Bosniya va Gersegovina futbol assosiasiyasi ijroqo‘mi mamlakat chempionati va Kubogini muddatidan avval yakunlash haqida qaror qabul qildi. Mavsum to‘xtab qolgan paytdagi turnir jadvalining ko‘rinishi yakuniy sifatida tan olindi.
Unga ko‘ra, "Sarayevo" klubi ketma-ket ikkinchi mavsumda chempionlikni qo‘lga kiritdi. "Jeleznichar", "Zrinski" va "Boras" klublari Yevropa ligasi yo‘llamasini qo‘lga kiritgan bo‘lsa, "Chelik" va "Zvezda 09" klublari quyi divizionga tushirib yuborildi.
Chempionatda 22ta tur o‘yinlari o‘ktazilgan bo‘lib, mavsum oxiriga qadar yana 11ta tur qolgan edi. Kubok esa yarim final bosqichida to‘xtab qoldi.
Bosniya va Gersegovina sog‘liqni saqlash vaziri kamida 1 iyulgacha mamlakatda futbol o‘yinlarini o‘tkazish mumkin emasligi haqida qaroridan so‘ng Assosiasiya mavsumni yakunlash haqida qaror qildi.
Ushbu qaror ba’zi jamoalarga yoqmadi. Masalan, "Jeleznichar" klubi peshqadam "Sarayevo"dan bor-yo‘g‘i 3 ochko ortda qolayotgan edi.