Yurtimizda ko‘zga ko‘ringan futbol mutaxassislaridan biri Azamat Abduraimov, O‘zbekiston Futbol Federasiyasi tomonidan yurtimizda futbolni yanada rivojlantirish, milliy chempionatimiz saviyasini oshirish va bu yo‘l orqali terma jamoalarimiz darajasini ko‘tarish borasida amalga oshirilayotgan chora-tadbirlar, islohotlar haqida o‘z fikrlarini bildirib o‘tdi.
Azamat Abduraimov: “Ochig‘ini tan olib aytish kerak, Oliy liga o‘yinlariga muxlislar tashrifi kutilganidek emas. Bu esa o‘z o‘zidan o‘zgarishni talab qilmoqda. Ya’ni islohotlar qilish payti keldi. Shuning uchun ham kelasi yildan Oliy liga klublari 12ta qolishi borasidagi qarorni to‘g‘ri deb o‘ylayman. Nimanidir o‘zgartirish kerak edi. Angliya yoki Ispaniya chempionatlarini kuzata turib, oldindan qanday hisob qayd etilishi mumkinligini ayta olmaysiz. Biz ham chempionatimizda shu kabi raqobat kuchli bo‘lishini va har bir turda murosasiz, qiziqarli o‘yinlar ko‘p bo‘lishini xohlaymiz. To‘g‘ri, bunday o‘zgarish birinchi marta bo‘lmoqda, lekin bu futbol rivoji uchun foydali bo‘ladi deb o‘ylayman. Chunki endi chempionatimizda kuchli jamoalar qolib, raqobat kuchayadi.
Har o‘yinda maydonda haqiqiy kurash kechsa, futbolchi ham bunga moslashadi. Shundan so‘ng u terma jamoada ham o‘z imkoniyatini to‘liq namoyish eta oladi. Faqatgina chet elda to‘p surayotgan legionerlardan umid qilib yuravermasligimiz kerak. O‘zimizning chempionatda ham shunday yetakchilarni tarbiyalashimiz zarur. Shuning uchun ham bu format futbolimiz foydasiga ishlaydi, deb umid qilaman”.