Turnirdagi pozisiyasi
«El-klasiko»ga «Real» ichki chempionatda ketma-ket to‘rtta g‘alaba bilan yetib kelmoqda. Jamoa ayni dam «Sevilya»dan o‘n ochkoga ildamlab ketgan.
«Barselona» esa yetti o‘yindan oltitasini o‘z foydasiga hal etgan holda ajoyib seriyani namoyish etmoqda va buning evaziga to‘rtinchi o‘ringa ko‘tarilib, ikkinchi pog‘onadagi «Sevilya» bilan o‘zaro farqni besh ochkogacha qisqartirgan (kataloniyaliklar ixtiyorida hali yana bir o‘yin ham bor). Uchinchi o‘rinni egallab turgan Madridning «Atletiko»si «ko‘k-anorranglilar»dan uch ochko ko‘p jamg‘argan bo‘lsada, «matraschilar» asosiy raqibidan ikki o‘yin ko‘proq o‘tkazganlarini ham ta’kidlab o‘tish joiz.
Real Madrid
1. Karim Benzema va Ferland Mendi «Barselona»ga qarshi bahsni o‘tkazib yuboradi.
«Real Madrid» va «PSJ» o‘rtasidagi Chempionlar ligasi 1/8 finalining birinchi o‘yinida Karim Benzema endigina jarohatidan forig‘ bo‘lib, o‘zining eng yaxshi formasiga qaytayotgan edi. Biroq «qaymoqranglilar» o‘shanda o‘ta kuchsiz o‘yin namoyish etib, 0:1 hisobida mag‘lub bo‘ldi.
Shunga qaramay madridliklar keyinchalik kuchli ruhiyat namoyish etib, besh uchrashuvda beshta g‘alabani qo‘lga kiritishdi, shulardan biri «PSJ»ga qarshi javob bahsi (3:1)ni ham o‘z ichiga oladi. «Real» ushbu uchrashuvlarda naq 14 ta gol urdi. E’tiborlisi, «Real»ning yaqin mavsumlardagi haloskori Karim Benzema 14 goldan 12 tasida bevosita ishtirok etgan. U 8 ta gol urib, 4 ta golli uzatmani amalga oshirdi va jamoasi g‘alabalariga muhim hissa qo‘shmoqda. Aynan Karim «PSJ»ga qarshi o‘yinda xet-trik qayd etdi va shu tariqa qarama-qarshilik taqdirini umuman teskari yo‘nalishga o‘zgartirib yubordi.
Ammo «el-klasiko» oldidan fransiyalik futbolchi yana jarohat oldi. Karlo Anchelotti «Real Madrid»ning ayni damdagi eng yaxshi to‘purari «Barselona»ga qarshi o‘yinni o‘tkazib yuborishini tasdiqladi. Mariano Dias va Luka Yovich so‘nggi besh o‘yinda maydonda bor-yo‘g‘i 6 daqiqa ko‘rinish berdi va ular hozircha yaxshi formada emas.
«Real Madrid» Benzemadan tashqari bugun Ferland Mendi xizmatlaridan ham foydalana olmaydi, unda ham jarohat mavjud. Nacho Fernandes qanotda o‘ynashi taxmin qilinmoqda, u bu yerda Usmon Dembele va Dani Alves bilan to‘qnash keladi. Albatta, bu kataloniyaliklar uchun ispan to‘sig‘idan o‘tishni qiyinlashtirishi aniq.
2 «Real Madrid»da «el klassiko»ga tayyorgarlik ko‘rish uchun ko‘proq vaqt bor edi
«Real» Chempionlar ligasi doirasidagi o‘z o‘yinini 11 kun oldin o‘tkazdi, shundan so‘ng jamoa bor-yo‘g‘i birgina uchrashuvda maydonga tushdi va unda ham yirik hisobda g‘alaba qozondi. Shu tariqa, «qaymoqranglilar» olti kun davomida «el-klasiko»ga maqsadli va ancha puxta tayyorgarlik ko‘rishi kutilgan edi. Hozir jamoada «Barselona»ga qarshi to‘qnashuvga ajoyib jismoniy formada yetib borish imkoni mavjud.
Ammo «Barselona»ning taqvimi ancha murakkab. Kataloniyaliklar joriy hafta hisobidan ancha og‘ir bo‘lgan ikkinchi o‘yinga tayyorgarlik ko‘rmoqda. Xabaringiz bor, 17 martda jamoa Turkiyadan juda qiyin safar bahsini o‘tkazib qaytdi. «Ko‘k-anorranglilar» «Galatasaroy»ni mag‘lub etishdi (2:1). Keyingi bosqichga o‘tish o‘sha uchrashuv natijasiga bog‘liq bo‘lgani uchun Xavi rotasiyadan deyarli foydalanmadi. «Barselona»ga «el-klassiko»gacha tiklanib olish uchun bor-yo‘g‘i uch kun kerak bo‘ldi xolos, bu esa «Real» o‘tkazgan vaqtning yarmini tashkil etadi.
Barselona
1. «Barselona» «el klasiko»ga eng kuchli tarkib bilan boradi
2022 yilning boshida Xavi tarkibga asosiy 11 nafar futbolchini yig‘ish jarayonida ancha qiynaldi. U hatto «Barselona B» futbolchilarini ham sinab ko‘rdi, chunki jamoada koronavirus va jarohatlar epidemiyasi avj olgan edi. Biroq hozir vaziyat keskin o‘zgargan – aksariyat futbolchilar ijobiy tarzda o‘ziga keldi.
Xavida nafaqat tarkibni raqibga moslashtirish, balki uning sifatini yo‘qotmasdan ham uchrashuv davomida kuchaytirib borish imkoniyati mavjud. Serxi Roberto, Ansu Fati, Samuel Umtiti, Alexandro Balde hamon Kataloniya klubi lazaretida. Ular safiga bir kun avval Serjinyo Dest ham qo‘shilgan, biroq faqat Fati bo‘lajak o‘yinda asosiy tarkibdan joy olishi mumkin. Shuningdek, Pyer-Emerik Obameyang ham ajoyib formada, gabonlik yettita o‘yinda yettita gol urdi, u allaqachon «Barselona»ning joriy mavsumdagi ikkinchi to‘purari hisoblanadi.
2. «Ko‘k-anorranglilar» uch oydan beri La Ligada mag‘lub bo‘lmayapti
«Barselona»ning La Ligadagi so‘nggi mag‘lubiyati 2021 yilning 4 dekabrida sodir bo‘lgan, o‘shanda kataloniyaliklar «Real Betis»ga 0:1 hisobida imkoniyatni boy bergan edi. Shundan beri jamoa ligada 12 ta o‘yin o‘tkazib, sakkiz g‘alaba, to‘rt durang qayd etdi, 29 gol urib, 12 gol o‘tkazib yuborildi. Fevral va mart oylari ayniqsa muvaffaqiyatli o‘yinlarga boy bo‘ldi. Bu vaqt ichida «ko‘k-anorranglilar» oltita o‘yindan beshtasida g‘alaba qozonishdi, ularning to‘rttasida to‘rttadan gol urishga muvaffaq bo‘ldi.
3. «Barselona» ko‘p gol uradi, lekin konvertasiya qilish bilan bog‘liq muammolar hali ham mavjud
Fevral-mart oylarida «Barselona» o‘nta o‘yinda 27 ta gol urdi, bu albatta ajoyib natija. Kataloniyaliklar urilgan gollar soni bo‘yicha allaqachon uchinchi o‘ringa ko‘tarilib olgan (52), faqat «Real» (59) va «Atletiko Madrid» (53) bu borada yuqoriroq ko‘rsatkichga ega. Jamoa shuningdek, «Atletiko», «Valensiya», «Atletik» va A Seriyaning eng yaxshi himoya chizig‘iga ega bo‘lgan «Napoli» kabi klublar darvozasini to‘rt martalab ishg‘ol qildi. Bu albatta, Xavining imzosini ko‘rsatadi.
Biroq, hammasi ham u qadar silliq emas. «Barselona» hali ham vaqti-vaqti bilan gol urishda jiddiy muammolarga duch kelyapti. Bunga yorqin misol sifatida «Elche» (2:1) va «Galatasaroy» (0:0) bilan o‘yinlarni keltirish mumkin. «Elche» bilan qarama-qarshilikda jamoa butun 90 daqiqa davomida hujum qilib, 4,09 xGni qayd etdi, lekin faqat ikkitagina gol urgan xolos. «Kamp Nou»da esa «Galatasaroy»ga qarshi bahsda «Barsa» 1,61 xGda vaziyatlar yaratganiga qaramay, bir marta ham raqib darvozasini ishg‘ol eta olmagan.
Karlo Anchelotti qo‘l ostidagi «Real» uchun 4-3-3 sxemasi o‘zgarmas kalitga aylanib ulgurdi. Jamoa mavsum boshidan beri deyarli ortiqcha o‘zgarish va eksperimentlarsiz ketmoqda. Bugun esa Karim Benzema o‘rniga Mariano Dias, Ferlan Mendi o‘rniga esa shu va oldingi mavsumlarda ko‘p bor chap qanot himoyasida harakat qilgan Nacho Fernandes o‘ynashi kutilyapti.
O‘z o‘rnida «Barselona» ham so‘nggi 3 oy davomida 4-3-3 sxemasiga ko‘nikib bo‘ldi. Jerar Pike o‘zida biroz noqulayliklarni boshdan kechiryapti va «Galatasaroy»ga qarshi o‘yinda almashtirildi, ammo shundan so‘ng u tuzalganini ma’lum qildi va bugun maydonga tushishga tayyor. Biroq yarim himoya qanday ko‘rinishda bo‘lishi katta so‘roq ostida, lekin bu yerda bir hafta oldin «Osasuna» bilan qarama-qarshilikda harakatlangan uchlikni ko‘rishimiz mumkin - Gavi-Buskets-Pedri.
«Real Madrid» «el-klasiko»ga ancha yaxshi formada yetib kelmoqda. Jamoa so‘nggi besh o‘yinning barchasida g‘alaba qozondi va bu jarayonda 14ta gol urdi. Ushbu natijalarda, albatta, 14 ta golning 12 tasida (sakkizta gol va to‘rtta golli uzatma) bevosita ishtirok etgan Karim Benzemaning xizmatlari katta. Ammo Karim jarohat olgan va bugungi bahsda qatnashmaydi. Shuningdek, yana bir jarohat olgan Ferland Mendi uchun ham «Barsa»ga qarshi maydonga tushish nasib etmaydi. Boshqa tomondan, «Real Madrid»da jismoniy tayyorgarlik borasida biroz ustunlik mavjud, chunki ular olti kun dam olish imkoniyatiga ega bo‘ldi, «Barselona» esa atigi uch kun.
«Barselona» Xavi qo‘l ostida mavsumning eng yaxshi qismlarini o‘tkazmoqda: kataloniyaliklar so‘nggi 11 o‘yinda barcha musobaqalar doirasida mag‘lub bo‘lmadi, shulardan to‘rttasida to‘rtta gol urdi. Qolaversa, «Barselona» o‘zining eng kuchli tarkibi bilan o‘ynashga tayyor. Jarohat olgan futbolchilar orasida Dest, Balde, Fati, Roberto va Umtiti nomlari bor.
Bu mavsum ikkala «el-klasiko» ham «Real Madrid» g‘alabasi bilan yakunlandi, ammo hozir «Barselona» ajoyib formada, «qaymoqranglilar»ning esa eng yaxshi o‘yinchisi safdan chiqqan. Shunday ekan, bugun «Real»ga oson bo‘lmaydi.
Yusufbek Saydaliyev tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
