O‘zbek futboli hamisha o‘z darvozabonlari bilan nom qozongan. Jumladan jahon darajasidagi golkiper Yuriy Pshenichnikov ham o‘zbek futboli tarbiyalanuvchisidir. Shuningdek, O‘zbekistonda Yuriy Sheykin ham alohida mahorati bilan ajralib turgan. To‘g‘ri, u jahon futbolida aytarli nom qoldirmagan. Lekin 1994 yilgi Osiyo o‘yinlarining yarim final va final uchrashuvlarida fantastik o‘yinlari bilan muxlislar qalbidan joy olgan. Aynan o‘sha musobaqadan so‘ng «Traktor»ning tanilmagan posboni o‘zbekistonlik va osiyolik futbol muxlislarining kumiriga aylangandi.
Osiyo o‘yinlari-94 yarim finalidan o‘rin olgan Janubiy Koreya termasiga qarshi uchrashuvda Sheykin ajoyib o‘yin namoyish qilgandi, darhaqiqat. O‘shanda u haqiqiy mo‘’jiza ko‘rsatgan. Xullas, Yuriy o‘z darvozasi daxlsizligini saqlab qolgan, Azamat Abduraimovning yagona goli esa O‘zbekiston termasini finalga olib chiqqandi.
Uchrashuvdan so‘ng koreyaliklar ustozi Anatoliy Bishoves quyidagilarni aytib o‘tgandi: «O‘yinning rasmiy ko‘rsatkichlarini keltirib o‘tishim mumkin. Biz darvoza tomon 27ta zarba yo‘lladik, ular 3ta. Biz 20 marta burchakdan to‘p kiritdik, ular 2 marta. Ikkinchi qavatda 6-7ta vaziyatdan foydalana olmadik. Raqib darvozaboni Sheykin maydonda mo‘’jiza yaratdi. Shuningdek, himoyachilar ham ajoyib harakat qilishdi. Abduraimov esa darvozamizni 30-35 metrlardan ishg‘ol qildi. To‘p maydonga tegib, darvozabon qo‘llari ustidan oshib to‘rdan joy oldi».
Shuningdek, Sheykin Xitoy termasiga qarshi final uchrashuvida ham o‘zini ko‘rsatgandi. U jamoamizni bir nechta goldan qo‘tqarib qolgan. Yakunda termamiz 4:2 hisobida g‘alaba qozonib, bosh sovrinni qo‘lga kiritgandi.
Yuriy Sheykin 1963 yilning 10 aprel kuni Toshkentda tug‘ilgan. Futbolchilik faoliyatini 1983 yili Xorazm viloyati Bog‘ot tumanining «Narimonchi» jamoasida boshlagan. Keyinchalik faoliyatining asosiy qismini Toshkentning «Traktor» klubida o‘tkazgan. Shuningdek, «Shaxtyor» (Angren), MHSK (Toshkent), «Mash’al» (Muborak), «Zarafshon» (Navoiy) jamoalari sharafini ham himoya qilgan. O‘zbekiston terma jamoasiga 1994 yili jalb qilingan. U milliy terma safida 8ta o‘yin o‘tkazib, o‘z darvozasidan 4 marta to‘p olib chiqqan. 1994 yilgi Osiyo o‘yinlari g‘olibi. 1996 yili MHSK tarkibida O‘zbekiston chempionatining bronza medalini qo‘lga kiritgan. 1994 yil yakunlariga ko‘ra, «O‘zbekistonning eng yaxshi futbolchisi» so‘rovida Igor Shkvirin va Mirjalol Qosimovdan keyin 3-o‘rinni band etgan.
O‘zbekistonda jismoniy tarbiya va sportni rivojlantirishda qo‘shgan hissasi, Xirosimada bo‘lib o‘tgan Osiyo o‘yinarida muvaffaqiyatli ishtiroki uchun O‘zbekiston Respublikasi Prezidenti tomonidan «Shuhrat» medali bilan taqdirlangan.
U 37 yoshida (2000 yil) faoliyatini yakunlab, doimiy yashash uchun Rossiyaga ko‘chib ketgandi. Biroq yangi hayotga ko‘nikishi qiyin bo‘ldi - xastalik... Yuriy Sheykin 2011 yilning 5 yanvar kuni Velikiy Novgorod (Rossiya) shahrida olamdan o‘tdi.
Mavlon Shukurzoda
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
