Оз қолди, яна ҳаяжон, яна қувонч, яна аламли кўз ёшлар, энг муҳими анчадан бери ҳис қилмаётган аллақандайдир туйғу оғушида қолиш арафасидамиз.
Азизлар, ЖЧ саралаш босқичи навбатдаги тур ўйинлари сентябрда бошланиб октябрда ўзининг энг қизғин палласига кириб боради. Ушбу ўйинлар бошланиши билан ҳамма эски гина ва аразлар унутилади. Яна ҳаммаси бошидан бошланади, янги умидлар дунёга келади, стадионга бўлмасак ҳам, уйда туриб қўлни кўксимизга қўйиб ТВ орқали мадҳиямизни футболчилар билан биргаликда ижро этамиз, худди майдонга тушаётгандек этимиз жимирлаб, юрагимиз хапқиради, ҳатто шарҳловчиларга ҳам холислик керак бўлмайдиган ўйинлар остонасидамиз. Ўйин бошлангач ҳамма нарсалар унутилади. Аёлларимиз ТВга яқинлашолмай, сериалларини кўролмаганидан хуноб бўлиб, футбол чиқаргани уйига ўт қалаётган бир пайтда сиз дунёни унутиб терма жамоамизга мухлислик қилаётган бўласиз. Шундай қудратга эга бу миллий деганлари! “Барса”ю “Реал”, Мессию Роналду деб қирпичоқ бўлгувчиларни бирлаштириб қўйиши мумкин бу миллий деганлари!
Ҳафсаласи пир бўлиб қўли клавиатура кўрмай, компьютери чанг босиб ётган журналистларни ҳам монитор олдига яқинлаштириб қўйиш кучига эга терма деганлари! Собиқ мухлисларни яна стадионга қайтариш каби сеҳри бор бу жамоани! Биз шунинг учун севамиз бу зорманда ўйинни! Кечагина лапашанг деб юрганларимиз бизнинг Одилжону Санжарбек, Сервержону Виталийжонларга айланади. Ўтмишдаги хатолар кечирилиб, биз уларни қайта кашф этамиз. Биз шахсларга эмас, терма жамоамизга мухлислик қиламиз. Муаммо, камчиликлардан хабардор бўлсакда ҳар гал умидвор бўлаверамиз, балки ЖЧга чиқолмасмиз, лекин унга қадар бўлган йўлни босиб ўтиб, мундиал остонасигача мундиал нафасини, унинг ҳиссиётларни бергувчи термамиз чиройли, мардонавор ўйнаб, охиригача курашиб, юрагини бериб ўйнаб турса бас, қолгани Яратганинг қўлида... Ажаб эмас, ажаб эмас!
Сизга айтар сўзим ўтмишда майдондаги хатоларни кечиринг, лойиқми, нолойиқми терма либосида майдонга тушган қоракўзларни, миллий терма жамоамизни қўллаб-қувватланг, қолганига қўл силтанг, ўша чиптафурушлару чала профессорларга, дангаса, тепса-тебранмас ПФЛгаю, олди-қочди гаплардан уёғига ўтмайдиган раҳбарларигача, ҳамма-ҳаммасига қўл силтанг. Нима қилган ёки қилмаган бўлса уларнинг виждонига ҳавола, агар у бор бўлса! Сиз эса Ватан жамоасига мухлислик қилинг, мухлис учун футболнинг асл лаззати ана шу ҳисда. Уни биздан ҳеч ким тортиб ололмайди. Ишонаверинг, ҳаммаси яхши бўлади, балки бугун, балки эртага, қачондир бизнинг кўчада ҳам байрам бўлиши керак-ку!
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Stadion.uz мухлислари
