Kuni kecha Ispaniya terma jamoasining yaqinlashib kelayotgan yig‘in uchun tarkibi e’lon qilindi. Ro‘yxatdan «Barselona» yarim himoyachisi Gavi joy olmadi.
El Nacional nashri ma’lumotiga ko‘ra, «qizil furiya» bosh murabbiyi Luis de la Fuente Gavini chaqirmaslikka Fermin Lopes sabab bo‘lgan.
Manba qayd etishicha, de la Fuente jamoa tuzilishi va futbolchilarning o‘yin uslubidan kelib chiqib, bir xil vazifalarni bajaradigan Gavi va Lopesni bir vaqtda chaqirishni maqsadga muvofiq deb hisoblamagan. Ayni paytda ulardan biri ancha yaxshi sport formasida.
Fermin Lopes 2026/2027 yilgi mavsumni juda yaxshi boshladi, Gavi esa hozircha «Barselona»da yetarli darajada o‘yin amaliyotiga ega emas.
«Murabbiy futbolchilardan biri muntazam o‘yin amaliyotiga ega bo‘lmasa, bir xil profildagi o‘yinchilarni tarkibga qo‘shishni istamaydi», — deyiladi xabarda.
Shu bilan birga, de la Fuente Gavining futbolchilik sifatlarini yuqori baholashi ta’kidlangan. Biroq yarim himoyachi terma jamoaga qaytish uchun «Barselona» safida ko‘proq maydonga tushishi kerak.
Bu qaror boshqa futbolchilar uchun ham o‘ziga xos signal sifatida baholanmoqda: murabbiy o‘yinchilarni avvalgi xizmatlari uchun emas, balki ayni paytdagi holati va formasiga qarab chaqirmoqda.
Gavi 2026 yilgi Jahon chempionatida Ispaniya terma jamoasi tarkibida ishtirok etgan, ammo musobaqada atigi ikki marta maydonga tushgan — guruh bosqichida Kabo-Verdega qarshi va 1/16 finalda Avstriyaga qarshi uchrashuvlarda.