2 dekabr kuni Namangan shahridagi “Markaziy” o‘yingohning anjumanlar zalida “Navbahor” klubi bosh murabbiyi Andrey Kanchelskis OAV xodimlari uchun matbuot anjumani uyushtirdi. Unda “lochinlar” ustozi jamoaning bu yilgi ishtiroki, kelasi mavsumdagi rejalari, tarkibdagi o‘zgarishlar borasida to‘xtalib o‘tdi. Quyida Andrey Kanchelskisning fikrlarini e’tiboringizga havola etamiz.
Jamoa muvaffaqiyati, intizom, tarkibdagi o‘zgarishlar
Assalomu alaykum, aziz jurnalistlar! Avvalo tabrik uchun barchangizga o‘z minnatdorchiligimni bildiraman. “Navbahor”ning 3-o‘rinni qo‘lga kiritishida jamoamizga yaxshi sharoitlarni yaratib bergan Namangan viloyat hokimi Xayrullo Hayitbayevich Bozarov, klub rahbariyati, mendan oldin faoliyat yuritgan va hozirgi murabbiylar shtabi vakillari hamda bu yil “Navbahor”da to‘p surgan barcha futbolchilar va klub ishchi-xodimlari, shuningdek, “Navbahor”ni qo‘llab-quvvatlab turgan barcha muxlislarning munosib hissalari bor. Fursatdan foydalanib, ularga o‘z minnatdorchiligimni bildiraman. Ishqibozlarning qo‘llab-quvvatlashlari ham jamoamizning g‘alabalarida muhim omil bo‘ldi.
Endi yangi mavsumda oldimizga yanada jiddiy vazifa qo‘yiladi. Ammo nafaqat O‘zbekiston, balki, Rossiyada ham oldin duch kelinganidek, stadion infratuzilmasi, ishga bo‘lgan munosabat, aeroport va mehmonxonalar xizmatlari yanada rivojlanishini xohlardim. Shuningdek, maydonlar ham sifatli bo‘lsa, ancha yaxshi bo‘lardi.
Bundan tashqari, futbolda intizom yuqori o‘rinda turadi va hamma unga rioya etishi lozim.
Umuman olganda, barcha Yevropa mamlakatlarida intizomga qat’iy tarzda rioya etishadi hamda shuning uchun ham “ko‘hna qit’a” klublari va terma jamoalari ko‘proq muvaffaqiyatga erishadi. Bunga misol tariqasida nemislar va italyanlarni keltirish mumkin. Germaniya hamda Italiya terma jamoalari bejizga jahon va Yevropa chempionatlarida munosib ishtirok etishmagan.
Klubda barcha – rahbariyatdan tortib, farroshgacha barcha intizomga riyao qilsa, hammasi ijobiy bo‘ladi.
“Navbahor”ni nafaqat O‘zbekiston, balki butun dunyoda bilishlari uchun tashkiliy ishlar yaxshi yo‘lga qo‘yilishi lozim. Buning uchun esa jamoa chempionlik unvonini qo‘lga kiritishi, Osiyo Chempionlar Ligasi musobaqasida o‘ynashi lozim. Nima uchun “Real” Yevropa Chempionlar Ligasida ko‘p marotaba g‘alaba qozongan? Chunki mazkur klubda tashkiliy ishlar yaxshi yo‘lga qo‘yilgan.
Tarkibni shakllantirishni kechadan, ya’ni bu yilgi mavsum o‘z yakuniga yetishi bilan boshlab yubordik. Biz bu borada puxta o‘ylagan holda, yurakdan ish olib boryapmiz.
Uchinchi o‘rin ham yomon natija emas. Lekin o‘yin sifati borasida muammo bor. Masalan, shogirdlarim kam gol urishdi. Bunga esa ko‘plab omillar sabab bo‘ldi.
Safimizdagi 12 nafar futbolchi bilan mavsumning so‘nggi qismini yakunlab oldik. Shunday bo‘lsa-da, safardagi bahslarda “Lokomotiv” va “Paxtakor” klublariga munosib qarshilik ko‘rsata oldik. “Sherlar”dan ochko olishga muvaffaq bo‘ldik. Buning uchun yigitlarga o‘z minnatdorchiligimni bildiraman va Xudoga shukr qilaman.
Ammo ayrim shogirdlarim maydonga ishtiyoqsiz ravishda tushishdi va ular futbol o‘ynashmadi. Bunga bu yil guvoh bo‘lganligimiz ham yaxshi bo‘ldi hamda o‘sha o‘yinchilar bilan shartnomani yakunladik. Futbolga munosabat va o‘yin sifatida ham o‘zgarish bo‘lishini istayman.
Futbol muxlislar uchun o‘ynaladi. Masalan, kecha Rossiya Premyer-ligasi doirasida “Enisey” – “Axmat” bilan o‘ynadi. Mazkur o‘yinda stadion deyarli bo‘m-bo‘sh edi. Bunday sharoitda futbol o‘ynashning unchalik ham qizig‘i qolmaydi.
Bizga ishtiyoq bilan o‘ynaydigan futbolchilar kerak.
Bu yilgi jamoadan tarkibda kimlar qolishi borasidagi masalani hal etdik.
Albatta, biz jamoaning muvaffaqiyatlariga munosib hissa qo‘shishni istagan mahoratli legionerlarni tarkibga jalb etamiz. Bu borada muzokaralar olib borilyapti. Rossiyadan ham futbolchi olib kelish oson emas. Bu yerning mentaliteti boshqacha.
Bu yil jamoada Serbiya va chernogoriyalik futbolchilar to‘p surishdi. Mazkur o‘yinchilar 27 noyabr kuni o‘z buyumlarini yig‘ishtirib, jamoani tark etishdi. Tarkibda kam o‘yinchisi bo‘lgan klub safini 2-3 nafar o‘yinchi tark etsa, bu juda bilinadi. Bunga so‘nggi turdagi “Lokomotiv”ga qarshi kechgan bahsda o‘zinglar ham guvoh bo‘ldinglar. “Paxtakor” va “Lokomotiv” klublari a’zolari bilan bizning ayrim futbolchilarning saviyasi qandayligini o‘zinglar ko‘rdinglar.
Jamoaga faqat pul uchun keladigan xorijliklar bizga kerak emas.
Barchamiz ham pul topishni istaymiz. Lekin buning uchun shunga yarasha mehnat qilish lozim.
Ayrim futbolchilar kichik jarohat bilan ham maydonga tushib, klub sha’ni uchun to‘p surishdi. Darko Stanoyevich esa jarohatim bor, deya ko‘plab o‘yinlarni o‘tkazib yubordi.
Uch nafar legioner, ya’ni himoyachilar – Tomislav Payovich va Darko Stanoyevich hamda hujumchi Darko Nikach jamoani rasman tark etishdi.
Yangi yildan keyin boshlanadigan o‘quv-mashg‘ulot yig‘iniga 2 nafar yoshlar va 1 nafar U-18 jamoasidagi futbolchilarni jalb etganmiz va ularni ko‘rikdan o‘tkazamiz. Afsuski, qolgan futbolchilarning saviyalari tarkibda to‘p surish uchun unchalik javob bermaydi.
Shuningdek, Superliganing boshqa klublarida o‘ynayotgan asli namanganlik bo‘lgan futbolchilarni ham jamoaga jalb etish niyatidamiz.
Oldiga jiddiy maqsadlarni qo‘ygan jamoada talablar ham jiddiy bo‘ladi. Klubda qulay sharoitlar yaratilsa, futbolchilarning o‘zlari o‘ynash uchun “Navbahor”ga keladi.
To‘g‘ri, Azizbek Turg‘unboyev va Oston O‘runovga boshqa klublardan takliflar bor hamda bu normal holat, deb hisoblayman. Albatta ular bilan bu borada muzokara olib borilyapti va klub rahbariyati bilan birgalikda ularni “Navbahor”da olib qolishga intilyapmiz hamda umid qilamanki, ular jamoada qolishadi.
Shuningdek, darvozabon Akbar To‘rayevda ham boshqa klublardan takliflar bor. Uning o‘yini menga yoqadi va uni ham klub rahbariyati jamoada olib qolsa, xursand bo‘lardim.
Umuman olganda, jamoaning o‘zagi saqlab qolinadi.
Mavsum arafasida jamoamiz tarkibidagi o‘zgarishlar borasida to‘liqroq bilib olasizlar.
Murabbiylar shtabi, yangi mavsumga tayyorgarlik
Aleksey Ilich Belenkov kelasi mavsumda ham men bilan birga murabbiylar shtabida ishlaydi. Murabbiylar shtabida yangi mavsumda kichik o‘zgarish bo‘lishi mumkin, xolos.
Yangi mavsumga tayyorgarlikni qayerda, qaysi maydonda olib borish, sparring – raqiblar izlash borasida ham bosh qotiryapmiz. To‘g‘risini aytsam, ta’til yaxshimi yoki yomonmi, bilmadim.
Mavsumga tayyorgarlikni yanvar oyidan boshlaymiz.
Dastlabki o‘quv - mashg‘ulot yig‘inini Namanganda olib borishni rejalashtiryapmiz. Umid qilamanki, mashg‘ulotlar o‘tkazishimiz uchun bizga sifatli maydon tayyorlab berishadi. Chunki bu yerda trenajyor zali, basseyn bor. Shuningdek, yashash va ovqatlanish sharoitlari ham yaxshi.
Yaxshi sharoitlar yaratib berilsa, bo‘lajak mavsumga tayyorgarlikning ilk o‘quv-mashg‘ulot yig‘inini shu yerda olib borishni rejalashtiryapmiz.
Chunki bunda mablag‘dan ham iqtisod qilamiz. Bundan tashqari, endi o‘yinchilar bilan jiddiy tarzda ish olib boramiz va talablar ham o‘zgacha bo‘ladi. Klub rahbariyati hamda muxlislar bizdan ijobiy natijani talab qilishyaptimi, biz ham futbolchilarga jiddiy talablar qo‘yamiz.
Milliy terma jamoamiz, kuchli oltilikdagi jamoalar
O‘zbekiston milliy terma jamoasining faqatgina O‘zbekistondagi 2ta o‘rtoqlik uchrashuvini kuzatdim hamda ushbu 2 ta o‘yindan xulosa chiqarish qiyin. O‘zbekistonda mahoratli va yaxshi futbolchilar ko‘p.
O‘zbekiston futboli saviyasi sobiq ittifoq mamlakatlari orasida Rossiya hamda Ukrainadan keyin 3-o‘rinda turadi.
Milliy terma jamoangizda yangi murabbiy ish boshladi, yangicha qarash, yangicha taktika. O‘zbekiston termasining oldin Osiyo kubogida qanday natijaga erishishini kutaylik. Keyin terma jamoaning o‘yinidan qandaydir xulosa chiqarsa bo‘ladi.
Biz kuchli oltilikdan o‘rin olgan klublarga qarshi to‘p surdik. Mazkur jamoalardan albatta “Lokomotiv” va “Paxtakor” klublarining saviyasi yuqori. Shuningdek, menga “Bunyodkor” hamda “Buxoro” jamoalarining ham o‘yini yoqdi. “Bunyodkor” va “Nasaf” klublarida moliyaviy muammolar yuzaga kelmaganida, mazkur jamoalar chempionatda bundan ham yaxshiroq ishtirok etishi mumkin edi.
Ta’kidlash joizki, O‘zbekistondagi klublar tarkibida bundan ham kuchli jamoalarda o‘ynashga qodir bo‘lgan ko‘plab futbolchilar bor.
Qiyin o‘yinlar, Superliga formati
Mening qo‘l ostimda o‘tkazilgan 7 ta o‘yindan men uchun eng qiyini “Navbahor” murabbiyi sifatidagi debyut uchrashuvim bo‘lgan Namangandagi “Buxoro” (26-tur, 1:0) hamda “Bunyodkor” (30-tur, 1:0) jamoalariga qarshi kechgan bahslar bo‘ldi.
Buxoroliklarga qarshi kechgan uchrashuvdan oldin qo‘l ostimdagi futbolchilarining qanday imkoniyatlarga ega ekanliklarini bilmasdim. Xudoga shukr, yigitlar ishonchni oqlashdi hamda debyut o‘yinim muvaffaqiyatli kechib, zafar quchdik.
“Bunyodkor” bilan bo‘lgan bahsdan oldin “Navbahor” 3, poytaxtliklar esa 4-o‘rinni egallab turishgandi. Aytish lozimki, mazkur o‘yin 3-o‘rin taqdirini deyarli hal qilardi. O‘sha uchrashuvda ham g‘alaba qozona oldik va bronza medali uchun katta qadam tashladik.
Chempionat formatining men uchun ahamiyati yo‘q. Boisi, jamoaning oldiga jiddiy maqsad qo‘yilsa va har bir o‘yinda g‘alaba qozonsa, o‘z oldiga qo‘ygan maqsadga yetadi.
Viloyat hokimining futbolga qiziqishi, jamoa muxlislari
Namangan viloyat hokimi Xayrullo Bozarov bilan ko‘p marotaba suhbatlashdim. Xayrullo Hayitbayevich futbolga qiziqadi, “Navbahor” uchun muxlislik qiladi va qayg‘uradi. Shunday insonlarning borligi yaxshi.
Fursatdan foydalanib, Xayrulla Hayitbayevichga sog‘lik tilab qolaman va hamkorligimiz kelasi yili ham davom etishini tilab qolaman.
Jamoamiz muxlislari to‘g‘risida to‘xtaladigan bo‘lsam, Shotlandiyaning “Glazgo Reynjers” klubida o‘ynaganimda, jamoa 4-divizionda ishtirok etardi. Bu esa havaskorlar ligasiga teng. Shunda ham jamoaning uy stadioniga 40 ming muxlis tashrif buyurardi. Premyer- ligada 1,5 ming, 4-ligada 40 ming. Tasavvur qilyapsizmi?
Namanganda ham futbolni sevishlari va ishqibozlarning talabchan ekanliklariga ga guvoh bo‘ldim. Albatta talabchan bo‘lish kerak. Shunday muxlislarga ega jamoaning a’zosi esa shunga yarasha o‘yin ko‘rsatishi shart.
Xalqaro o‘rtoqlik o‘yinlari, bolalar futboli
“Navbahor” klubining xalqaro o‘rtoqlik uchrashuvlari o‘tkazishi yaxshi fikr. Angliyaning “Everton” klubi bilan yaxshi munosabatdaman.
Shuningdek, Rossiya klublari, mabodo Qrimda o‘quv-mashg‘ulot yig‘ini o‘tkazadigan bo‘lsak, Simferopolning “Tavriya” jamoasi bilan nazorat-sinov bahsi o‘tkazishimiz ham mumkin.
Faqatgina bu yerda muammo Angliya, Rossiya va O‘zbekiston chempionatlarining o‘yinlar taqvimiga bog‘liq.
Bolalar futbolini rivojlantirish uchun ularga ham yaxshi sharoitlar yaratish shart. Sifatli maydon va qulay sharoitlar yaratish kerak. Shunda O‘zbekistonda bolalar futboli yanada rivojlanadi.
“Navbahor” PFK matbuot xizmati
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
