«Brentford» bosh murabbiyi Kit Endryus Angliya chempionatining 1-turida «Tottenxem» ustidan qozonilgan 3:0 hisobidagi yirik g‘alabadan so‘ng fikrlarini bildirdi.
«Futbolda yetarlicha uzoq vaqtdan buyon ishlab kelyapman va bir narsani yaxshi bilaman: jamoangning holatini qanchalik yuqori baholama, raqibdan nimani kutishni hech qachon oldindan bilmaysan.
Bunday uchrashuvlarni noutbuk orqali tomosha qilish va yig‘ilishlarda muhokama etish bilan ulardagi shiddatni to‘liq his qilib bo‘lmaydi. Ammo futbolchilarimiz ko‘rsatgan o‘yindan juda mamnunman.
Birinchi hushtakdanoq maydonda faqat biz hukmronlik qildik. Yuqori shiddatda harakatlandik, sur’atni pasaytirmadik va qarshi turish qiyin bo‘lgan futbolni namoyish etdik. Bizda individual mahorat, xarakter va eng muhimi, ajoyib jamoaviy birdamlik bor edi. Bu menga juda yoqdi», — dedi Endryus Sky Sports telekanaliga.
Murabbiy jamoa yangi a’zosi Ibragim Sangarening harakatlarini ham yuqori baholadi.
«U ajoyib futbolchi, bunga hech qanday shubha yo‘q. Biz aynan uni shu yozda safimizga qo‘shib olishni istagandik. Amalga oshirilgan ish uchun klub katta maqtovga loyiq.
U boshqa variantni tanlab, biroz ko‘proq pul ishlashi mumkin edi. Ammo Sangare bu yer uning uchun munosib joy ekanini tushundi.
Haqiqatan ham kuchli futbolchini tarkibga qo‘shsang, bu butun jamoaning saviyasini oshiradi. U hujumda ham, himoyada ham bizga yordam bermoqda.
Mavsum juda uzoq, shuning uchun tarkibda yetarlicha tanlov bo‘lishi kerak. Hozir bizda bunday imkoniyat bor. Jamoaning ayni paytdagi holati va tanlagan yo‘nalishi menga yoqmoqda.
Albatta, oldinda qiyin davrlar ham bo‘ladi — futbolning tabiati shunday. Ammo hozir bu mavsumdan zavq olishimiz kerak», — deya qo‘shimcha qildi Endryus.
«Brentford» 25 avgust kuni Angliya Liga kubogi doirasida «Birmingem»ni qabul qiladi.