Vohamiz futbol ishqibozlari XXVI O‘zbekiston chempionatining 26-turida viloyat derbisiga guvoh bo‘lishadi. Aslida bu tur derbilarga boy hisoblanadi.
Uchrashuv 26 oktyabr payshanba kuni Muborak shahridagi “Bahrom Vafoyev” markaziy stadionida bo‘lib o‘tadi. Derbi maqomiga ega uchrashuv, soat 16:00da start oladi.
O‘zPFL 26-tur
“Mash’al” (Muborak) - “Nasaf” (Qarshi)
26.10.2017. “B.Vafoyev” stadioni.16:00da
Bosh hakam: Ilgiz Tantashev (Buxoro)
Qanot hakamlari: Husniddin Shodmonov (Buxoro), Abdurahmon Qo‘ldoshev (Buxoro),
Zaxira hakami: Firdavs Norsafarov (Qarshi)
Nazoratchi: Sardor Najafaliyev (Toshkent)
O‘zPFL vakili: Bobur Xaydarov.
O‘zaro uchrashuvlar tarixidan
Ushbu jamoalar o‘rtasidagi chempionat bahslari 2002 yildan boshlangan. Shu yili jamoamiz har ikkala uchrashuvda ham muborakliklarni bir xil 2:0 hisobida mag‘lub etgan. Jamoamiz safida “gazchilar” darvozasini birinchi ishg‘ol etgan futbolchi Nu’mon Hasanov hisoblanadi.
“Mash’al” hamda “Nasaf” jamoalarining o‘zaro o‘yinlari tarixiga nazar tashlasak, o‘tkazilgan 29ta o‘yinning 15 tasida "ajdarlar" zafar quchganligining guvohiga aylanamiz. "Mash’al" vakillari esa 8 bor g‘alaba qozonishgan. Qolgan oltita bahsda tomonlar murosa yo‘lini tanlashgan. E’tiborli jihati, barcha durang natijalar Muborakda qayd etilgan.
To‘plar nisbati bo‘yicha ham mos ravishda “Nasaf” futbolchilari ustunlik qilishmoqda: 47-27.
Bu jamoalarning o‘zaro o‘yinlarida eng ko‘p, besh marotaba qayd etilgan hisob - 2:0. Bu jamoalar o‘zaro bahslashganda ikki bor nursiz durang qayd etilgan. Qolgan barcha uchrashuvlarda muxlislar gollarga guvoh bo‘lishgan.
Birinchi davradagi G‘uzorda o‘tkazilgan o‘zaro uchrashuvda “Nasaf” kichik 1:0 hisobida g‘alaba qozongan edi. Uchrashuvdagi yagona golni Islom Rashidxonov kiritgan.
Muborakdagi uchrashuvlarga oid faktlar
Mazkur jamoalar Muborakda shu paytgacha o‘zaro 14 marta kuch sinashishgan. Shularning 2tasida “Nasaf” g‘alabaga erishgan, xolos. 6 uchrashuvda durang va yana 6 uchrashuvda mag‘lub bo‘lganmiz. Muborakdagi o‘zaro uchrashuvlarda darvozalarga jami 30ta gol kiritilgan. To‘plar nisbati bo‘yicha ham ustunlik “Mash’al” tomonida – 17:13.
“Ajdarlar” oxirgi marta Muborakdan 2005 yili (murabbiy Oleg Morozov) g‘alaba bilan qaytishgan (2:0). O‘shanda Zafar Xolmurodovning “dubl”i “Nasaf”ga uch ochko keltirgan edi. Bu tarixiy g‘alabaga ham 12 yil bo‘ldi. Ushbu uchrashuvdan keyin futbolchilarimiz Muborakda 1tadan ko‘p gol ham ura olishmagan.
“Nasaf” - “Mash’al” uchrashuvida eng yirik hisob 2007 yilda qayd etilgan. O‘shanda muboraklilar 4:1 hisobida g‘olib chiqishgan. 2004 yilgi aynan Muborakda o‘tgan o‘yinda darvozalarga 7 ta gol kiritilgan (4:3).
Qani ko‘ramiz, bu safar jamoamiz Muborakdagi 12 yillik “qora an’ana”ga chek qo‘yarmikan.
Ikkala jamoada ham to‘p surgan futbolchilar haqida
Agar “Nasaf” va “Mash’al” jamoalari tarkibiga e’tibor qaratsak, qiziq holatga guvoh bo‘lamiz. Ayni paytda bu jamoalarda to‘p surayotgan ayrim futbolchilar vaqtida ikki jamoada ham to‘p tepishgan.
Hozirgi paytda “Mash’al” safida o‘ynayotgan Botir Qorayev, Kenja To‘rayev, Mirzakamol Kamolovlar vaqtida “Nasaf” tarkibida to‘p surishgan. Zohir Qo‘ziboyev esa “Nasaf-2” tarkibida o‘ynagan.
“Nasaf”ning hozirgi futbolchilaridan Jasur Hasanov, Shaxboz Erkinov, Sanjar Quvvatovlar vaqtida “Mash’al” jamoasi sharafini himoya qilishgan.
Raqiblar o‘tgan turni qanday o‘tkazishdi?
“Nasaf” joriy chempionatda mana yetti uchrashuvki, o‘z darvozasidan gol o‘tkazmasdan g‘alabaga erishib kelmoqda. Jamoamiz o‘tgan 25-tur uchrashuvida “Dinamo”ni yirik 3:0 hisobida dog‘da qoldirdi. 25 uchrashuvdan so‘ng, 50 ochko bilan 2-pog‘onada bormoqda.
“Mash’al” o‘tgan turda Olmaliqning “Olmaliq” jamoasi bilan bahs yuritdi. Unda 2:1 hisobida maydon egalari g‘alaba qozonishgan. “Mash’al” 25 uchrashuvdan so‘ng 35 ochko bilan turnir jadvalining 8-pog‘onasida bormoqda.
“Mash’al” jamoasining to‘purarlari haqida
Muborakliklar o‘tgan 25 uchrashuvda raqiblari darvozasiga 30 marta to‘p kiritishdi. O‘z darvoazalaridan esa 27ta to‘p olib chiqishgan.
30ta to‘pni “Mash’al”ning 12ta o‘yinchisi o‘z hisobiga yozdirib qo‘ygan.
Ayni paytda jamoaning to‘purari Humoyun Murtazoyev bo‘lib turibdi. Uning hisobida 7ta gol bor.
Yoshlar bahsi haqida
Jamoalarning o‘rinbosarlari o‘rtasidagi uchrashuv 25 oktyabr chorshanba kuni bo‘ladi. Uchrashuv soat 15:30da “B.Vafoyev” kichik stadionida o‘tkaziladi.
Demak, bo‘lajak voha derbisi har har doimgidek murosasiz kurashlarga boy uchrashuv bo‘ladi. Futbol ishqibozlariga ana shunday muhim va qiziqarli bahsni o‘tkazib yubormang deb qolamiz.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
