O‘zbekiston terma jamoasi 2018 yilgi jahon chempionatiga yo‘l olishi uchun har doimgidek so‘nggi turgacha imkoniyat saqlab qolmoqda. Har doimgidek taqdirning o‘zi bizga imkoniyatlarni saqlab qolishda yordam beraverardi. Bu safar shu darajaga borib yetdiki, O‘zbekiston terma jamoasida saralashning 5ta uchrashuvini (yarmidan ko‘pi!) boy bergan bo‘lishiga qaramay to‘g‘ridan-to‘g‘ri yo‘llanma uchun imkoniyat mavjud. Yana qachon uchrashuvlarning yarmini boy bergan jamoa yo‘llanma uchun kurashgan, ochig‘i eslay olmadim. Xullas, bugun ana shu imkoniyatdan foydalanish uchun birinchi navbatda Janubiy Koreya terma jamoasini mag‘lub etish kerak bo‘ladi. Uyog‘ini bilasiz...
Janubiy Koreya terma jamoasi qanchalik jiddiy va bizga noqulay raqib ekanini futbolga oz bo‘lsada qiziqadigan istalgan muxlis biladi. Statistikaga nazar tashlaydigan bo‘lsak ham ikki terma jamoa o‘rtasidagi uchrashuvlarda Koreya 14 marta, O‘zbekiston terma jamoasi esa faqat bir marta, uooq o‘tmishga aylanib bo‘lgan uchrashuvda (1994 yilgi Osiyo o‘yinlari yarim finalida) g‘alaba qozongan. Shuning o‘zi ham bir kutilayotgan xavf deyish mumkin. Koreyaning biz uchun yana qanday xavfli tomonlari bor? Buni sanab o‘tishga harakat qilamiz.
Yulduzlar
Song Hyong Min. Birgina shu nomning o‘zi katta xavfdan darak berib turibdi. «Tottenhem» hujumchisi terma jamoada klubdagidek o‘ynay olmayotganini tan olib turgan bo‘lsada, o‘sha o‘ynay olmagan holida ham u biz uchun eng xavfli raqib bo‘lib qolaveradi. Saralash bosqichi doirasida 7ta gol kiritishga ulgurgan Song O‘zbekiston terma jamoasiga qarshi Osiyo kubogi doirasidagi chorak final uchrashuvida ikkita gol kiritgan. Bir so‘z bilan aytganda Song uchun O‘zbekiston qulay raqib.
Yana bir yulduz bu Ki Sung Yong.
Angliya premyer-ligasidagi o‘yinlari orqali bizga tanish bo‘lgan Ki Eronga qarshi uchrashuvda jarohat olgandi. Ammo murabbiyning aytishi bo‘yicha uning jarohati jiddiy emas. O‘zbekistonga qarshi uchrashuvda u jamoani maydonga sardor sifatida olib tushishi kutilmoqda. Ikki futbolchining o‘zi zarur paytda o‘yin taqdirini hal qilib keta olishi mumkin.
V plan
Janubiy Koreya terma jamoasi birinchi davradagi o‘yin orqali ham ko‘rsatib qo‘ydiki, O‘zbekistonga qarshi o‘yinlarda jamoaning oldindan reja qilgan uslubi o‘xshamasa, V planni ishga solgan holda maqsadga yetishish mumkin. Koreyada bo‘lib o‘tgan uchrashuvda Marat Bikmayevning golidan so‘ng mezbonlarning dastlabki rejalari o‘xshamagan va keyinchalik ular o‘sha uchrashuv uchun mo‘ljallagan zaxiradan foydalanish orqali maqsadga erishib ketishgandi. O‘sha taktika biz kutayotgan keyingi xavfda.
Mehmoncha uslubga mos «joker»
Yuqorida tilga olib o‘tgan alohida uchrashuv uchun V plan bu asosan havolatib yetkazib beriladigan to‘plarni bo‘ydor futbolchi yordamida golga aylantirish yoki golli vaziyatni yaratib beruvchi «skidka»larni amalga oshirish edi. Aynan shu maqsadda hujumchi Kim Shin Vuk zaxiradan tushirilgan, hattoki bo‘ydor Anzurni ikkinchi qavatdagi kurashlarda osonlikcha mag‘lub etgan Kim hal qiluvchi golga reja qilingan uslubdagi so‘nggi pasni bergandi. Janubiy Koreya terma jamoasi mehmonda unchalik o‘yini qovushmasligi va bugungi mezbon jamoaning ishtiyoqi sabab ham asosan qarshi hujum taktikasini tanlashini kutish mumkin. Qaysidir ma’noda «Lester»ni APL chempioni qilgan bu usul uzoq masofaga to‘pni havolatib yetkazib berish orqali vaziyatlarni yaratish va bo‘sh zonalardan unumli foydalanish edi. Bu uchrashuvda agar Koreya xuddi shu uslubdan foydalansa, Kim Shin Vuk kabi bo‘ydor raqib qanchalik xavfli ekanini biz ko‘rib bo‘lganmiz.
Karvonsaroy o‘ng qanot
O‘zbekiston terma jamoasining hujum chizig‘ini yo‘q deb hisoblasak, qolgan o‘rinlarda eng muammoli hudud aynan o‘ng qanot bo‘lib qolmoqda. Babayan sof markaziy himoyachi bo‘lib o‘ynab kelgan To‘xtaxo‘jayevda o‘ng qanot himoyasi uchun qanday qobiliyatni ko‘rgan bilmadikku, lekin so‘nggi vaqtlarda raqiblar aynan mana shu chiziq bo‘shligini bilib hujumlarni faqat va faqat shu qanot orqali uyushtirishga harakat qilib kelishmoqda. Uzoqqa bormaylik Xitoyga qarshi so‘nggi o‘yin bunga yaqqol misol bo‘la oladi. Eng yomon esa bu safar raqib Xitoy emas va chap qanotda to‘p suradigan futbolchi ham qaysidir nomi yoddan chiqadigan xitoylik futbolchi emas, balki Song Hyong Min bo‘ladi.
Tasdiqlanmagan manbalarga ko‘ra, Babayan Akmal Shorahmedovga javob berib yuborgan.
Buning sababi bizga qorong‘u. Bu uchrashuvda o‘ng qanotda Davron Hoshimovning harakat qilishi kutilmoqda. Qo‘pol o‘ynashni yaxshi ko‘radigan Hoshimovga, fintlar bilan raqibni ortda qoldirishni yaxshi ko‘radigan Songga qarshi o‘yinda qizil kartochka ishlab olmasligi tilab qolamiz.
Murabbiy
Ha, aynan shunday. Murabbiy bugungi O‘zbekiston terma jamoasiga solishtirganda katta xavf tug‘diradi. Jamoa istalgan holatda, qiyin vaziyatga tushib qolganda, o‘yinga qarab, barchasini o‘zgartirib tashlay oladigan, o‘yindan kelib chiqib natijaga ta’sir qila olishi mumkin bo‘lgan murabbiy raqib jamoa boshqaruvida bugun maydonga chiqib keladi. Bizda esa hozircha birorta uchrashuvda yuqorida sanalgan xususiyatlarga ega murabbiyni ko‘rmayapmiz.
Yana bir jihat, aytgancha, bu ikki murabbiyning o‘zaro o‘yinlarida ham koreyalik mutaxassis Babayanni mag‘lub etishga ulgurgan. Olimpiya terma jamoasi bosh murabbiyi sifatida ham.
Ishqilib, biz sanagan xavflarning barchasi shunchaki faraz va xato bo‘lib chiqsin.
Azamat Murodov
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
