Nima uchun Nemanya Matich «Manchester Yunayted»ning joriy yildagi eng muhim transferi ekanligi haqida.
«MYU»ga yangi tayanch yarimhimoyachi nega kerak bo‘ldi?
«Pozisiya, barqarorlik va nazorat» — Joze Mourinyoning jamoasidagi tayanch yarimhimoyachilari ana shu uchta talabga javob berishlari shart. O‘tgan mavsumda «Manchester Yunayted»ning markaziy chizig‘ida ana shu talablarga javob beradigan qahramon topilmadi. «Јizil iblislar» o‘z imkoniyatlaridan kelib-chiqib jo‘n o‘yin namoyish etishga, ya’ni to‘pni tezroq Zlatan/Fellayniga uzatish yoki bor e’tiborni qanotlarga qaratishga majbur bo‘lishdi. Bunga jamoada himoyani hujum bilan bog‘lovchi kadr yo‘qligi sabab bo‘ldi. Pogba ko‘proq oldinda harakat qilgani bois pressing kuchli bo‘lgan o‘yinlarda borligi sezilmay qolardi, Ander Errera raqib hujumini sindirishda jussasining kichkinaligi, Karrikka yoshining kattaligi, Fellayniga esa to‘pni oshirishdagi noaniqlik pand berardi. Shuning uchun ham Mourinyo bu nuqtani kuchaytirishga qaror qildi. Joze «Portu»da ishlab yurgan kezlaridayoq bu nuqtaga juda katta e’tibor qaratgan. O‘shanda uning g‘oyalarini Koshtinya ro‘yobga chiqargan. «Chelsi»da bu ulkan vazifani Makelele bilan Kambyasso, «Real»da esa Xabi Alonso o‘z zimmasiga olgandi. Joze ushbu nuqtadagi futbolchi nafaqat raqib hujumini to‘xtatishi balki aniq zarbasi bilan o‘z jamoasi hujumini tashkil eta bilishi lozim, deb hisoblaydi.
Nega aynan Matich tanlandi?
Agar raqamlarga qaralsa, Matich tayanch yarimhimoyadagi raqiblaridan ancha ortda qoladi. To‘pni raqibdan olib qo‘yishda Joze Fabinyo va uning «Monako»dagi sobiq sherigi Tyemua Bakayoko tengsiz hisoblanishadi. O‘z jamoasi hujumini tashkil etishda esa Vilyam Karvalyoning oldiga tushadigani yo‘q, lekin neajabki ana shunday yetuk kadr nima uchundir portugal Primeyrasida adashib yuribdi. Ularning barchasidan Nemanyani ajratib turadigan jihat – bu barqarorlikdir.
Serb qanday himoyalanish kerakligini juda yaxshi biladi. O‘tgan mavsumda tayanch yarimhimoyani Kante egallagani uchun Konte Matichni hujumga yaqinroq bo‘lgan nuqtaga o‘tkazdi. Italiyalik murabbiy serbiyalikni aniq va kuchli zarbaga ega bo‘lgani uchun ham hujum chizig‘iga o‘tkazgandi.
«MYU» boshqa futbolchilarni transfer qilolmasdi. «Monako» Fabinyo uchun katta pul so‘radi, Bakayoko «Chelsi»ga o‘tishni ixtiyor etdi, Dayer esa talabga javob bermasdi. Matich uchun ham kam pul sarflanmadi – 40 mln. funt ozmuncha summa emas, lekin bugungi qiymatdan kelib chiqilganda bu raqam fantastik hisoblanmaydi.
Yana bir qiziq ma’lumot. Sky Sportsning qayd etishicha, Mourinyo jamoasining o‘rtacha bo‘yini oshirishga intilayotgan ekan. Bir yil avval u klubga Bayi (187 sm), Ibragimovich (195) va Pogba (191)larni taklif qilgandi. Ularning orasida faqat Mxitaryan (177 sm) ajralib turgandi. Joriy yilda «Yunayted»ga Lindelyof (187 sm), Lukaku (191) va Matich (194 sm)lar o‘tishdi. «MYU»ni kuchaytirishi mumkin bo‘lgan nomzodlar orasidan Mourinyo eng bo‘ydorida to‘xtaldi. Joze «ikkinchi qavat»dagi kurashga alohida urg‘u qaratmoqchiga o‘xshaydi. 2015/16 mavsum bilan qiyos qilinadigan bo‘lsa o‘tgan mavsumda bosh bilan zarba berish 100%dan 109%ga oshgan, yakkakurashlardagi aniqlik 25% va qanotlardan amalga oshirilgan krosslar aniqligi 45%ga o‘sgan. Aftidan, Joze kelajakda futbolchilarning ushbu xislatidan unumli foydalanishni rejalashtirayotgan ko‘rinadi.
Matich bilan «MYU» qanday o‘ynaydi?
Matichning transferi hujumga shay bo‘lgan Pogba bilan Erreraning qo‘llarini bo‘shatibgina qolmay, yoshi o‘tayotgan Karrikka dam berilishini hamda jamoaning markazdagi o‘yini rang-barang bo‘lishini ta’minlaydi. Ko‘pchilik Matichning Pogba va Erreraning ortida o‘ynab, raqib hujumini “sindirishi” va tezkor ravishda to‘pni hujumdagi jamoadoshlariga yetkazishini taxmin qilishmoqda. O‘tgan mavsumda Karrik ana shunday vazifani bajargandi, lekin katta masofani bosib o‘tishi uchun veteran o‘yinchiga yoshi to‘sqinlik qilgandi. Matich esa «Chelsi»da oldinga o‘tgan Oskar va Fabregaslarning yo‘qligini bildirmagandi. Pogba va Erreralar himoyaga qaytib, pressing uyushtirishda faol qatnashishi hech kimga sir emas. Matichning tashrifidan so‘ng ular birgalikda maydon markazini «gullatishi»ga shak-shubha yo‘q. Bu trio o‘zaro til topishsa, total futbol qayta tug‘ilishiga guvoh bo‘lishimiz aniq!
Ikkinchi variant –Matich tayanch yarimhimoyada Errera, Karrik yoki Timoti Fosu-Mensa bilan birgalikda maydonga tushirilsa, bu «MYU»ga raqib hujumini butunlay bug‘ib qo‘yish imkoniyatini beradi.
Uchinchi variant – Nemanya box-to-box o‘yinchisi sifatida foydalanish mumkin. «Chelsi»dagi oxirgi mavsumida futbolchi aynan mana shunday vazifani bajargandi. Serbiyalik futbolchi jarimadan jarimagacha bo‘lgan hududda turli vazifalarni ado eta oladigan universal o‘yinchi hisoblanadi. Jozening aynan uni tanlashida Matichdagi ana shu universallik sabab bo‘lgandir, ehtimol.
«Zamonaviy transfer bozorida ishlash osonmasligini bilaman, — degandi Mourinyu transfer mavsumi arafasida. – Boshda menga beshta yangi o‘yinchi kerakligini aytgandim, endi esa har bir nuqtada bittadan o‘yinchi kifoya qilishini angladim». U kutgandek «MYU» dastavval mudofaa va hujumni mustahkamladi. Endi esa o‘tgan mavsumda juda oqsagan markaziy nuqta berkitildi. Joze endi hech narsadan nolimasa kerak. Agar hakamlikni hisobga olmasa albatta.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
