Bugun Toshkent shahrida ilk bor MMA bo‘yicha GFC 20 turniri bo‘lib o‘tdi. Mazkur turnirda jami 13ta jang o‘tkazildi.
7 nafar hamyurtlarimiz mazkur turnirda oktagonga chiqishdi va 5 nafari g‘alaba qozongan bo‘lsa, 2tasi mag‘lub bo‘ldi.
Kechaning ikkinchi bahsida hamyurtimiz Axliddin Mirzadavlatov Ozarbayjon vakili Ja’far Ismiyevga qarshi jang qildi.
Uchrashuvning boshidan tashabbusni olgan Axliddin raqibini birinchi raundning to‘rtinchi daqiqasida bo‘g‘ish usuli bilan mag‘lub etdi.
Musobaqaning uchinchi jangida hamyurtimiz Jahongir Jumayev fransiyalik Devid Somga qarshi oktagonga chiqdi. Hamyurtimiz jang boshidan raqibini “yakson” qilishni boshladi, bu esa o‘z navbatida jangni erta yakunlashiga sabab bo‘ldi. Jumayev birinchi raund nokaut evaziga g‘alaba qozondi.
To‘rtinchi jangda yana bir hamyurtimiz Avliyoxon Hamidov braziliyalik Luiz Filyoga qarshi jang qildi.
Jang to‘liq uch raund davom etdi va hakamlarning qarori bilan hamyurtimiz navbatdagi g‘alabasini qo‘lga kiritdi.
Musobaqaning oltinchi bahsida hamyurtimiz Jamshid Rahmonaliyev Surinam vakili Klayd Brunsvikga qarshi jang qildi. Bu bahs har ikki sportchi uchun MMAdagi debyut jangi bo‘ldi. Jangda ustunlikka ega bo‘lgan hamyurtimiz kutilmaganda jiddiy zarbani o‘tkazib yubordi va nokautga uchradi. Bu GFC 20 kechasidagi hamyurtlarimizning ilk mag‘lubiyati bo‘ldi.
GFC 20 kechasining sakkizinchi jangida hamyurtimiz Nursulton Ro‘ziboyev ukrainalik tajribali jangchisi Artem Shokaloga qarshi bahs olib bordi.
Jangda to‘liq ustunlikka ega bo‘lgan hamyurtimiz uchinchi raundda texnik nokaut evaziga g‘alaba qozondi.
Musobaqaning yana bir jangida hamyurtimiz Amin Ergashev beleorussiyalik raqibi Sergey Alekseevichga qarshi jangning 11-soniyasidayoq kutilmaganda nokautga uchradi.
Tajribali jangchimiz Muzaffar Rajabov tunislik Aladin Ben Xalimga qarshi jang oktagonga ko‘tarildi. Jang birinchi raundning birinchi daqiqasida yakunlandi. Hamyurtimiz og‘rituvchi usul bilan raqibini mag‘lub etishga erishdi.
Suratlar muallifi: Jaloliddin Qobiljonov