«Liverpul» o‘yini xususida rosa yozilyapti. «Klopp bandasi» chindan ham super. Shunchaki super!
Biroq, bilasizmi, nega liverpulliklarning mana shunday rekordlari boshqa chempionat vakillariga qaraganda jarangliroq yangrayapti?
Bunga sabab – APL darajasi. Ha, Tumanli Albion futboli bo‘lgani uchun ham uning qiymati oshiribroq aytilmoqda.
APL – birinchi raqamli chempionat.
Moliyaviy tomondan ham, bahslarning muhimlik tomonidan ham. Yevrokuboklarni yengayotgani esa, shu paytgacha davom etgan munozaralarga chek qo‘ydi. Terma jamoasi ham yaxshiroq natija qayd etsa, tamom, barcha jabha zabt etilgan bo‘ladi.
APL – go‘zal birinchilik.
Uning futboli borgan sari go‘zallashib bormoqda. Chiroyli futbolni izlamoqchi bo‘lganlar APLning oddiy o‘yinlariga boqib qo‘yishsa – bo‘ldi! Chempionshipdagi o‘yinga ko‘zingiz tushib qolsa ham, undagi shiddatga hayron qolasiz. Chunki APLga chiqish uchun jamoalar oddiy o‘ynab yo‘l olishlari mumkinmi?!
APL – shiddatli bahslar majmuasi.
Ayting, qaysi chempionatda chempionligi 99% hal bo‘lgan jamoaning kuchli to‘rtlikka kirolmayotgan jamoa bilan o‘yini bu qadar muhabbat bilan ko‘riladi?! “Yuventus”, PSJ, “Real” va “Barsa”ning chempionatdagi rekordlari shuncha tahlil qilinishi mumkinmi?
APL – oxirigacha tomosha qilinadigan chempionat.
Ha, «Liverpul», bundan ikki yil oldin “Manchester Siti” katta farq bilan oldinga chiqib ketganida ham... oxirigacha ko‘ramizku o‘yinlarini. Chunki boshqalarning qay bir o‘rin uchun kurash olib borayotgani boisidan kuzatishga majburmiz. Ular esa, chempionlik hal bo‘lgandan so‘ng ham oldingidek o‘ynashga majburlar. Zo‘r, a ?!
APL – Top-klublari eng ko‘p chempionat.
Kuchli oltilik, keyin kuchli yettilik degan ta’riflar faqat shu maskanda bor. Ba’zi chempionatlarda hatto “ikkinchisi” ham yo‘q. Mutlaq chempion bor va boshqalar. Top-klublari ko‘p bo‘lgach, har tur kamida ikki-uch o‘yin markaziy bahsga aylanadi.
APL – g‘oyalar maskani.
Top-klublarga top-murabbiylarnig kelishi turgan gap. Ammo kuchli yettilikdan pastdagilar boshida ham o‘z so‘ziga ega murabbiylar ishlayotganiga nima deysiz endi?! Har bir murabbiy chempionatga o‘zidan nimadir olib keladi. G‘oyalar ko‘paysa, futbol ham yanada tezroq o‘sadi. Taktik yurishlar ko‘paygani sari, yulduz jamoalar ko‘payadi. Futbol daholari shunday davrda yetishib chiqadilar. Mahalliy yigitlarning porlashi terma jamoa ravnaqiga hissa qo‘shadi. Murabbiylar futbolga futbolchilardan ko‘proq ta’sir o‘tkazayotgan zamonda yashayapmiz. Va buning eng yuqori cho‘qqisi APL bo‘lib turibdi.
APL – ertaklar manzili. “Lester”dan keyin ertak davom etmaydi, deb o‘ylaganmidingiz? Yo‘q, 1001 kundan beri “Enfild”da yengilmayotgan Klopp ertak yozmay nima yozyapti? "Ming bir kecha"ni ko‘rayotgandek bo‘lmayapsizmi? O‘ttiz yillik og‘ir tanaffusdan so‘ng liverpullik ishqibozning chempionlik qo‘lga kiritilgan soniyalardagi holatini ko‘rgingiz kelmayaptimi? Qo‘shilishib yig‘lashmaysizmi? Men, ha!
APL – futbol vatani! Tamom.
Xayrulla HAMIDOV
Жалолиддин Қобилжонов
Холис таҳлилчи блоги
Фурқат Қурбонов
Ҳасанали ота
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
