20-21 noyabr kunlari Toshkent mezbonligida o‘tgan qilichbozlikning sablya yo‘nalishi bo‘yicha yoshlar o‘rtasidagi Jahon kubogida qizlarimiz muvaffaqiyatli ishtirok etib, ham yakkalik, ham juftlik yo‘nalishida g‘alaba qozonishdi. Bugun MOQda ularning zafarlari munosabati bilan matbuot anjumani tashkil etildi.
Unda O‘zbekiston qilichbozlik federasiyasi bosh kotibi Gulnora Saidova, terma jamoamiz murabbiyi, 3 karra Olimpiya o‘yinlari chempioni Vladimir Nazlimov, musobaqada yurtimiz sharafini himoya qilgan qilichbozlarimiz, yosh sportchilar va OAV xodimlari ishtirok etishdi.
Yig‘ilish avvalida Zaynab Dayibekova o‘z taassurotlari bilan o‘rtoqlashdi:
“Musobaqada yakkalik bahslaridan ko‘ra jamoaviy dastur qiyin bo‘ldi. Negaki, unda bir o‘zimiz emas, jamoamiz sha’ni uchun ham jang qilamiz. Avvalgi musobaqalarda jamoaviy dasturda hech qachon birinchi bo‘lmagan edik. Bu galgi g‘alabamiz bizga yanada kuch berdi. Endi bu o‘rindan hech qachon tushmaslik uchun harakat qilamiz. Shu o‘rinda bizga shug‘ullanishimiz uchun barcha sharoitlarni yaratib berayotgan davlatimizga jamoamiz nomidan minnatdorchilik bildirib qolaman."
Shuningdek, jamoa murabbiyi Vladimir Nazlimov hozirgi avlod kelajakda jahonning eng kuchli sportchilari bo‘lishiga umid bildirayotganini ta’kidladi.
“Hozir federasiyamizda bo‘layotgan o‘zgarishlar o‘z natijasini ko‘rsatmoqda. Mamlakatingizda yaratilgan sharoitlar dunyoning barcha davlatlarida ham yo‘q. Faqat yetakchi sport derjavalarida uchratish mumkin. Oldimizga qo‘yilgan maqsadlarga yetishish faqat o‘zimizga bog‘liq”, – dedi 3 karra Olimpiya o‘yinlari chempioni V.Nazlimov.
Anjuman davomida jurnalistlar jamoamizning oldindagi rejalari, musobaqa taassurotlari va boshqa mavzularda o‘zlarini qiziqtirgan savollariga javob olishdi.