O‘zbekiston futbol assosiasiyasi o‘zbek futbolining afsonasi, “O‘zbekiston iftixori” faxriy unvoni va “Shuhrat” medali sohibi Birodar Hasanovich Abduraimovni 75 yoshlik yubileyi bilan muborakbod etadi.
Birodar Hasanovich 1943 yil 14 may kuni Toshkent shahrida tug‘ilgan bo‘lib, futbolchilik faoliyatini 1960 yili Toshkentning “Paxtakor” klubida boshlagan. Keyinchalik Rossiyaning “Spartak” va SSKA klublarida ham bir muddat to‘p surgan. Birodar Abduraimovning gollari o‘zi to‘p surgan jamoalarga katta natijalarga erishishga yordam berganini alohida ta’kidlab o‘tish kerak. Uning yorqin o‘yini, betakror fintlari va maydondagi harakatlari ko‘plab muxlislarni o‘ziga rom etardi.
Birodar Abduraimov murabbiy sifatida ham uzoq yillar mehnat qilib, ko‘plab shogirdlarni tarbiyalab voyaga yetkazgan inson hisoblanadi. U “Paxtakor”, “Shahrixon”, “Dinamo”, “Navbahor” kabi klublarda hamda O‘zbekiston milliy terma jamoasida faoliyat yuritgan.
Birodar Abduraimov “Paxtakor” futbol klubida 358ta o‘yin o‘tkazib, ko‘p o‘yin o‘tkazish bo‘yicha rekord sohibi hisoblanadi.
Birodar Abduraimovning farzandlarini ham muxlislar kuchli futbolchi va murabbiy sifatida yaxshi tanishadi. Hozirda Azamat Abduraimov O‘zbekiston o‘smirlar terma jamoasi bosh murabbiyi sifatida ishlab kelmoqda. Jasur Abduraimov esa “Paxtakor” klubida yordamchi murabbiy sifatida faoliyat yuritmoqda.
O‘zbekiston futbol assosiasiyasi Birodar Hasanovichni tavallud ayyomi bilan tabriklab, unga uzoq umr va sihat-salomatlik tilaydi. Yana uzoq yillar davomida yosh murabbiylar va mutaxassislarga o‘z tajribalari bilan o‘rtoqlashib, o‘zbek futboli rivojiga hissa qo‘shib yurishini tilab qoladi.