Aksariyat oliy liga jamoalari ikkinchi davraga tayyorgarlikni boshlab yuborishdi. Ulardan biri «So‘g‘diyona»dir. Jizzaxliklar mashg‘ulotlarni Zominda o‘tkazishyapti.
Biz o‘tgan hafta jamoaning yetakchi futbolchisi, yarim himoyachi bo‘lishiga qaramay, 8ta gol bilan chempionat to‘purarlari orasida borayotgan Sanjar Rashidovdan intervyu oldik.
- Sanjar, tayyorgarlik qanday davom etyapti?
- Mashg‘ulotlarimiz reja asosida o‘tkazilyapti. Yig‘inga murabbiyimiz Diyor Fayziyev bosh-qosh bo‘lmoqda. Tayyorgarlik 13 iyulgacha davom etadi.
- Kutilmaganda bosh murabbiy Davron Fayziyev iste’foga chiqarildi...
- Ha, Davron akaning ketishini kutmagandik. Hammasi to‘satdan va juda tez ro‘y berdi.
- Bu jamoa uchun katta yo‘qotishmi?
- Albatta. Davron Fayziyevning «So‘g‘diyona» uchun qilgan xizmatlari, iste’dodli futbolchilarni tayyorlashdagi hissasi katta.
- Hali yangi bosh murabbiy ta-yinlanmadimi?
- Hozircha yo‘q. Ammo tez orada tayinlanishi aniq.
- Ushbu mutaxassisning kimligi sizlar uchun muhim ahamiyatga egami?
- Bo‘lmasam-chi. Bu klubimizga aloqador barcha insonlar uchun muhim.
- Shaxsan siz ushbu lavozimda kimni ko‘rishni istardingiz?
- Ochig‘i, bu haqida o‘ylab ko‘rganim yo‘q.
- Birinchi davradagi o‘yinlarni muhokama qildinglarmi?
- Tahlil har bir uchrashuvdan so‘ng bo‘ladi. Yo‘l qo‘yilgan xato va kamchiliklar ustida ishlaymiz.
- Jamoa birinchi davrani 13-o‘rinda yakunladi. Bu pog‘ona klub ko‘rsatgan o‘yinga mosmi?
- Yo‘q, albatta. Jamoamiz namoyish etgan o‘yin bo‘yicha yuqoriroq o‘rinlarda bo‘lishimiz kerak edi.
- Muvaffaqiyat qozonish uchun nima yetishmadi? Kamchiliklar qaysi jihatlarda ko‘rindi?
- Asosan yuzaga keltirilgan vaziyatlarni golga aylantirishda oqsadik.
- Jamoada moliyaviy muammolar kuzatilmadimi?
- Yo‘q, ushbu masala bo‘yicha hammasi joyida.
- Moddiy ta’minot qanday ketyapti?
- Oylik maoshlarimizni imkon qadar vaqtida berib borishga harakat qilishyapti.
- Demak, birinchi davradan klubning qarzdorligi yo‘q ekan-da?
- Xuddi shunday.
- Chempionatning hal qiluvchi bos-qichida ijobiy o‘zgarish ro‘y berishiga ishonasizmi?
- Nasib qilsa, shunday bo‘lishi kerak. Jamoa ko‘rsatayotgan o‘yin yomon emas, demak ijobiy ko‘rsatkichdan umid bor.
- Jamoa tarkibida qanday o‘zgarishlar kuzatilyapti? Yangi futbolchilar kelishdimi?
- Hozircha klub rahbariyati tomonidan shartnomasi bekor qilinganlardan tashqari boshqa hech kim jamoadan ketgani yo‘q. Safimizga qo‘shilayotganlar esa yetarli. Masalan, faoliyatini tugatgan «Obod»dan bir yo‘la uch nafar futbolchi - Shirinboy Abdullayev, Sardor Qahhorov va Sherzod Jalilov hozirda biz bilan birga mashg‘ulotlarda ishtirok etishyapti.
- Sanjar, ikkinchi davrani ham «So‘g‘diyona»da o‘tkazasizmi yoki bosh-qa takliflar bormi?
- Bu masalada hozircha hech narsa deya olmayman. Hammasini vaqt ko‘rsatadi. Takliflar yetarlicha bo‘lyapti.
- Demak, bu savol vaqtincha ochiq qoladi. Boshqa jamoaga ham o‘tishingiz mumkinligini inkor etmaysiz, shundaymi?
- Ha, katta ehtimol bilan ikkinchi davrani yangi klubda boshlasam kerak.
- Akangiz Sardor Rashidov ta’tilni oila davrasida o‘tkazdi. U sizning o‘yinlaringiz bilan qiziqdimi? Bu masalada nimalar dedi?
- Ha, albatta. Ta’til paytida o‘yinimizga ham keldi. Uchrashuvdan ke-yin jamoamiz va men ko‘rsatgan o‘yin-ni muhokama qildik.
- Uning «Al-Jazira»ga o‘tganligi oilangiz tomonidan qanday qabul qilindi?
- Bu eng to‘g‘ri qaror bo‘ldi. Oilaviy maslahatlashdik, hammaning fikri bir joydan chiqdi. Akam uchun xursandman. U BAAning amaldagi chempioni bilan shartnoma imzoladi. «Al-Jazira» kelasi mavsum OCHL bahslarida ishtirok etadi. Qolaversa, bu yil dekabr oyida aynan amirliklarda o‘tkaziladigan klublar o‘rtasidagi jahon chempionatida ham qatnashadi. Xabaringiz bor, akam Krishtianu Ronalduning o‘yin-lariga befarq emas. Agar portugaliyalik hujumchi «Real»ni tark etmasa, u holda akam va Krishtianuning maydondagi qarama-qarshiligiga guvoh bo‘lishimiz mumkin. Akamning yangi jamoa borasida qaror qabul qilishida shu omil ham asosiy rol o‘ynadi. Shu kunlarda u «Al-Jazira» safiga borib qo‘shilishi kerak. Fursatdan foydalanib, akamga yangi chempionat va klubida omad yor bo‘lishini tilayman. Terma jamoamiz ham mundial saralashining qolgan ikkita muhim uchrashuvida g‘alaba qozonib, JCH-2018 final bosqich yo‘llanmasini qo‘lga kiritsin. Albatta, Sardor akamdan Xitoy va Janubiy Koreyaga qarshi kechadigan o‘yinlarda gollar kutib qolaman.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
