Bugun O‘zbekiston Superligasining 24-tur uchrashuvlari yakuniga yetdi.
Ushbu turda bir qator qiziqarli uchrashuvlar bo‘lib o‘tdi. O‘tgan turda Andijonga safar uyushtirib, 1:2 hisobida imkoniyatni boy berib qaytgan Muborakning "Mash’al" jamoasi o‘z maydonida Namanganning "Navbahor" jamoasini qabul qildi va yirik hisobda g‘alaba qozondi - 3:0.
Superligada jon saqlab qolish maqsadida birin-ketin murabbiylarni almashtirib kelayotgan "Andijon" jamoasi Olmaliqqa safar uyushtirdi va Mirjalol Qosimov boshchiligidagi AGMK jamoasi mehmoni bo‘ldi. Tarkib va tajriba borasida raqiblaridan katta ustunlikka ega bo‘lgan AGMK futbolchilari andijonlik futbolchilar darvozasiga naqd to‘rtta to‘p kiritdi - 4:0. Olmaliqliklar shu tariqa o‘zlarining to‘rtta "mag‘lubiyatli seriyasi"ga nuqta qo‘yishdi.
Birinchi davrada yuqori o‘rinlarni egallashni maqsad qilib tarkibiga tajribali futbolchilarni jamlab olgan Andrey Shipilov boshchiligidagi "Metallurg" klubining ikkinchi davraga kelib kuchi tugadi shekilli, 8 ta o‘yindan beri g‘alaba nimaligini bilmay kelmoqda. Bu safar "Metallurg" ikkinchi davrada o‘z tarkibini sezilarli darajada kuchaytirib olgan Navoiyning "Qizilqum" jamoasi maydoniga safar uyushtirdi va kichik hisobda (1:0) mag‘lubiyatga uchrab, "g‘alabasiz seriyasi"ni 9 taga yetkazib oldi.
O‘tgan turda joriy mavsum chempionligini rasmiylashtirgan Shota Arveladze boshchiligidagi "Paxtakor" bugun Qarshiga safar uyushtirib, Ro‘ziqul Berdiyev boshchiligidagi "Nasaf" jamoasi mehmoni bo‘ldi. Chempionlikni rasmiylashtirgani uchunmi yoki haqiqatdan ham "Nasaf"ning yosh futbolchilarga kuchi yetmadimi, bilmadig-u, lekin "sherlar" "ajdarlar"ga "em" bo‘ldi - 3:0.
Superligada jon saqlab qolish uchun harakat qilayotgan ikki jamoa - "Surxon" hamda "Buxoro" Termizda o‘zaro kuch sinashishdi. Avvaliga ikkinchi bo‘limning o‘rtalarida Kasyan belgilangan penaltini aniq amalga oshirib, maydon egalarini oldinga olib chiqqan bo‘lsa, o‘yinga qo‘shib berilgan daqiqalarda buxorolik futbolchilar gol kiritishib, mag‘lubiyatdan qutulib qolishdi.
Uchinchi o‘rin uchun kurash olib borayotgan Baxtiyor Ashurmatov boshchiligidagi "Qo‘qon-1912" o‘z maydonida Toshkentning "Lokomotiv" jamoasini qabul qildi. Beshta o‘yindan beri mag‘lubiyat nimaligini bilmay kelayotgan Timur Kapadze boshchiligida "temiryo‘lchilar" qo‘qonliklarni mag‘lubiyatga uchratib qaytdi - 0:1.
Turning so‘nggi uchrashuvi esa Toshkentdagi "Milliy" stadionda ustoz va shogird o‘rtasida bo‘lib o‘tdi. Unda Vadim Abramov boshchiligidagi "Bunyodkor" o‘z maydonida Jizzaxning "So‘g‘diyona" futbolchilarini qabul qildi va Xurshid G‘iyosovning kiritgan yagona goli evaziga 1:0 hisobida g‘alaba qozonib, muhim uch ochkoni o‘z hisobiga qo‘shib qo‘ydi.
Eslatib o‘tamiz, Superliganing keyingi tur o‘yinlari 29 noyabr kuni bo‘lib o‘tadi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
