Bugun poytaxtimizdagi “O‘zbekiston” mehmonxonasida 1-4 dekabr kunlari Toshkentda bo‘lib o‘tadigan futzal bo‘yicha U-20 Osiyo chempionati saralash bosqichidan oldin matbuot anjumani tashkil etildi. Matbuot anjumanida Eron, Afg‘oniston, Turkmaniston, Tojikiston, Qirg‘iziston va O‘zbekiston terma jamoalari bosh murabbiylari ishtirok etishdi.
O‘zbekiston terma jamoasi bosh murabbiyi Bahodir Ahmedov jurnalistlar savollariga javob berar ekan, jumladan, shunday dedi: “U-20 Osiyo chempionati saralashi poytaxtimizda o‘tkazilayotganidan mamnunmiz. Barcha ishtirokchi terma jamoalarni yurtimizda ko‘rib turganimizdan juda xursandmiz. O‘ylashimcha, musobaqa qiziqarli va kurashlarga boy tarzda o‘tadi. Biz mazkur terma jamoaga futzalchilarni Toshkentda yoshlar o‘rtasida bo‘lib o‘tgan musobaqalar davomida saralab oldik. Umid qilamanki, biz ishonch bildirayotgan yigitlar ishonchimizni oqlashadi. Menga terma jamoada Nodir Eliboyev va Rustam Umarovlar yordam berishadi. Birgalikda bir jamoa bo‘lib oldimizga qo‘ygan maqsadga erishamiz, deb ishonaman”.
Shuningdek, qolgan terma jamoalar bosh murabbiylari ham musobaqa haqida, unga tayyorgarlik jarayonlari to‘g‘risida o‘z fikrlarini bildirib o‘tishdi.
Abdulrazzoq Momrak (Afg‘oniston terma jamoasi bosh murabbiyi): “Toshkentda tashkil etilayotgan mazkur musobaqada ishtirok etayotganimizdan juda xursandmiz. Biz musobaqa oldidan Tojikistonda yig‘in tashkil qildik, o‘rtoqlik o‘yinlari o‘tkazdik. Yetarlicha tayyorgarlik olib bordik. Endi rasmiy o‘yinlarda natijaga erishmoqchimiz”.
Guvanch Kanayev (Turkmaniston terma jamoasi bosh murabbiyi): “Barcha ishtirokchi terma jamoalarga omad tilayman. Bizda bu yoshdagi futzalchilar o‘rtasida chempionat yo‘q. Shu sababli biz musobaqalar tashkil etib, o‘zini har tomonlama ko‘rsata olgan futzalchilarni saralab oldik. Osiyo chempionati saralash bahsiga tayyormiz, deb ayta olaman”.
Hamid Shandiziy Muqaddam (Eron terma jamoasi bosh murabbiyi): “Biz mazkur musobaqa oldidan Argentinada o‘tgan yoshlar o‘rtasidagi Olimpiada bahslarida ishtirok etdik. O‘sha o‘yinlarda jamoamiz asosini anchagina shakllantirib oldik. Guruhdagi raqiblarimiz o‘ziga yarasha kuchli jamoalar. Osiyo chempionati yo‘llanmasini qo‘lga kiritish uchun bor kuchimiz bilan harakat qilamiz”.
Mustafo Afshariy (Tojikiston terma jamoasi bosh murabbiyi): “Men asli Erondanman. Tojkistonda futzalni rivojlantirish uchun meni taklif qilishgan. Oldimizga qo‘yilgan maqsadga erishish uchun astoyidil kurash olib boramiz. To‘g‘ri, oson bo‘lmaydi, lekin biz kurashlarga tayyormiz”.
Nurjan Jetibayev (Qirg‘iziston terma jamoasi bosh murabbiyi): “Mening fikrimcha, musobaqa ancha qiziqarli o‘tadi. Barcha jamoalarning imkoniyatlari teng deb hisoblayman. 6ta terma jamoa, 3ta yo‘llanma mavjud. Eng munosiblar Osiyo chempionatiga borishiga ishonaman”.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
