O‘zbekiston Milliy olimpiya qo‘mitasi Prezidenti Umid Ahmadjonov bugun Chirchiq shahridagi O‘zbekiston davlat jismoniy tarbiya Universitetini borib ko‘rdi. MOQ Prezidentini Universitetning o‘quv ishlar bo‘yicha prorektori Komil Yarashev kutib oldi.
Umid Ahmadjonov salkam 20 gektar maydonga ega bo‘lgan Universitet hududini ko‘zdan kechirar ekan, respublikadagi eng asosiy jismoniy tarbiya va sport ta’lim maskaniga qo‘yilayotgan asosiy talab malakali murabbiylar yetkazib berish ekanligini qayd etib o‘tdi. Buning uchun Milliy olimpiya qo‘mitasi kerakli barcha yordamni ayamasligini, zarur bo‘lgan shart-sharoitlarni yaratib berishga tayyor ekanligini ma’lum qildi.
Shuningdek, tashrif davomida Umid Ahmadjonov va ishchi guruh vakillari Universitet hududidagi sport manejini borib ko‘rishdi, u yerdagi sharoitlar bilan yaqindan tanishishdi. Tan olish kerak, MOQ Prezidenti u yerdagi sharoitlardan umuman qoniqmadi. Sababi, 2005 yilda qurib, foydalanishga topshirilgan manej hozirgacha biror marotaba ta’mirlanmagan va tabiiyki ayni paytda kapital ta’mirga muhtoj holatda. Vaholanki «Barkamol avlod» sport o‘yinlari uchun qurilgan ushbu sport inshooti bir paytlar O‘zbekistondagi eng zo‘r manej bo‘lganligini ko‘pchilik yaxshi eslaydi. Ammo, hozirgi kunda O‘zbekiston davlat jismoniy tarbiya Universiteti talablariga mutlaqo javob bermaydi.
O‘zbekiston Respublikasi Prezidentining 2017 yil 10 avgustdagi «O‘zbekiston davlat jismoniy tarbiya instituti faoliyatini yanada takomillashtirish chora-tadbirlari to‘g‘risida»gi PQ-3197 qaroriga binoan mazkur Oliy o‘quv yurti va Chirchiq Olimpiya zaxiralari kolleji uchun bino va inshootlarni qurish hamda ularga berilayotgan tegishli binolar va inshootlarni ta’mirlash va rekonstruksiya qilish bo‘yicha Toshkent viloyati hokimligi huzuridagi «Yagona buyurtmachi xizmati» injiniring kompaniyasi buyurtmachi, «O‘zshaharsozlikLITI» AJ bosh loyihachi tashkilot, “Qurilishbirlashmasi” AJ – bosh pudratchi tashkilot etib belgilangan. Unga ko‘ra, 2018 – 2021 yillar davomida Universitet uchun binolar qurish, rekonstruksiya qilish, mukammal ta’mirlash va jihozlash uchun davlat tomonidan pul mablag‘lari bosqichma-bosqich ajratilishi belgilab qo‘yilgan.
Ammo afsuski, davlatimiz tomonidan shunday imkoniyat va sharoitlar yaratib berilayotganiga qaramasdan, ayrim mas’uliyatsiz rahbarlarning loqaydligi tufayli ishlar o‘lda-jo‘lda qolib ketgani xaqida Umid Ahmadjonov kuyunib gapirdi.
Tashrif davomida Universitetning suzish havzasi, o‘quv binolari ham ko‘zdan kechirildi. Shuningdek, Umid Ahmadjonov Universitet sport manejida bo‘lib o‘tayotgan og‘ir atletika bo‘yicha 23 yoshgacha bo‘lgan sportchilar o‘rtasidagi O‘zbekiston chempionati musobaqalarini ham tomosha qildi, g‘olib va sovrindorlarni taqdirlash marosimida ishtirok etdi. Mashg‘ulotlar zalida esa Osiyo o‘yinlariga jiddiy tayyorgarlik ko‘rayotgan og‘ir atletikachilarimiz – Ruslan Nuriddinov, Rustam Djangabayev va Farhodbek Sobirov kabi terma jamoa a’zolarining mashg‘ulot jarayonlarini kuzatdi, ular bilan suhbatlashdi. MOQ rahbari sportchilar uchun zarur bo‘lgan barcha-shart sharoitlar yaratib berilishini, qanday takliflar bo‘lsa murojat uchun eshigi ochiq ekanligini qayd etib o‘tdi.
Umid Ahmadjonov uchrashuvga yakun yasar ekan, mana shunday sharoitda ham ishlayotgan Universitet pedagogik jamoasiga minnatdorchilik bildirib o‘tdi.
«Ochig‘i, bu yerdagi holatni ko‘rib juda achindim. Prezidentimiz Chirchiq Olimpiya zaxiralari kollejini bejizga mazkur Universitetga biriktirib bermagandilar. Chunki bu yerning tabiati, iqlimi, joylashgan hududi yosh sportchilar uchun ayni muddao hisoblanadi. Ammo, so‘nggi vaqtlarda o‘quv yurtiga e’tibor pasaygan. Mana shunday sharoitda mehnat qilayotgani uchun Universitet jamoasiga, shu jumladan ilmiy xodimlar, o‘qituvchilar va rahbariyatga minnatdorchilik bildiraman. Biz yaqin kunlarda ushbu holat yuzasidan katta yig‘ilish tashkil etamiz va sharoitlarni kuchaytirish yo‘lida tezkor choralarni amalga oshiramiz», – dedi Umid Ahmadjonov.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
