Xabaringiz bor, ertaga Toshkent shahrida professional boks bo‘yicha katta jang oqshomi tashkil qilinadi. Unda o‘zbekistonlik bokschilar Rossiya, Gruziya, Tanzaniya va Indoneziya mamlakatlaridan tashrif buyuradigan charm qo‘lqop ustalariga qarshi ringga ko‘tariladilar. Oqshomning markaziy jangida hamyurtimiz Azizbek Abdug‘ofurov rossiyalik Dmitriy Chudinovga qarshi ringga ko‘tariladi. Ushbu jangda g‘alaba qozongan bokschi WBC Silver kamari sohibiga aylandi.
Bugun ushbu boks kechasi oldidan «Radisson» mehmonxonasida matbuot anjumani va rasmiy vazn o‘lchash marosimi o‘tkazildi. Anjumanida bokschilar bilan bir qatorda WBC supervayzerlari, promouterlar, O‘zbekiston professional boks federasiyasi vakillari ham ishtirok etishdi.
«Iliq kutib olishgani uchun O‘zbekiston mamlakatiga minnatdorchilik bildiraman. WBC ilk marotaba O‘zbekistonda mana shunday katta boks oqshomini tashkil qilmoqda. Ertaga ikki ajoyib, kelajagi porloq bokschilar ishtirokida qiziqarli jang tomosha qilamiz. Ularning har ikkisiga ham omad tilaymiz», – dedi WBC supervayzeri Oksana Semenishina.
O‘z navbatida bokschilar ham OAV xodimlari tomonidan berilgan savollarga javob qaytarishdi.
-Azizbek, ertangi jangda raqibingizni nechanchi raundda nokaut qilmoqchisiz?
-Bu ring. Jang oldidan men bu raundda raqibimni nokaut qilaman deb aniq ayta olmayman. Ertangi to‘qnashuvda men o‘zimning eng kuchli jangimni ko‘rsatib, g‘alaba qozonmoqchiman.
Huddi shu savol bokschimizning ertangi raqibi Dmitriy Chudinovga ham berildi:
«Bu jangga yetib kelish uchun ancha mehnat qildim. Jang natijasi qanday bo‘lishini ring ko‘rsatib beradi», – deb javob berdi rossiyalik bokschi.
Rossiyalik bokschining promouter Albert Xachaturov O‘zbekiston boks mamlakati ekanligini alohida qayd etib o‘tdi.
«Assalomu alaykum. Men bu mamlakatga begona emasman. Andijon viloyatidan chiqqanman. Ushbu jangdan butun bir mamlakat, o‘zbek boksi yutadi. O‘zbekiston boks mamlakati ekanligi barchaga ma’lum. Ishonchim komilki, yaqin yillar ichida O‘zbekistondan professional boksda jahon chempioni chiqadi. Bunga shubha qilmayman», – dedi promouter.
Matbuot anjumani yakunlanganidan so‘ng bokschilar ishtirokida rasmiy vazn o‘lchash marosimi o‘tkazildi.
Eslatib o‘tamiz, ertangi jangda quyidagi juftliklar ringda o‘zaro to‘qnash keladilar:
Azizbek Abdug‘ofurov – Dmitriy Chudinov (Rossiya)
Qudratillo Abduqahhorov – Tvaxa Kiduku (Tanzaniya)
Jasur Ahmadjonov – Stevi Ongen Ferdinandus (Indoneziya)
Olimjon Nazarov – Xvicha Gigolashvili (Gruziya)
Jamshid Najmiddinov – Kaxa Avetisiani (Gruziya)
Ulug‘bek Sobirov – Jorji Ungiadze (Gruziya)
Anvar Turobov – Roy Muxlis (Indoneziya)
Janglar poytaxtimizdagi «O‘zbekiston» sport majmuasida o‘tkaziladi.
Qizilqum
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
