2017 yilning 1-4 iyun kunlari Italiya poytaxti Rim shahrida suzish bo‘yicha “Tiro a volo nuoto” an’anaviy xalqaro turniri o‘tkazildi. Uchinchi bor tashkil etilgan mazkur musobaqada Yevropaning qator davlati vakillari kabi mamlakatimiz sportchilari ham sovrinli o‘rinlar uchun kurash olib bordilar. E’tiborlisi, mazkur xalqaro turnirda Vatanimiz sharafini himoya qilgan 4 nafar sportchimizdan uchtasi sovrinli o‘rinlarni band etishdi.
Jumladan, terma jamoamiz yetakchilaridan biri Hurshidjon Tursunov 100 metr masofaga erkin usulda suzish bo‘yicha o‘tkazilgan musobaqada 00:49.54 minut natija bilan oltin medalga sazovor bo‘lgan bo‘lsa, 200 metr masofaga erkin usulda suzish bahslarida ham marraga 1:50.55 minut yetib kelib, shohsupaning eng yuqori pog‘onasiga ko‘tarildi. Quvonarlisi, Hurshidjon har ikki yo‘nalishda ham “Tiro a volo nuoto” xalqaro turnirining rekordini yangiladi.
Yaqindagina Jizzax shahrida bo‘lib o‘tgan “Barkamol avlod-2017” sport musobaqasida birinchi o‘rinni egallagan Artyom Kozlyuk ham “Tiro a volo nuoto” xalqaro turnirining rekordini yangilashga muvaffaq bo‘ldi. 200 metr masofaga batterflyay usulida suzish bo‘yicha o‘tkazilgan musobaqada 2:01.07 minut natija qayd etgan Artyom oltin medalni qo‘lga kiritish bilan birga, xalqaro turnirning rekordini ham yangiladi. Bundan tashqari tajribali sportchimiz 50 metr masofaga batterflyay usulida suzish musobaqasida 00:24.45 minut natija bilan birinchi, 100 metr masofaga batterflyay usulida suzishda esa 00:54.04 minut ko‘rsatkich bilan ikkinchi o‘rinni egalladi.
“Barkamol avlod-2017” sport o‘yinlarida bir necha yo‘nalishda g‘oliblik shohsupasiga ko‘tarilgan Aleksey Tarasenko Rim shahrida o‘tkazilgan xalqaro turnirda ham munosib ishtirok etib, terma jamoamiz hisobiga bir yo‘la uchta kumush medalni keltirdi. Xususan, erkin usulda suzish bo‘yicha 50, 100 va 200 metr masofalarga o‘tkazilgan musobaqalarda mos ravishda 00:23.08 minut, 00:50.38 minut va 1:51.03 minut natijalarni qayd etgan Aleksey Tarasenko uch bor shohsupaga ko‘tarildi. Shunday qilib, “Tiro a volo nuoto” xalqaro turnirida ishtirok etgan yurtdoshlarimiz 4 ta oltin va 4 ta kumush medallarga sazovor bo‘ldilar.
“Rim shahrida o‘tkazilgan xalqaro turnir sportchilarimiz uchun joriy yilning 14-23 iyul kunlari Vengriya poytaxti Budapesht shahrida o‘tkaziladigan jahon chempionati oldidan o‘ziga xos tayyorgarlik bosqichi vazifasini ham o‘tadi, - deydi O‘zbekiston suzish federasiyasi bosh kotibi Alisher G‘aniyev. Jahon chempionatiga tayyorgarlikning so‘nggi bosqichini sportchilarimiz mamlakatimizda o‘tkazishadi.
Sportchilarimizga suzish sport turining eng yirik musobaqalaridan biri hisoblangan jahon chempionatiga munosib tayyorgarlik ko‘rishlari uchun barcha zarur sharoitlar yaratilgan. Umid qilamizki, Vengriyada bo‘lib o‘tadigan jahon chempionatida ham sportchilarimiz o‘zlariga bildirilgan ishonchni oqlashadi”. Biz ham o‘z navbatida sportchilarimizga bo‘lajak yirik musobaqada omad va zafarlar tilab qolamiz. Ma’lumot uchun. Jahon chempionatida Vatanimiz sharafini Hurshidjon Tursunov, Aleksey Tarasenko, Artyom Kozlyuk va Daniil Bukin himoya qiladilar.
Mash’al
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
