Yevropa chempionlar ligasining navbatdagi mavsumi yakuniga yetdi. "Real" va "Liverpul" o‘rtasidagi o‘yin ehtiroslarga, kutilmagan voqealarga boy berdi.
Uchrashuv juda yuqori tempda boshlanib ketdi. Ayniqsa, Klopp shogirdlari raqibga nisbatan jiddiy pressing ishlatib, madridliklarni ancha shoshirib qo‘yishdi. Ammo tajribali futbolchilardan tashkil topgan "Qirollik klubi" mudofaasi va darvozaboni o‘zlarini yo‘qotib qo‘ymasdan raqibning xavfli hujumlarini bartaraf etishga muvaffaq bo‘ldi.
"Qaymoqranglilar" o‘zlarining dastlabki xavfli hujumini raqibning xatosidan so‘ng yuzaga keltirishdi. "Liverpul" futbolchisi maydon markazida noaniq uzatma berishi oqibatida to‘pni Karvaxal egallab, Ronalduga yetkazdi. Krishtianu o‘ng qanotdan jarima maydonchasiga kirib kelib, o‘tkir burchak ostida kuchli zarba berdi. To‘p to‘sin ustidan o‘tib ketdi.
Bahsning 23-daqiqasida liverpulliklar hisobni ochishlari mumkin edi. Manening uzatmasidan keyin Milner o‘ng qanotdan oldinga o‘tdi va jarima maydonchasiga uzatma berdi. Firmino 11 metrli nuqta ustidan to‘pni egallab, zarba berdi. To‘p Ramosga tegib qaytdi. To‘pni egallagan Trent 12 metrlardan zarba berdi. Navasdan ajoyib seyv orqali jamoasini muqarrar goldan qutqardi.
Mana shunday yuqori suratlar ostida kechgan taymning birinchi yarmidan keyin noxush holatlar yuzaga keldi. Dastlab Muhammad Saloh, oradan ko‘p o‘tmasdan Daniel Karvaxal jarohat olib, ko‘zda yosh bilan maydonni tark etishdi. Misrlik futbolchining o‘yinni davom ettira olmagani "Liverpul" futbolchilariga salbiy ta’sir ko‘rsatdi shekilli, ular asosan himoyalanishga majbur bo‘lishdi.
Birinchi bo‘lim so‘ngida "Real" to‘pni raqib darvozasiga joyladi, ammo ofsayd tufayli gol inobatga olinmadi.
Ikkinchi bo‘limning debyuti Zidan shogirdlari uchun omadli keldi. "Liverpul" himoyachilari konsentrasiyani yo‘qotib qo‘yishi natijasida Isko birga-bir vaziyatda 14 metrlardan zarba bergandi. To‘p to‘singa tegib qaytdi. "Madrid" mana shunday ajoyib imkoniyatdan foydalana olmadi, ammo "Liverpul" posboni yosh bolalarcha xatoga yo‘l qo‘yib, raqibga yordam berib yubordi. "Real" hujumi paytida to‘pni xotirjamlik bilan egallab olgan Karius qo‘li bilan jamoadoshiga uzatma berayotganida, uning yonida turgan Benzema to‘p yo‘liga oyoq qo‘ydi. To‘p Karimning oyog‘idan darvozga kirib ketdi.
Mersisaydliklar teda hisobni tenglashtirishdi. Burchakdan yetkazilgan uzatmaga van Deyk bosh bilan zarba berdi. Sadyo Mane esa shundoqqina darvoza oldidan to‘pni darvozaga joylab qo‘ydi.
Buyog‘iga Zidanning yashirin taktikasi ishga tushdi. Isko o‘rniga Beyl tushdi va u o‘yin qahramoniga aylandi. Maydonga tushganiga 2 daqiqa bo‘lgan Garet dahshatli gol muallifiga aylandi. Chap qanotdan Marselo tomonidan yetkazilgan uzatmani uelslik futbolchi chalqancha uslubda raqib darvozasiga joylab qo‘ydi!
"Liverpul" yana tezda hisobni tenglashtirishi mumkin edi. Sadyo Mane 16 metrdan yerlatib zarba berdi. To‘p ustunga tegib qaytdi!!!
Uchrashuv tugashiga 6 daqiqa qolganida Beyl, yana ham aniqrog‘i, Karius o‘yinga nuqta qo‘ydi. Garet Beyl olis masofadan zarba berdi. Karius esa oddiy vaziyatda to‘pni o‘tkazib yubordi. To‘p darvozabonning qo‘lidan sirpanib, to‘rga borib tushdi.
Shu tariqa, "Real" o‘z tarixida 13-marta, ketma-ket uchinchi marta nufuzli sovrinni qo‘lga kiritdi.
Yevropa chempionlar ligasi.Final
"REAL MADRID" - "LIVERPUL" 3:1
26 may. 23:45. Kiyev."Olimpiyskiy" stadioni
Gollar: 1:0 – 51 Benzema, 1:1 – 55 Mane, 2:1 – 64 Beyl, 3:1 – 83 Beyl.
Real Madrid – Navas, Varan, Marselo, Karvaxal (Nacho, 37), Ramos, Modrich, Kazemiro, Isko (Beyl, 61), Kroos, Ronaldu, Benzema (Asensio, 89).
Liverpul – Karius, Lovren, Robertson, Aleksander-Arnold, van Deyk, Firmino, Veynaldum, Salax (Lallana, 30), Milner (Djan, 83), Mane, Xenderson.
Ogohlantirish: Mane (82).
Surxon
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
