Joriy yilgi Superliga bahslarida mag‘lubiyatsiz odimlayotgan jamoalar safida «Metallurg» ham bor. Mavsumni yangi bosh murabbiy qo‘l ostida boshlagan bekobodliklar hozir turnir jadvalida 5-o‘rinda borishmoqda. Biz mazkur jamoa yetakchilaridan biriga aylanib borayotgan, ijobiy natijalarga o‘z hissasini qo‘shayotgan mahoratli himoyachi Abror Toshqo‘ziyevni suhbatga tortdik.
- Joriy mavsum «Metallurg» uchun muvaffaqiyatli boshlandi. Ilk turlardan keyingi fikingiz qanday?
- Jamoalar yaxshi tayyorgarlik olib borganini o‘tkazilayotgan o‘yinlardan bilib olish mumkin. Hech kim osonlikcha taslim bo‘layotgani yo‘q. Bu esa uchrashuvlarning qiziqarli va shiddatli o‘tishini ta’minlayapti.
- «Surxon» bilan o‘yinda g‘alaba qozonishingiz uchun nima yetishmadi?
- Yaratilgan imkoniyatlardan foydalana olmadik. Agar o‘yinni kuzatgan bo‘lsangiz, bizda ham, «Surxon»da ham darvozani ishg‘ol qilish uchun yaxshi vaziyatlar bo‘ldi. Yagona gol bahs taqdirini hal qilardi.
- «Metallurg»ning yangi bosh murabbiyi Luisma Ernandesning ishiga qanday baho berasiz?
- U talabchan mutaxassis, har bir o‘yinchidan o‘zini maksimal darajada ko‘rsatishni talab qilyapti. Qolaversa, taktik tomonlama muayyan chiziqlarda kimning qanday o‘ynashi kerakligini o‘z falsafalari bilan tushuntiryapti. Mendan birinchi o‘rinda himoyada mustahkam turishni, kezi kelganda, standart vaziyatlarda raqib jarima maydonchasiga kirishni talab qilmoqda.
- Sizningcha, «Metallurg» joriy yil qaysi o‘rinlar uchun kurasha oladi?
- Kuchli uchlikka kirishga harakat qilamiz. O‘ylashimcha, jamoaning salohiyati bunga yetadi. Rahbariyat tomonidan esa har bir o‘yinda g‘alaba qozonish talabi qo‘yilgan. Shuni bajarishga intilamiz.
- Shaxsiy hayotingiz borasida ham biroz suhbatlashsak. Abror Toshqo‘ziyev hozirgi mavqega erishguncha qanday to‘siqlarni yengib o‘tgan?
- Ochig‘i, hali o‘zimni biror-bir mavqega, erishdim deb hisoblamayman. Faoliyatim davomida to‘siq emas, raqobatga duch kelganman. Futbolchining hayoti aynan shunisi bilan qiziq.
- Bekobod klubi bilan ketma-ket uchinchi mavsumni o‘tkazyapsiz. Jamoadagi shartnomangiz qancha muddatga tuzilgan. Umuman, yangi chorlovlarga qanday qaraysiz?
- «Metallurg» bilan tuzilgan shartnomam bu yil nihoyasiga yetadi. Har bir futbolchi borki, yuqoriga va o‘sishga intiladi. Nasib bo‘lsa, chetda o‘ynash niyatim bor.
- Futbolchi sifatida olgan birinchi maoshingizdan so‘ng ichingizdan qanday hissiyotlar kechgan?
- Bu kunni kechagidek eslayman. Ilk bor maosh olganimda, juda quvonganman, buni so‘z bilan ta’riflash qiyin. O‘shanda o‘zimni ulg‘aygandek his qilganman. Ochig‘i, ungacha oila a’zolarim pul berishardi.
- «Metallurg» Superliga doirasidagi keyingi uchrashuvni safarda «Qo‘qon-1912»ga qarshi o‘tkazadi. Mazkur o‘yindan nimalar kutyapsiz?
- Qo‘qonliklar bilan har doim qiziqarli uchrashuvlar o‘tkazganmiz. G‘alaba bizga ham, ularga ham kerak. Shunday ekan, mazkur o‘yinda bor kuchimiz bilan zafar quchishga harakat qilamiz.
Xurshid YUSUPOV suhbatlashdi
Dinamo
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
