Coca Cola Superliga 1-turidan o‘rin olgan “Navbahor” - “Nasaf” (0:0) uchrashuvidan keyingi matbuot anjumanining ikkinchi qismida “lochinlar” bosh murabbiyi Samvel Babayan ishtirok etdi.
- Bugungi o‘yinda futbol bayrami bo‘lishini kutgandik, lekin unchalik o‘xshamadi. Futbolchilarimizning g‘alaba qozonib, stadionga to‘plangan minglab muxlislarni quvontirishga bo‘lgan haddan ziyod kuchli ishtiyoqi qaysidir ma’noda ta’sir ko‘rsatdi, shoshma-shosharliklar kuzatildi. Uchrashuv haqida umumiy fikr bildiradigan bo‘lsam, jiddiy raqibga qarshi o‘ynadik, “Nasaf” bir necha yillardan buyon barqaror futbol namoyish etib kelmoqda, natijalari ham shunga yarasha ijobiy bo‘lmoqda. Qo‘shimcha ravishda ularning bundan avval bitta rasmiy o‘yin o‘tkazib ulgurishgani ham “Nasaf”ga qo‘l keldi. O‘yinni tahlil qilgan holda aytishim mumkinki, biz g‘alabaga yaqin edik, bir qator yaxshi vaziyatlar yaratdik, raqib darvozasi tomon zarbalar yo‘lladik. Lekin afsuski, ular muvaffaqiyatli chiqmadi. Umuman, stadionga to‘plangan muxlislar va televizor orqali tomosha qilganlar “Navbahor”-2022ning faqatgina bir qismini ko‘rishdi, xolos. Faqat birinchi bo‘limning dastlabki 20 daqiqasi hamda ikkinchi bo‘limning so‘nggi 35 daqiqaligida jamoamiz yaxshi to‘p surdi. Amalga oshiradigan ishlarimiz yetarli, bugun biz ko‘rgan muammolarni tahlil qilamiz. Bu yilgi chempionat juda qiziqarli o‘tishiga shubha yo‘q, biz esa yanada sifatliroq o‘yin ko‘rsatib, muxlislarni quvontirishga harakat qilamiz, - dedi Samvel Babayan.
- “Navbahor”ning 1996 yilgi tarkibi bilan hozirgisini taqqoslay olasizmi?
- Albatta, hozir solishtirish mushkul. Lekin o‘sha paytlari ham hujumkor futbol namoyish etadigan iste’dodli futbolchilar yig‘ilgandi, hozirgi tarkibimizda ham milliy terma jamoada o‘ynagan, g‘alabalar ta’mini biladigan o‘yinchilar to‘plangan. Har ikki jamoa men uchun qadrli, shunday ekan, kelgusida ham 1996 yildagi kabi sifatli futbol namoyish etishga harakat qilamiz, tribunalarimiz birinchi o‘yindan oxirigacha to‘lib turishini xohlaymiz.
- “Navbahor” Turkiyada 10 ta o‘yin o‘tkazdi, lekin jamoaviy o‘yin borasida muammolar ko‘zga tashlandi. Buning sababi nimada?
- Avvalroq aytganimdek, bugun faqatgina ayrim vaziyatlardagina jamoaviy o‘yinni ko‘rdik. Muxlislar va tomoshabinlar bu yilgi “Navbahor”ning faqatgina ma’lum epizodlarini ko‘rishdi, xolos. Hali qiladigan ishlarimiz ko‘p.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
