Bir necha kundan buyon Avstraliyaning Melburn shahrida “Australian open” (“Ulkan toj” turkumiga kiruvchi) musobaqa bo‘lib o‘tmoqda.
Ushbu musobaqaning yakkalik bahslarida yurtdoshimiz Denis Istomin ishtirok etishi avvaldan ma’lum bo‘lib ulgurgan edi.
Musobaqaning 1-bosqichi Denis Istomin uchun omadli keldi. O‘zidan saviyasi va reytingi jihatidan pastroq bo‘lgan xorvatiyalik Ivan Dodig degan tennischini Denis Istomin qiyinchiliksiz mag‘lub eta oldi.
Ammo 2-bosqich Denis Istomin uchun haqiqiy fojea bo‘lishi taxmin qilindi. Sababi ana shu pallada tennis bo‘yicha dunyo reytingida 117-o‘rinda borayotgan vatandoshimiz Denis Istomin, jahonning 2-raketkasi Novak Jokovichga qarshi bellashar edi. Bu bahs g‘olibi esa 3-bosqichga o‘tish imkoniyatini qo‘lga kiritardi.
Xo‘sh, Novak Jokovich kim edi? Agar biroz o‘tmishga qaytadigan bo‘lsak. Eslayman, bundan qariyb 7-8 yillar ilgari tennis olamidagi ikkita yulduzni tanir edim. Bular: ispaniyalik Rafael Nadal va shveysariyalik Rojer Federer. Har ikkalasi ketma-ket musobaqalarning final va yarim finallarida to‘qnash kelishar va ko‘pincha Rafael Nadalning qo‘li baland kelar edi. Ana shu vaqtda tennis olamining qiroli, dunyo reytingida 1-o‘rinda turgan bu Nadal edi. Ammo serbiyalik Novak Jokovich osmondan tushgandek paydo bo‘ldi va u ketma-ket musobaqalarda g‘alaba qozonib, titullar qo‘lga kirita boshladi. Eng nomdor Rafael Nadal ham uning uchun hech kim bo‘lmay qoldi. Nadal asli ispaniyalik emasmi, tuproqli kortlarda u mana-man deganini ham dodini berib qo‘yar edi, ammo Jokovich tuproqli kortlarda ham Nadalni qaqshatqich mag‘lubiyatlarga uchratdi. Maxsus qoplamali va hattoki maysali kortlarda ham ana shu vaqtlarda Novak Jokovich Rafael Nadaldan ustun keldi. AQSH, Avstraliya va Buyuk Britaniyadagi turnirlar finalida Nadalga, hattoki chapaqayligi ham yordam bermadi. Novak Jokovich Nadalni ruhan sindirdi, 2011 yilda Novak Jokovich Nadaldan dunyo tennis tasnifidagi 1-o‘rinni tortib oldi.
Shveysariyalik Rojer Federer bir amallab boshlanishiga Jokovichni mag‘lub etib turgan bo‘lsada, keyinchalik u ham Jokovichning soyasida qolib ketdi.
Faqatgina 2016 yilga kelib britaniyalik Endi Marreyga imkoniyatni boy bergan Jokovich, 2017 yil boshida dunyoning 2-raketgasiga aylanib qolgandi.
Novak Jokovich bugunga kelib tennis ortidan 100 000 000 dollordan ko‘proq pulni ishlab olishning ham uddasidan chiqqan.
Bevosita "Avstraliya open"ga qaytadigan bo‘lsak, Novak Jokovich bu turnirda 2008, 2011, 2012, 2013, 2015, 2016 – yillarda zafar quchgan va bu yilgi musobaqada ham so‘zsiz fovorit edi.
Denis Istomin esa Novak Jokovich bilan solishtirganda hech kim emas edi. O‘zbekistonlik vatandoshlarimizni hisobga olmaganda hech kim Denis Istomindan bu bahsda g‘alabani kutmagan edi. Ammo hammasi boshqacha bo‘ldi. Dunyoning 2-raketkasi Novak Jokovichni O‘zbekiston sharafini himoya qilayotgan Denis Istomin sal kam 5 soat davom etgan o‘ta murakkab bahsda mag‘lub eta oldi. Bu haqiqiy sensasiya edi.
Ana shu bahsning so‘ngida Melburn shahridagi arenaga e’tibor qaratdim. Ana shu maskan odamlar bilan to‘lib toshgan, jurnalistlar, kameralar va kazo-kazolarning oxiri yo‘q edi. Shundayin muhitda Istomin kimsan Novak Jokovichni mag‘lub eta oldi. Tasanno!!!
Uchrashuv o‘z poyoniga yetgach Jokovich kortni tark etdi, Denis Istominning oldiga esa jurnalist kelib intervyu oldi. Denis o‘zi mag‘lub etgan Jokovichdan uzr so‘radi va ingliz tilida ana shu yerda intervyu berdi. Dastxatlar ulashdi. Bu har tomonlama Denis Istominning shu vaqtgacha bo‘lgan faoliyatidagi eng shov-shuvli g‘alabasi edi.
Denis Istomin nafaqat Jokovichni mag‘lub etgan, balkim turnirning 3-bosqichiga ham chiqqan edi. Bu bosqichda unga dunyoning 30-raketkasi, ispaniyalik Pablo Korena Busta raqiblik qildi. Uch yarim soatlik bellashuv so‘ngida Denis Istomin bu raqibini ham yenga oldi. G‘alaba qo‘lga kiritilgach, Istomin qo‘lini ko‘ksiga urdi, keyin xuddi Ronaldu kabi hayqirib, Messi kabi ikki qo‘lini yuqori ko‘targancha g‘olibona yurish qildi.
Endu u Melburndagi turnirning 4-bosqichida edi. Bu haqiqiy daxshat edi. Hali Denis Istomin bu turnirda hech qachon 4-bosqichgacha yetib kela olmagan va bu uning shaxsiy rekordi edi.
4-bosqich g‘olibini chorak final bosqichi kutib turar edi. Bahs 2017-yilning 23-yanvar kuni Toshkent vaqti bilan soat 11:00 da boshlandi. Men ham so‘zsiz bu o‘yinni Televizor qarshisida o‘tirgancha Denis Istominga muxlislik qildim. Uchrashuvni Sport TV jonli efirda namoyish etdi.
Darvoqe, uning bu galgi raqibi bolgariyalik Grigor Dimitrov edi. U shu bugungi holat bo‘yicha dunyoning 15-tennischisi edi. Shu bugunga kelib men Denis Istomin g‘olib bo‘lishiga chin dildan ishondim va Xudodan so‘radim. Istomindan bugun umidlarim tog‘lar qadar katta edi.
Denis Istomin bahsning birinchi setda 6-2 hisobida juda osonlik bilan g‘olib bo‘ldi. Ammo bir holat mening tabimni xira qildi. Ya’ni Melburn shahrida bir necha sektorlarda bolgariyalik muxlislar tinimsiz Grigor Dimitrovni qo‘llab-quvvatlardi. Hamma uning ism-familiyasini aytgancha, uni olqishlashar edi. Albatta, bu Denis Istomin uchun juda katta ruhiy bosim edi. Afsuski, ana shu maskanda o‘zbekistonlik muxlislar deyarli ko‘rinishmadi. Deyarli hech kim Denis Istomin deb dod-faryod solmadi. Ora-orada “Davay, Denis”, “Istomin” degan hayqiriqlar bir-bir eshtilib qoldi, xolos. Bir kadrda esa ikkita odam O‘zbekiston bayrog‘ini tutib turgani ko‘zga tashlandi. Biri esa bayrog‘imizni hilpiratgancha suratga tushayotgani ko‘rindi.
1-setdagi g‘alabadan so‘ng, 2-set ancha murakkab kechdi. Ikki tennischi bir-birini hisoblar bo‘yicha quvdi. Yakunda esa 6/6. Ana shu pallada Denis Istomin aslida 6/4 yoki 6/5 hisobida raqibini mag‘lub etishning uddasidan chiqmog‘i zarur edi, ammo u nimagadur o‘zini ancha bo‘sh va erkin qo‘yib yubordi. Bahsning 2-setida bolgariyalik tennischining qo‘li baland keldi.
Hammasi ana shu soniyalardan boshlandi. Denis Istomin shu vaqt kortga shifokorlarni chaqirtirdi. Shifokorlar kortning o‘zida turli xil muolajalar qilishdi. Sharhlovchining aytishicha uzoq vaqtdan buyon Denis Istominni kuragi va tizzasidagi jarohatlar bezovta qilgan va aftidan hozir ana shu tizzasidagi jarohat yana qaytalagan edi. Taxminan 7 daqiqa shifokorlar uning tizzasini davolashga urinishdi.
Keyin 3-setni boshlash uchun Istomin kortga qaytdi. Ammo bu endi boyagi Denis Istomin emas edi. Yo‘q u asta-asta qadam tashlayotgan edi. Buni tushunib qolgan bolgariyalik Dimitrov kortning u chetidan bu chetiga yugurtiraverdi. Denis Istomin aksar holatda turgan joyida raqib hujumini qaytarishga urindi. Har bir, bir yarim daqiqalik tanaffusda u shifokorlarga endi belini ko‘rsatayotgan edi. U tizzasi va taxminan bo‘ksasidagi jarohati bilan o‘ynadi. Aksariyat to‘p uzatishlariga yugurar ekan, Denis Istomin “Ahhh” degan tovush bilan chopdi. Ha, u kuchli og‘riqni his qilayotganini sezish qiyin emas edi. Bir vaziyatda esa u qattiq sirpanib ketdi va “dod” degancha joyiga o‘tirib qoldi. Qo‘llari bilan o‘ng oyog‘ini ushlab qo‘ydi va bir amallab o‘rnidan turdi.
3-setda Denis Istomin 6/2 hisobida imkoniyatni boy berdi. Balki biroz og‘riqlar qolib, 4-setda g‘alaba qozonar va 5-setda bir amallab bu o‘yinda ham g‘olib bo‘lar deb o‘yladim. U 3-set oxirida hakamdan tanaffus so‘rab kortdan chiqib ketdi va 6 daqiqadan so‘ng yana qaytdi.
Ammo ana shu pallada mo‘’jiza yuz bermadi. Denis Istomin bu bahsni shunchaki oxiriga yetkazib qo‘yish uchun harakat qildi, xolos. U endi avvalgidan-da kuchli og‘riq bilan harakatlandi. Mag‘lubiyat muqarrar edi. Shunday bo‘ldi ham, setlar bo‘yicha 3-1 hisobida Dimitrov Grigor g‘alaba qozondi.
Shu bahsni Denis Istominning oila a’zolari, jumladan, onasi ham Melburn shahridagi arenada kuzatib o‘tirishdi. Men esa TV qarshisida bu mag‘lubiyatga guvoh bo‘ldim.
Bolgariyalik Grigor Dimitrov chorak finalga chiqdi va u endi belgiyalik tennischi bilan kuch sinashadi.
Denis Istomin esa bu turnirning 4-bosqichiga yetib kelganligi munosabati bilan albatta 117-o‘rindan ancha yuqoriga ko‘tarilishi aniq. O‘ylaymanki, jahondagi eng kuchli 100 ta tennischi qatoriga ham kira olsa kerak.
Shu payt menda bir haqli savol tug‘iladi. Denis Istomin rasmiy ma’lumotlarga ko‘ra shundoq ham shu paytgacha tennis ortidan 4 mln. dollardan ziyodroq daromad ko‘rgan ekan. Xo‘sh, uning shuncha puli bor ekan, nimaga u jarohatlari ustida ishlamagan? Agar u tizzasidagi jarohatdan o‘z vaqtida forig‘ bo‘lganida edi bugun balki g‘alaba qozonar va eski jarohatini yangilab olmagan bo‘lar edi.
Bolgariyalik Grigor Dimitrov nimaning evaziga bugun zafar quchdi? Nimaga u bugun dunyoning eng kuchli 15 ta tennischisidan biri bo‘lib turibdi? Chunki u soppa-sog‘ edi. Denis bilan bo‘lgan bahsda u ikki marta sirg‘anib ketdi. Birinchi holatda u borib reklama shitiga urildi. Ikkinchi holatda esa oyog‘i sirg‘anishi oqibatida u "shpagat" holatga tushib qoldi. Lekin ikkala vaziyatda uning na oyog‘i qayrilib ketdi, na payi cho‘zildi, va na tomiri tortishdi. U endi 25 yoshda bo‘lishiga qaramasdan juda tetik va baquvvat ekanligining hisobiga hozir chorak finalga chiqmoqda, balki yarim finalga ham yetib borar. Ma’lumot o‘rnida, Istomin 30 yoshda.
Denis Istomindagi mahoratga hech qanday shubham yo‘q. U iste’dodli, ammo hulosam shundan iboratki:
Yuz minglab dollarlar sohibi shu darajada ozg‘inki, ko‘rib hayron bo‘lasiz. U o‘z sog‘lig‘iga jiddiy e’tibor berib, tajribali va malakali fitnes va jismoniy tayyorgarliklar bo‘yicha murabbiylar qo‘l ostida shug‘ullanishi kerak, va o‘z jismoniy holatini hamisha ideal darajada ushlab turmog‘i lozim deb o‘ylayman.
Ulug‘bek Xudoyberganov (Bek_Uzbekistan)
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
