Bugun, 21 avgust kuni Angliya Premyer-ligasining 2026/27 yilgi mavsumiga start beriladi. Chempionatning ochilish uchrashuvida amaldagi chempion «Arsenal» elitaga 25 yillik tanaffusdan so‘ng qaytgan «Koventri Siti»ni qabul qiladi. Bahs Londondagi «Emireyts» stadionida o‘tkaziladi.
Chempion uchun yangi vazifa
Mikel Arteta jamoasi yangi mavsumni endi ta’qibchi emas, chempion sifatida boshlaydi. «Arsenal» o‘tgan mavsumda 85 ochko to‘plab, ikkinchi o‘rindagi «Manchester Siti»ni 7 ochkoga ortda qoldirgan holda Premyer-liga g‘olibi bo‘ldi.
Londonliklar yozda ham tarkibni kuchaytirishda davom etdi. Eng katta transferlardan biri «Nyukasl»dan 75 mln funtga Brunu Gimaraesning xarid qilinishi bo‘ldi. Shuningdek, Kristos Solis, Pyero Inkapye va Illan Melye ham jamoaga qo‘shildi.
«Arsenal» mavsumning ilk rasmiy sovrinini ham qo‘lga kiritishga ulgurdi — Arteta shogirdlari Angliya Superkubogi bahsida «Manchester Siti»dan ustun keldi. Biroq o‘sha uchrashuvda jarohat olgan Gimaraesning «Koventri»ga qarshi maydonga tushishi so‘roq ostida.
Saka va Raysning holati
Arteta uchun asosiy masalalardan biri yetakchi futbolchilarning jismoniy holati bo‘ladi. Bukayo Saka va Deklan Rays Superkubok bahsida zaxiradan maydonga tushgan edi. Saka boshlang‘ich tarkibga qaytishi kutilmoqda, Raysga esa to‘liq tayyorgarlikka qaytish uchun qo‘shimcha vaqt berilishi mumkin.
Himoya chizig‘ida esa muammolar bor. Vilyam Saliba Jahon chempionatida olgan bel jarohati sabab safdan chiqqan, Yurriyen Timber ham tiklanish jarayonini davom ettirmoqda.
«Koventri» 25 yildan so‘ng APLda
Frenk Lempard boshchiligidagi «Koventri» uchun esa bu uchrashuvning ahamiyati butunlay boshqacha. Jamoa 2001 yildan beri ilk marta Angliyaning yuqori divizionida maydonga tushadi. «Koventri» Chempionshipni yutib, Premyer-ligaga to‘g‘ridan-to‘g‘ri yo‘llanma oldi.
Qur’a yangi jamoaga darhol eng qiyin sinovlardan birini taqdim qildi — safarda amaldagi chempionga qarshi bahs.
Shunga qaramay, Lempard jamoasi mavsumoldi tayyorgarligini yaxshi o‘tkazdi. Jumladan, so‘nggi nazorat uchrashuvida «Monako» 2:0 hisobida mag‘lub etildi.
Statistika «Arsenal» tomonida
Jamoalar turli musobaqalar doirasida 76 marta to‘qnash kelgan. «Arsenal» 43 ta uchrashuvda g‘alaba qozongan, «Koventri» 14 marta ustun kelgan, yana 19 bahs durang bilan yakunlangan.
Londonliklarning yangi chiqqan jamoalarga qarshi uydagi statistikasi yanada ta’sirli: «Arsenal» Premyer-ligaga ko‘tarilgan klublarga qarshi oxirgi 45 ta uy uchrashuvida mag‘lub bo‘lmagan — 40 g‘alaba va 5 durang. «Koventri» esa amaldagi Angliya chempioni maydonidagi oxirgi 7 ta liga o‘yinining barchasida mag‘lubiyatga uchragan.
Ikki klubning so‘nggi uchrashuvi 2014 yil yanvarda Angliya kubogida bo‘lib o‘tgan va «Arsenal» 4:0 hisobida g‘alaba qozongan.
Arteta — Lempard
Bahsning yana bir qiziq jihati murabbiylar qarama-qarshiligi bo‘ladi. Bir tomonda «Arsenal»ni chempionlikka olib chiqqan Mikel Arteta, ikkinchi tomonda esa «Koventri»ni Premyer-ligaga qaytargan Frenk Lempard.
Kuchlar nisbati va uy maydoni omili bo‘yicha «Arsenal» uchrashuvning yaqqol favoriti. Ammo mavsumning ilk o‘yinlari ko‘pincha kutilmagan natijalarga boy bo‘ladi. «Koventri» uchun esa bosim deyarli yo‘q — jamoa 25 yillik tanaffusdan keyingi ilk APL bahsida amaldagi chempionga qarshi o‘z imkoniyatini sinab ko‘radi.
Uchrashuv: «Arsenal» — «Koventri Siti»
Musobaqa: Angliya Premyer-ligasi, 1-tur
Sana: 21 avgust, 2026 yil, 23:59 (TSHV)
Stadion: «Emireyts», London
Bosh hakam: Tom Bramall
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
