«Barselona» prezidenti Joan Laporta Xavi Ernandesni iste’foga chiqarish va uning o‘rniga Xans-Diter Flikni tayinlash haqidagi qaror o‘zini to‘liq oqladi, deb hisoblaydi.
Ispaniyalik mutaxassis 2024 yilning may oyida «ko‘k-anorranglilar» boshqaruvidan chetlatilgan edi. Uning o‘rniga kelgan Flik dastlabki mavsumidayoq mamlakat ichki arenasidagi barcha uchta sovrinni qo‘lga kiritdi, shuningdek, jamoani Chempionlar ligasi yarim finaliga olib chiqdi.
«Xayriyatki, Xavini qo‘yib yuborish haqidagi qaror to‘g‘ri bo‘lib chiqdi va klub manfaatlariga to‘liq mos keldi. Flik deyarli o‘sha tarkib bilan ishlab, bizni yana g‘alabalar yo‘liga qaytardi, Xavi davrida esa jamoa ketma-ket muvaffaqiyatsizliklarni boshdan kechirayotgan edi», — deya Laportaning so‘zlarini keltiradi BarcaTimes.
Xans-Diter Flikning «Barselona» bilan amaldagi shartnomasi 2027 yilning yoziga qadar mo‘ljallangan.