O‘zbekistonlik xalqaro toifadagi sport ustasi, xalqaro musobaqalar g‘olibi, 25 yoshli Jamshid Kenjayev olamdan o‘tdi.
8 avgustdan 9 avgustga o‘tar kechasi taxminan soat 00:25 larda Toshkent shahri Yunusobod tumanidagi “Aurum 898” tungi klubi oldida janjal chiqqan. Bu haqda IIBB Matbuot xizmati xabar berdi.
Klub qo‘riqchisi va mehmon o‘rtasida chiqqan mojaro natijasida uch kishi (ularning ikki nafari qo‘riqchilar) pichoqdan olingan jarohatlar bilan shahar klinik shifoxonasiga yotqizilgan.
Ma’lumotga ko‘ra, Jamshid Kenjayev pichoq bilan muassasaga kirishga uringan. Qo‘riqchilar bunga yo‘l qo‘ymagani uchun Jamshid ulardan biriga pichoq bilan zarba bergan. So‘ng mehmon va qo‘riqchi o‘rtasida janjal chiqqan. Natijada Jamshid ko‘plab tan jarohati olgan va jarohatlari sabab bugun ertalab shifoxonada vafot etgan.
Jamshidga tan jarohatlari yetkazishda ayblanib, muassasaning uch nafar xodimi hibsga olingan. Ular – 24 yoshli Saidazim K., 29 yoshli Shodali K. va 26 yoshli Jahongir YA. Klub qo‘riqchisi bo‘lib ishlovchi, hodisaning ikki nafar ishtirokchisi 41 yoshli Sherali I. va Abdurasul M. olgan jarohatlari natijasida shifoxonada qolmoqda.
Mazkur holat yuzasidan Toshkent shahar prokuraturasi tomonidan O‘zbekiston Jinoyat Kodeksining 97-moddasi bilan jinoyat ishi qo‘zg‘atilgan.