Yaponiya futbolining bosh jahongashtasi Keysuke Xonda Bokuning «Neftchi»si tarkibida 2 oycha o‘ynadi va «Qorabog‘»ning 7 yillik gegemoniyasi barham topishiga hissa qo‘shdi. Faxriy yarim himoyachi shuning barobarida Bokuda turib, yaponiyalik talabalarga ingliz tilidan saboq berdi va Afrikada boshlangan loyihalarga sarmoya kiritdi.
Keysuke Xonda - Yaponiya futboli tarixidagi eng yorqin legionerlardan biri. U jumladan, Rossiya chempionatida ham chakki taassurot qoldirmadi. Rang-barang soch turmagiga ega Keysuke SSKAga Niderlandiyaning «Vitess» klubidan keldi (uning ustozi Leonid Sluskiy bir necha yildan keyin aynan shu jamoani ham boshqardi). Xonda RPLdagi debyut mavsumidayoq zambarak o‘qidek jarima zarbalari bilan barchani hayratga soldi. Deylik, CHL 1|8 finalida «Sevilya»ga qarshi kechgan bahsda aynan Keysukening betakror zarbasi ortidan SSKA keyingi raundga chiqdi. Biroq Xonda va «armiyachilar» xayrlashuvi ancha og‘riqli bo‘ldi - futbolchi muddati tugashiga 1 yil qolgan shartnomasini uzaytirishdan bosh tortdi. Klub esa uni «sariq chaqa»ga qo‘yib yuborishni istamadi. Keysuke yakunda 2014 yilning qishida «Milan» safiga qo‘shildi. Ammo yapon yigiti «A» seriya yulduziga aylanolmadilar, «rossonerlar» bilan aloqani uzganidan keyin esa, dunyo bo‘ylab sayr boshladi: Portugaliya, Braziliya, Avstraliya. Xonda orada hattoki, Kambodja terma jamoasida ishlashga ham ulgurdi. Qisqasi, jahongashta futbolchi maqomini oldi.
Xondaning faoliyatida kulguli burilish ham kuzatildi - «Botafogo»dan qochib, Portugaliyada qo‘nim topdi, ammo yangi klubda atigi 3 kun ushlanib turdi. 34 yoshida esa Ozarbayjon chempionatiga yuzlandi. Aniqroq aytsak, Keysuke joriy yil mart oyida mavsum oxirigacha mo‘ljallangan shartnoma asosida «Neftchi» safiga qo‘shildi. «Aslida oldimda yana bir variant bor edi, ammo Yevropa klubida o‘ynashni xohladim, - deya o‘z tanlovini tushuntirgandi Xonda. - Menga bunday imkoniyatni «Neftchi» taqdim etdi. Ko‘pchilik nega Yaponiyaga qaytmaganim xususida so‘raydi. Javobim oddiy: «U yerda 3 yil o‘ynab ko‘rganman va endi qaytish o‘zim uchun qiziq emas. Hamma yana avvalgi klublardagi xatolarimni aytadi, lekin o‘zim hamisha yangi chorlovlarni qidirganman. Mana, Ozarbayjonda yangi sinov topdim. Albatta, «Neftchi» bilan yaxshi natijalarga erishmoqchiman. Tan olaman, faoliyatim davomida juda ko‘p adashganman, xatolarga yo‘l qo‘yganman, ammo bu yerda o‘zimni yana bir bora ko‘rsatmoqchiman».
Keysuke Xonda 2 oy davomida «Neftchi»ning 7ta o‘yinida maydonga tushib, 2ta gol urdi. Ozarbayjon chempionatining ayniqsa, finish qismi qizg‘in tus oldi. «Neftchi» oxirgi turda o‘zidan atigi 1 ochko oldinda borayotgan peshqadam «Qorabog‘»ni qabul qildi. Qatorasiga 7 mavsum chempionlik bayrog‘ini saqlab kelgan mehmon jamoa 90-daqiqada ham o‘ziga maqbul hisob (0:0)ni saqlab turgandi. Oxirida o‘yin yakunlanishiga atigi 5 daqiqa qolganida maydonga tushgan bolgariyalik Ahmad Ahmedov amaldagi chempion darvozasini nishonga oldi va «Neftchi» 8 yillik tanaffusdan keyin taxtga ko‘tarildi. Asosiysi, Xonda jamoasi «Qorabog‘»ning 7 mavsumga cho‘zilgan chempionlik seriyasini uzib qo‘ydi. Darvoqe, oxirgi 10 yillikning boshida katta iqtidor sifatida ko‘zga tashlangan Emin Mahmudov ham Xonda qatori chempionlikni nishonladi.
Xonda «Neftchi» sharafini himoya qilishdan tashqari, yaponiyalik talabalarga onlayn tarzda ingliz tilidan saboq berishga ham vaqt ajratdi. U shuningdek, Afrikada boshlangan bir necha loyihaga sarmoya kiritdi.
*** Keysuke Xonda endi Yaponiya olimpiya terma jamoasi tarkibidan joy olib, Tokio Olimpiadasida ishtirok etishni o‘ylamoqda: «Tushunaman, «zayavka»ga tushishim qiyin masala, chunki terma jamoada jiddiy raqobat bor. Boz ustiga, Olimpiadada qatnashadigan yoshi katta futbolchilar soni cheklangan».
*** Oxu.Az ma’lumotlariga qaraganda, Xonda «Neftchi»da maosh olmagan. Klub faxriy yaponga faqat uy va avtomobil ajratgan, xolos. Xullas, Keysuke shunchaki, o‘yin amaliyotiga ega bo‘lib, sport formasini tiklashni o‘ylagandi, amalda esa tarixiy g‘alaba ishtirokchisiga aylandi.
S.RAHMONOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
