O‘zbekiston milliy jamoasi himoyachisi Ibrohimxalil Yo‘ldoshev O‘FA matbuot xizmatiga intervyu berib, milliy jamoa va klub miqyosidagi faoliyati va kelgusidagi rejalari haqida gapirib o‘tdi.
Futbolga kirib kelishi
— Avvalo, assalomu alaykum. Futbolga qiziqishim 7-8 yoshda boshlangan bo‘lsa-da, ushbu sport bilan 12 yoshimdan shug‘ullana boshlaganman. Bungacha taekvondo sport turi bilan shug‘ullanardim. Umuman, sport olamiga meni dadam olib kirganlar. Taekvondo bilan yosh bolaligimdan shug‘ullanganman, lekin keyinchalik menda futbolga bo‘lgan qiziqish ustunlik qildi. Taekvondo bilan shug‘ullangan davrlarimda ham doimiy futbol o‘ynab turardik. 12 yoshimda esa to‘liqligicha futbolga o‘tdim. Yangiyer shahrida Ikrom Davlatov qo‘l ostida shug‘ullanishni boshlaganman. Ertalab futbolga borardim. 6-sinfligimdan futbol maktab-internatiga borganman. Bir yil o‘sha internatda tahsil olganman. Kelgusi yilda katta musobaqa o‘tkazilgandi. Turnirda birinchi o‘rinni olgandik va o‘shanda Toshkentdan kelgan seleksionerlarning e’tiboriga tushgandim. 8-raqamda o‘ynardim. Ular meni chaqirishdi va «Paxtakor»ga chaqirmoqchi ekanliklarini aytishdi. O‘zim ham, otam ham xursand bo‘lgandik. Ertasiga murabbiyim bilan aytilgan joyga borganmiz. Stanislav Kudryashov «Paxtakor»da meni qabul qilib olganlar. Shu tariqa, 7-sinfligimda «Paxtakor» akademiyasida shug‘ullana boshlaganman.
Ko‘pchilik futbolni 7-8 yoshidan boshlaydi va men 12 yoshdan shug‘ullanishni boshlaganim biroz qiyinchilik tug‘dirgan. Bolalar bilan kirishib ketishda ham biroz muammolar bo‘lgan. Lekin harakat qilib, bu qiyinchiliklarni sekin-asta ortda qoldirganman. Bu holat murabbiyga ham juda yoqqandi.
Yangiyerda o‘ynagan vaqtimda hujumchi bo‘lganman. Keyin markazga o‘tkazishgan. Toshkentga kelgan dastlabki paytlarimda ham yarimhimoyada o‘ynardim. Lekin keyinchalik Stanislav Kudryashov meni chap qanot himoyasiga qo‘yishni boshlagandi.
Milliy jamoa
Milliy jamoaga chaqirilishim? Eslayman, o‘sha paytda «Bunyodkor»da o‘ynardim. Menga milliy jamoaga chaqirilganim haqida qo‘ng‘iroq bo‘lgandi. Juda ham xursand bo‘lganman. Hamma ham mamlakat bosh jamoasida o‘ynashni xohlaydi. Ayniqsa, mening yoshimda bu juda katta voqea edi. Debyutim Tojikistonga qarshi bo‘lib o‘tgandi.
O‘ylashimcha, jamoada sog‘lom raqobat bo‘lishi kerak. Raqobat borligi uchun doim o‘z ustimizda ishlaymiz. Men ushbu pozisiyada asosiy tarkib bilan o‘ynashim kerak degan fikr yo‘q. Murabbiyning taktik ko‘rsatmalarini bajarish kerak. Maydonda o‘zini yaxshi tarafdan ko‘rsatish kerak.
Srechko Katanes ishida menga eng yoqqan jihat bu — tartib. Milliy jamoaga murabbiy etib tayinlangach, birinchi yig‘inda intizomni birinchi o‘ringa qo‘yishini aytgandi. Tushlik va kechki ovqatga o‘z vaqtida tushish hamda bu paytda telefonni o‘zi bilan oshxonaga olib tushmaslik ham talab qilingan.
Mashg‘ulotlarga kelsak, asosan, himoyadan hujumga pas orqali tezkor chiqib ketishni o‘rganyapmiz. Yig‘inlarda mudofaadagi harakatlarga katta e’tibor qaratamiz. Hatto 5ta himoyachi harakat qiluvchi taktikada ham o‘ynab ko‘ryapmiz. 5ta himoyachi bilan o‘ynaganda qanot himoyachisining vazifasi raqib hujumchisini oldinroqda kutib olishdan iborat bo‘ladi.
Klubdagi faoliyati
«Nijniy Novgorod»dagi faoliyatimning dastlabki vaqtlari birmuncha qiyin kechdi. Jamoadagi futbolchilar bilan kirishib ketish, klubga adaptasiya jarayoni biroz vaqt oldi. Birinchi mashg‘ulotlarda jamoadagi yigitlar bilan gaplashib ketish biroz qiyinchilik tug‘dirdi. Hozir hammasi joyida, yangi yil boshida klub yig‘inida qisqa muddat bo‘ldim. Jamoadoshlarim bilan aloqalarim hozir juda yaxshi.
Aleksandr Kerjakov murabbiy sifatida juda jiddiy inson. Mashg‘ulotlarga, futbolchilarga nisbatan talabchan. Har bir pozisiyadagi futbolchi uchun alohida ko‘rsatmalar berib boradi. Birinchi taymdan so‘ng jamoa yutkazayotgan bo‘lsa, u yaxshi motivasiya bera oladi va biz yaxshiroq o‘ynashni boshlaymiz.
Murabbiy menga ishonadi, deya olaman. Klubga borganimdan so‘ng, 2ta mashg‘ulot o‘tgach, meni asosiy tarkibda maydonga tushirdi. Hamma murabbiylar ham unga o‘xshamaydi va hamma fyosh futbolchilarga ham menga berilgan imkon berilavermaydi, deb o‘ylayman. Chunki, mening pozisiyamda boshqa kuchli futbolchilar ham bor edi, murabbiy esa meni birinchi o‘yindanoq asosiy tarkibda maydonga tashladi. Mashg‘ulotlar paytida aynan mening xatolarimni operatorga aytib, tasvirga oldirib, o‘zimga ko‘rsatib, barchasini tuzatishimga yordam beryapti.
Bilasiz, «Jenoa»dan ham taklif bo‘lgandi. Ular meni transfer qilib, Yevropaning boshqa bir klubiga ijaraga berib yubormoqchi bo‘lishgandi. Keyin esa «Nijniy Novgorod»dan taklif kelib tushdi. Keyin esa Aleksandr Kerjakov bilan virtual tarzda gaplashdik. U meni asosiy tarkibda o‘ynatmoqchi ekanini aytdi. «Jenoa»dan bo‘lgan taklif ham yaxshi edi. Lekin Yevropaga borishga biroz ikkilandim. Chunki, ingliz tilini yaxshi bilmayman. Til o‘rganish masalasi, yashash tarzi, u yerda maydonga tushamanmi-yo‘qmi — shu savollar o‘rtaga chiqib kela boshladi. Shu tariqa, Rossiya orqali Yevropaga o‘tishga qaror qildim. O‘yin amaliyotidan chetda qolib ketmaslikni ham o‘yladim. Hozircha kelgusi rejalar haqida men ham, agentlarim ham hech narsani bilmaymiz. «Nijniy Novgorod» bilan shartnomam joriy yilning 30 iyuniga qadar amal qiladi. Shartnomam tugagach, kelajak haqida o‘ylab ko‘ramiz.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
