«Bavariya» kuzatuv kengashi a’zosi Karl-Xayns Rummenigge Chempionlar ligasi 1/2 finali doirasidagi «PSJ»ga qarshi o‘yinlardan nimalar kutayotgani bilan o‘rtoqlashdi.
— «Bavariya» Germaniya Kubogi finaliga chiqib, trebl sari navbatdagi qadamni tashladi. YECHL yarim finalida «Pari Sen-Jermen»ga qarshi bahslardan nima kutyapsiz?
— «PSJ»ga qarshi ikki o‘yin bizdan bor kuchimizni berishni talab qiladi. Hamma a’lo sport formasida bo‘lishi kerak. Jamoa turnirning umumiy bosqichida Parijda ko‘rsatgan o‘yinini (2:1 hisobidagi g‘alaba) takrorlashi lozim. Birinchi bo‘limda fantastik o‘ynagandik. Ikkinchi bo‘limda esa, Luis Diasning qizil kartochkasidan so‘ng, Zepp Xerbergerning «Birimiz hammamiz uchun, hammamiz birimiz uchun» degan maqoliga amal qilib himoyalandik. O‘sha o‘yin yarim finallar uchun etalon bo‘la oladi.
— «Bavariya» va «PSJ» o‘rtasidagi bahsni amaldagi final desa bo‘ladimi?
— Albatta, bu ajoyib final bo‘lishi mumkin edi, ammo hozircha bu yarim final. «Arsenal» uzoq vaqt maqtaldi, lekin mavsum oxiriga kelib ular APLda tempni pasaytirib, chempionlikni «Manchester Siti»ga boy beradigandek ko‘rinmoqda. Shunga qaramay, yarim finalning narigi ikki jamoasini past baholamagan bo‘lardim.
— «PSJ»ni nima bunchalik xavfli qiladi?
— Luis Enrike kelganidan beri ularda juda oqilona yig‘ilgan yuqori darajadagi jamoa shakllandi. Parij muhim bir narsani isbotladi: hamma narsani sotib olib bo‘lmaydi, jamoani sabr bilan qurish kerak. 2020 yilgi finalda biz ularni yutganimizda tarkibda Neymar va Mbappe bor edi, keyin Messi qo‘shildi. Nomlar jihatdan bu dahshatli jamoa edi, lekin ular hozirgidek yaxlit bir butun bo‘lib ishlamasdi.
— «PSJ» prezidenti Nosir Al-Xelayfiyning muxlislar tomonidan issiq kutib olinishi haqida nima deysiz?
— Nosir uchun xursandman. Muxlislar undan minnatdor bo‘lishlari kerak. Qatar investisiyalari kelguniga qadar «PSJ» kim edi? Esimda, 2020 yilgi finaldagi mag‘lubiyatdan so‘ng Nosirning kayfiyati juda yomon edi. O‘shanda unga: «Sabrli bo‘lishing kerak, futbolda hech narsa osonlikcha berilmaydi. Faqat pul emas, kiyinish xonasida g‘oliblik ruhi bo‘lishi kerak», degandim. Ular yana yarim finalda ekanligi tasodif emas.
— Ammo klub tarkib uchun juda katta mablag‘ sarfladi-ku?
— Neymar, Mbappe va Messini sotib olib, «PSJ» Yevropaning yirik klublariga transfer va maoshlar borasida katta bosim o‘tkazdi. Hozir bu uch futbolchi ham Parijda emas, natijada klubning moliyaviy holati ancha yaxshilandi. Enrike esa jamoaga mutlaqo boshqacha ruh olib kirdi. Ilgari odamlar «PSJ»ga pul uchun borishardi, hozir esa bu Yevropaning eng yaxshi uch klubidan biri bo‘lgani uchun borishmoqda. Buni tan olish kerak, dedi Rummenigge.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
