Jahon chempionatining nimchorak final bosqichi doirasida so‘nggi uchrashuv chiroydan ko‘ra asabiy lahzalarga to‘la bo‘ldi.
Ehtiyotkor bo‘lim
Kolumbiya va Angliya terma jamoalari birinchi bo‘limda yo ehtiyotkor o‘yin namoyish qilishdi, yoki xatolar haddan tashqari ko‘p bo‘ldiki, natijada xavfli vaziyatlar u qadar ko‘p yaratilmadi. Balki, kolumbiyaliklarning asosiy pleymeykeri Xames Rodriges jarohat tufayli bugungi bahsda ishtirok eta olmagani ham bunga sabab bo‘lgandir.
Asabiy bo‘lim
Ikkinchi bo‘lim boshida kolumbiyalik himoyachi Karlos Sanches "qovun tushirdi". Yevropaliklar burchak to‘pini o‘yinga kiritayotgan paytda himoyachi shundoqqina hakamning ko‘z o‘ngida Harri Keynni qattiq quchoqladi, uni qo‘yib yubormadi, oxir-oqibat hujumchini yiqitdi. AQSHlik hakam Mark Geyger ikkilanib o‘tirmasdan 11 metrli nuqtaga ishora qildi. Keyn penaltidan zarbani markaz bo‘ylab yo‘lladi va hisobni ochdi. Harri JCH-2018dagi gollari sonini 6taga yetkazdi va "Oltin butsa" uchun asosiy da’vogarga aylandi.
Shundan so‘ng maydonda futboldan ko‘ra qo‘polliklar, asablar va sariq kartochkalar yuzaga keldi. Agar bu holatga barham berilmasa, qaysidir futbolchi maydonni erta tark etishi mumkin edi. Buni anglagan futbolchilar biroz o‘zlarini bosib olib, o‘yinning so‘nggi daqiqalarida futbol o‘ynay boshlashdi.
Xavfli Mina
O‘yin tugashiga 8 daqiqa qolganida Karlos Bakka maydon markazida angliyalik himoyachidan to‘pni olib qo‘yib, xavfli hujumga asos soldi. Faqat Xuan Kuadrado darvoza tomon aniq zarba bera olmadi. Uchrashuvga qo‘shib berilgan daqiqalarning uchinchisida kolumbiyalik hujumchi Uribe kutilmaganda 40 metrlardan o‘ta xavfli zarba yo‘lladi. "To‘qqizlik"ga kirayotgan to‘pni Jordan Pikford barmoqlarining uchi bilan maydon tashqarisiga chiqarib yubordi. Biroq bu vaziyat besamar ketmadi. Burchak to‘pi o‘yinga kiritilgan vaziyatda Yerri Mina bosh bilan darvozani ishg‘ol qildi. "Barselona" himoyachisi ketma-ket uchinchi o‘yindirki Kolumbiya safida gol urmoqda.
Qo‘shimcha bo‘limlar
Qo‘shimcha bo‘limlarning dastlabkisi Angliya terma jamoasi himoyaga o‘tib olgan bo‘lsa, Kolumbiya ko‘proq hujum tashkil qildi. Ikkinchi 15 daqiqalikda esa tashabbus inglizlar tomonida bo‘ldi. Ammo ekstra-taymlarda muxlislar gol ko‘rishmadi.
Penaltilar seriyasi
Penaltilar seriyasida dastlabki 5ta zarbani futbolchilar golga aylantirishdi. Xendersonning zarbasini Ospina ajoyib seyv bilan qaytarib, Kolumbiyaga yaxshi imkoniyat hosil qildi. Ammo Uribening zarbasi to‘singa tegib qaytdi. Inglizlar qolgan 2ta zarbadan unumli foydalanishdi. Angliyaliklar posboni Pikford kolumbiyalik hujumchi Bakkaning zarbasini qaytardi. Natijada Angliya terma jamoasi JCHlari tarixida ilk marta penaltilar seriyasida g‘alaba qozonib, chorak finalga yo‘l oldi. Ular bungacha 3 marta "lotereya"da yutqazishgandi.
Angliyani chorak finalda Shvesiya terma jamoasi kutib turibdi.
JCH-2018. Nimchorak final
KOLUMBIYA - ANGLIYA 1:1 (0:0, 1:1, 0:0, 0:0), penaltilar seriyasi - 3:4
Gollar: 0:1 – 57, penalti Keyn, 1:1 – 90 Mina.
Kolumbiya – Ospina, Mina, Moxika, Aryas (Sapata, 116), Sanches, Lerma (Bakka, 62), Sanches (Uribe, 79), Kuadrado, Barrios, Kintero (Muriel, 88), Falkao.
Angliya – Pikford, Uoker (Reshford, 113), Stounz, Yang (Rouz, 102), Maguayr, Alli (Dayer, 81), Lingard, Sterling (Vardi, 88), Xenderson, Trippyer, Keyn.
Ogohlantirishlar: Barrios (41), Aryas (52), Sanches (54), Xenderson (56), Falkao (63), Bakka (64), Lingard (69), Kuadrado (118).
Penaltilar seriyasi:
Falkao (1:0) — Keyn (1:1)
Kuadrado (2:1) — Reshford (2:2)
Muriel (3:2) — Xenderson (3:2, darvozabon)
Uribe (3:2, to‘sin) — Trippyer (3:3)
Bakka (3:3, darvozabon) — Dayer (3:4)
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
