Mazkur qarama-qarshilik tarixida hozirga qadar 17 uchrashuv o‘tkazilgan.
AGMK "Andijon"ga qarshi o‘yinlarda 10 marotaba zafar quchgan. Yubiley 10-g‘alabaga yaqindagina Andijonda o‘tgan birinchi davra doirasidagi bahsda erishilgandi. "Andijon" esa jamoamiz ustidan 4 bor g‘alaba nashidasini surishga muvaffaq bo‘lgan. Mazkur g‘alabalarga "Andijon" jamoasi 2008, 2009, 2010 va 2011 yillardagi mavsumda, o‘z uyida kechgan bellashuvlarda erishgan. Ya’ni, AGMK Olmaliqda "Andijon"ga hech bo‘yin egmagan. Ushbu jamoalar o‘rtasidagi qolgan 3 uchrashuvda esa durang natijasi qayd etilgan. Mazkur murosa yo‘liga kelingan 3 bellashuvdan ikkitasi (2014, 2016) Olmaliqdagi bahsda sodir bo‘lgan. Andijonda esa jamoalar bir marotaba, ya’ni 2014 yilgi mavsumda durang qayd etishgan. Qizig‘i, 2014 yilgi mavsumdagi har ikkala bahsda ham g‘olib nomi aniqlanmagan.
Shu tariqa mazkur qarama-qarshilikdagi sezilarli ustunlik jamoamiz tarafida. To‘plar nisbati bo‘yicha ham ko‘rsatkich tabiiyki AGMK foydasiga xizmat qilmoqda: 30-20.
Mazkur o‘yinga jamoalar ikki xil kayfiyatda kelishmoqda. Superliganing ikkinchi davrasidagi ilk turda jamoamiz Bekobodda hakamlik qurboniga aylanib mag‘lubiyatga uchragan bo‘lsa, "Andijon" o‘z uyida kechgan bahsda "Buxoro"ni (2:0) taslim etdi. E’tiborli tarafi, ikkinchi davraga tayyorgarlik bosqichi doirasida jamoamiz ham "Buxoro"ga qarshi nazorat o‘yinini o‘tkazgan va xuddi "Andijon" kabi 2:0 hisobidagi g‘alabani tantana qilgandi. Aleksandr Xomyakov jamoasi rossiyalik mutaxassis qo‘l ostida o‘zining ilk g‘alabasini o‘tgan turda rasmiylashtirdi. Bu g‘alaba "Andijon" uchun mavsumdagi ikkinchisiga aylandi.
AGMK - "Andijon" uchrashuvi qiziqarli kechishiga bir qancha omillar mavjud. Birinchi navbatda har ikkala jamoaga ham ochko suv va havodek zarur. Shuningdek, jamoalar turnir jadvalida bir xil ochko jamg‘argan holda "qo‘shni"ga aylanishgan. Bu esa mazkur to‘qnashuv qadrini ikki hissaga oshiradi va Olmaliqdagi bahs tabiiyki 6 ochkolik o‘yinga aylanadi.
Jamoamiz "Andijon" ustidan birinchi davradagi muvaffaqiyatni takrorlash uchun jiddiy bel bog‘lagan.
Qayd etish kerakki, bu uchrashuvda jamoamizni bosh murabbiy Mirjalol Qosimov diskvalifikasiya tufayli boshqarib tushmaydi. "Metallurg" bilan o‘yinda olingan qizil kartochka evaziga Mirjalol Qosimov o‘yinni tribunada kuzatadi.
Mazkur o‘yinda jamoamiz o‘zining an’anaviy sariq rangli libosda harakat qiladi. "Andijon" esa oq libosda maydonga tushadi.
Eslatib o‘tamiz, AGMK - "Andijon" uchrashuvi 31 iyul kuni Olmaliqdagi OKMK "Markaziy" stadionida soat 19:00da boshlanadi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
