Xabarinngiz bor, bir necha kun avval Jizzaxning “So‘g‘diyona” klubi braziliyalik yarim himoyachi Elivelto Ribeiro Dantos bilan shartnoma imzolagani haqida xabar bergan edik. Saytimix muxbiri Jaloliddin Qobiljonov futbolchi bilan bog‘lanib qisqa suhbat uyushtirishga erishdi.
– Futbol muxlislarimiz siz haqizda deyarli ma’lumotga ega emaslar. Avvalo o‘zingiz haqingizda to‘liqroq gapirib bersangiz.
– Men oddiy yigitman. Men bu yerga agentim orqali keldim. Yangi mavsumda qo‘limdan kelgancha “So‘g‘diyona”ga sovrinlar yutishda yordam bermoqchiman va jamoadoshlarim ham bunga tayyor. Bu jamoadagi rasmiy debyut uchrashuvimni intiqlik bilan kutyapman. Muxlislarni xursand qilishga tayyorman.
– “So‘g‘diyona” ga kelib qo‘shilishingizdan avval o‘zbek futboli haqida eshitganmidingiz?
– Ha, men Qozog‘iston chempionatida to‘p surganman, shu sababli O‘zbekiston chempionati haqida bilaman. O‘zbek futbolchilari haqida esa yo‘q. Ammo o‘ylaymanki, ular kuchli futbolchilar. Qolaversa, chempionat ham qizg‘in o‘tadi degan umitdaman.
– Jamoa bilan necha yillik shartnoma imzoladingiz?
– Men “So‘g‘diyona”ga erkin agent sifatida kelib qo‘shildim va 1 yillik shartnoma imzoladim.
– Internetda siz haqingizda ma’lumotlar kamligi sababli ko‘p narsalarni bila olmadim. Faoliyatingizni qaysi jamoada boshlagansiz? Qozog‘iston chempionatiga kelishingizdan avval qaysi klublarda to‘p surgansiz?
– Faoliyatimni Braziliyaning quyi divizionidagi “Imperila Rj” jamoasida boshlaganman. Shunnigdek, Litva chempionatida ham harakat qilganman. Litva chempionatida “Jalgris Vilnyus”da 3 yil o‘ynaganman (2015-2018 yillar). U yerda 2 marta mamlakat chempioniga aylanganmiz va bir marta Litva superkubogini qo‘lga kiritganmiz. Qozog‘iston chempionatida “Taraz” klubi sharafini himoya qilganman.
– “So‘g‘diyona”dagi faoliyatingizda omad tilaymiz!
– Rahmat!