"Rostov" hujumchisi Eldor Shomurodov Rossiya chempionatining ushbu mavsumida to‘purarlar poygasida 11ta gol bilan ikkinchi o‘rinda bormoqda. O‘zbekistonlik futbolchi Sportbox.ru saytiga bergan intervyusida mavsum to‘purari bo‘lish istagi borligini ma’lum qildi.
— Xo‘sh, Eldor, futbolsiz yashash qiyinmi?
— Nimasini aytasiz? G‘alati hissiyot. Bunday bo‘lishi mumkinligini tasavvur ham qilmagan edim.
— Rostovdamisiz?
— Ha, xotinim bilan birga.
«Barchasi tez orada yakunlanadi, deb umid qilaman»
— O‘zini yakkalash rejimiga amal qilyapsizmi?
— Ha, uyda o‘tiribmiz. Faqat oziq-ovqat do‘koniga chiqyapmiz.
— Shaharda pandemiya bilan bog‘liq vaziyat qanday?
— Hamma joyda bir xil bo‘lsa kerak. Faqat supermarketlar va dorixonalar ishlayapti. Odamlar faqat o‘z uylariga atrofiga chiqishyapti.
— Bu uzoq vaqt davom etarmikin?
— Umid qilaman, yo‘q. Barchasi tez orada yakunlanadi, deb umid qilaman.
— Uyda shug‘ullanyapsizmi?
— Ha, turli individual mashqlarni bajaryapman, mushaklarimga yuklama beryapman. Har birimizga dastur berishgan.
— Ortiqcha vazn to‘plashdan xavotir olmaysizmi?
— Yo‘q, vazn borasida menda muammo bo‘lmagan. Hattoki 1-2 kilo ortiqcha vazn to‘plasam, tezda undan voz kecha olaman.
— Odatdagidek taomlanyapsizmi?
— Ha.
— «Rostov»ning boshqa futbolchilari bilan aloqada bo‘lib turibsizmi?
— Albatta. Shuningdek, Valeriy Georgiyevich Karpin bilan ham. Agar nimanidir so‘rash kerak bo‘lsa, unga bemalol qo‘ng‘iroq qilishim mumkin.
«Kino ko‘ryapman, kitob o‘qiyman, musiqa tinglayapman»
— Siz PES20 futbol simulyatorini o‘ynar ekansiz. Hattoki RPL o‘yinchilari o‘rtasidagi musobaqada ham ishtirok etdingiz...
— Qiziq bo‘ldi! Hozircha u qadar yaxshi o‘ynay olmadim. Chunki men PES13 o‘ynashga ko‘nikkan edim. Orada farq bor baribir.
— FIFA ham o‘ynaysizmi?
— Ha.
— Kibersportga anchadan beri qiziqasizmi?
— Bir necha yillardan beri.
— Bo‘sh vaqtda yana nimalar bilan shug‘ullanasiz?
— Xotinim bilan kino ko‘ramiz, kinob o‘qiyman, musiqa tinglaymiz. Kunim shunday o‘tadi.
«Kulinariya — qiziqarli soha»
— Ota-onangiz O‘zbekistonda yashashadimi?
— Ha, men tug‘ilib o‘sgan Surxondaryo viloyatida.
— Ular ham karantindami?
— Albatta, boz ustiga, u yerda bunga jiddiy qarashyapti. Ular bilan doimo aloqada bo‘lib turibman, har kuni qo‘ng‘iroq qilaman.
— Oilada kim ovqat pishiradi?
— Odatda xotinim, lekin men ham ayrim narsalarni tayyorlay olaman. Nazarimda, kulinariya — qiziqarli soha.
— Palov pishira olasizmi?
— Hozircha o‘rganyapman. Oddiy ko‘ringani bilan bu oson ish emas.
— Qanday taom pishira olasiz?
— Oxirgi marta dimlama pishirdim. Xotinimning aytishicha, yomon chiqmadi.
«Rostov» — katta oila»
— Odatiy kunlarda "Rostov" a’zolari norasmiy muhitda yig‘iladimi? Masalan, restoranda yoki tabiat qo‘ynida?
— Jamoadagi muhit a’lo darajada. Klub rahbariyati, murabbiylar shtabi, o‘yinchilar va xodimlar — barchamiz bir oilamiz. Butun jamoa bo‘lib yig‘ilib turamiz. Masalan, kimnidir tug‘ilgan kuni yoki boshqa bayram bo‘lsa.
— Rostov qisqichbaqalarini tatib ko‘rdingizmi?
— Albatta.
— Yoqdimi?
— Juda ham. Ayniqsa, yaxshi do‘stlar davrasida. Qayerda ekanining ahamiyat yo‘q — Don qirg‘og‘idami yoki restoranda.
— Eldor, «Rostov»da eng quvnoq yigit kim?
— Nazarimda, Xoren Bayramyan. Uning mahzun bo‘lganini hech qachon ko‘rmaganman. Pozitiv yigit!
«Ota bo‘lishni va farzandlarni tarbiyalashni orzu qilaman»
— Futbolga qaytamiz. Tasavvur qilamiz, karantin bekor qilindi. Yana kerakli formaga kirib olish uchun qancha vaqt talab etiladi?
— O‘ylashimcha, taxminan bir oy.
— Ushbu mavsumda o‘z oldingizga qanday vazifalarni qo‘ymoqdasiz?
— «Rostov» jadvalda imkon qadar yuqoriroq o‘rinni egallashi uchun qo‘limdan kelgan barcha ishni qilaman. Shaxsiy maqsad borasida esa — Rossiya chempionati to‘purari bo‘lishni istayman. Buning uchun menda imkoniyat bor.
— Ya’ni, Dzyubani quvib o‘tishingizga ishonasiz?
— Albatta.
— Darvoqe, nima uchun penalti tepmayapsiz? Shunda gollaringiz ko‘proq bo‘lishi mumkin edi...
— «Rostov»da tajribalik futbolchilar bor, ular tepishyapti.
— O‘zbekiston terma jamoasi bilan qanday natijalarga erishmoqchisiz?
— Jahon chempionati yo‘llanmasini qo‘lga kiritishni orzu qilaman. Keyinchalik esa terma jamoa tarixidagi eng yaxshi to‘purar bo‘lmoqchiman (Shomurodov terma jamoada 20ta gol urgan. Eng yaxshi to‘purar Geynrix hisobida 32ta gol mavjud — stadion.uz izohi).
— Qaysi hujumchilarga o‘xshashni istaysiz?
— Hech kimga. O‘zimga o‘xshashni istayman. Agar qaysi hujumchilarning o‘yini menga yoqishini so‘rasangiz, u holda Drogba va Fernando Torresni tilga olishim mumkin.
— O‘tmishdagi qaysi o‘zbek futbolchisini ta’kidlay olasiz?
— Mirjalol Qosimov. U bizning faxrimiz.
— Ushbu mavsumdagi sizning yorqin o‘yiningiz?
— Nazarimda, «Spartak»ga qarshi safardagi o‘yin. Unda biz 4:1 hisobida g‘alaba qozongan edik (Shomurodov bu o‘yinda gol urmagan, bitta golga uzatma bergan)
— Faoliyatingizdagi eng chiroyli gol?
— O‘zbekiston chempionati doirasida «Nasaf»ga urgan golim. O‘shanda «Bunyodkor» 1:0 hisobida g‘alaba qozongan edi.
— Siz uchun hayotda eng namunali inson kim?
— Otam. Agar u bo‘lmaganida men hozirgidek bo‘lmagan bo‘lardim. Mening tarbiyamda u muhim o‘rin tutgan.
— Sevimli faslingiz?
— Menga bahor yoqadi.
— Bahor Rossiya va O‘zbekistonda turlichami?
— Agar Rostov bilan taqqoslasam, deyarli bir xil.
— Nimani orzu qilasiz?
— Futboldagi orzumni aytib o‘tdik — jahon chempionatida o‘ynash. Oilaviy masalada esa ota bo‘lish va farzandlarni tarbiyalash.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
