinchi yo to‘rtinchi golni 90-daqiqalarda urishsin...
— Yordamchilarim bilan gaplashgandim, nima qilsak to‘rtinchi golni ham urarkanmiz, deb muloqot qilgandik. Shuni ustida o‘ylayapmiz. Albatta, bu yoqimli holat.
— Hujumchilar ko‘p vaziyatlarga ega bo‘ldi. Ularning o‘yinini qanday baholaysiz?
— Bizda ikkita yaxshi saviyadagi hujumchilar bor. Ikkalasi ham yaxshi harakat qilishdi. Aytganingizdek, ko‘plab imkoniyatlarga ega bo‘lishdi. Hujumchi har doim gollar urishi kerak degani emas. Bizning o‘yin uslubimizda bu o‘yinni qurishdagi asosiy ustunlardan biri. Ularning o‘yiniga yaxshi baho beraman. Ikkalasi ham pressingda yaxshi qatnashishdi. Uchrashuvdan avval jamoaga maksimal darajada pressingda qatnashish talabini qo‘ygandik.
— Muxlislar haqida fikringiz.
— Muxlislikka gap yo‘q. Farg‘onada har doim bu eng yuqori darajada bo‘lgan. Stadionda qo‘llab-quvvatlagan hammaga chuqur minnatdorchiligimni bildiraman.
— Ketma-ket uchinchi o‘yinda ham 3:0 hisobi qayd etildi. Bu tasodifmi yoki qandaydir reja tuzilganmidi?
— Bu tasodif bo‘lsa kerak. Hech qachon bunga reja qilmaymiz. Ba’zida futbolchilar natijadan kelib chiqib to‘p nazoratiga ko‘proq e’tibor qaratishni boshlashadi. Sababi 60-daqiqagacha jamoa katta kuch yo‘qotdi. Katta hajmdagi ishni bajarishdi. Shundan kelib chiqib, jamoa to‘p nazoratiga o‘tdi. Doim ko‘proq gollar urishga harakat qilamiz. O‘yin uslubimiz ham hujumkor futbol. Birinchi bo‘limdagi 1:0 dan keyin ham futbolchilarga hech qanday himoyani o‘ylamasdan faqat hujum qilamiz, degan ko‘rsatmalarni berdik. Bu bizning g‘oyamiz va talabimiz. Futbolchilarimizning mahorati bunga javob beradi. Eyforiyaga berilmaymiz, shunaqa ishlashda va 3 tadan ko‘proq gol urishga ham harakat qilamiz.
— “Surxon” va “Mash’al” bilan bahslardan farqli birinchi bo‘limni ko‘rdik. Oldingi uchrashuvlarda qanotlardan uzatmalar ko‘p bo‘lgandi. Bugun esa bu holat uncha kuzatilmadi. Raqib xavfni ko‘proq Perisadan kutgandi. Bu tanlangan uslubmi?
— Jamoani qabul qilganimda g‘oya aniq edi. Ammo bu g‘oyaga turli yo‘llar bilan borish variantlarini qidiramiz. “Andijon” tarkibida bo‘ydor himoyachilari ko‘p. Shuni hisobga olib o‘yinini tahlil qilganimizda himoya va yarim himoya chizig‘i orasida katta bo‘shliqlar bor edi. “So‘g‘diyona” ham, “Qizilqum” ham yarim himoya va himoya orasida ko‘p to‘p qabul qilishgan. Shuning uchun futbolchilarimizga aynan shu hududlarda ko‘proq to‘pni qabul qilish bo‘yicha ko‘rsatma berdik. O‘ylaymanki, birinchi bo‘limda ham aynan shu hududda ko‘p to‘p qabul qildik. Faqat qaysidir vaziyatlarda ijro yetishmadi va ayrim holatlarda raqib himoyachilari yaxshi harakat qilishdi.
— 15 mart kuni bo‘ladigan Superkubokda Ikrom Aliboyev maydonga tushadimi va umuman muhim o‘yin oldidan fikringiz qanday?
— Aliboyev jarohatini tiklash jarayonida. Barchasi ortda qoldi. Bizda yana 5 kun vaqt bor. Kim tayyor bo‘lsa, o‘shalar “Paxtakor”ga qarshi maydonga tushadi. Maksimal darajada harakat qilamiz. Ularga qarshi ideal o‘yinimizni ko‘rsatib, bu yil hisobidan jamoa uchun birinchi sovrinni qo‘lga kiritamiz.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
