Yaqinda «Vilyarreal» klubi tarixidagi eng yaxshi to‘purar, «sariq suvosti kemasi»ning Yevropa Ligasidagi afsonaviy muvaffaqiyati sababchilaridan biri - Jerar Moreno 30 yillik yubileyini nishonladi. 2021 yilda u bir taqvim yilidagi gollar soni bo‘yicha klub rekordini o‘rnatgandi.
Moreno «Vilyarreal» futbolchisi sifatida Ispaniya termasidagi samarali harakatlar soni bo‘yicha Joan Kapdevila bilan 1-o‘rinni bo‘lishib turibdi. Mazkur holatda Jerar «qizil furiya» tarkibida Joanga nisbatan qariyb 3 marta kamroq (17|48) o‘yin o‘tkazganini ta’kidlash o‘rinli.
Jerar mavsum-2020|2021-da mavsumiy sermahsullik bobida barcha kataloniyalik futbolchilar orasida Primera tarixidagi rekordni o‘rnatdi. O‘sha mavsum yakunlariga ko‘ra, Primeradagi eng sermahsul ispaniyalikka beriladigan Sarra sovrini qatorasiga ikkinchi marta Morenoga nasib qildi. Barcha mavsumlarda «Vilyarreal»dagi ispaniyalik futbolchilarning eng yaxshi 4 mavsumidan 3tasi Jerar hissasiga to‘g‘ri keladi.
Mavsum-2020|2021dagi barcha turnirlarda Moreno tomonidan urilgan 30ta gol «Vilyarreal» tarixidagi eng yaxshi ikkinchi ko‘rsatkich bo‘ldi. Juzeppe Rossining afsonaviy natijasini yangilash nasib etmadi, lekin baribir, Jerarning erishgan yutuqlari tahsinga sazovor.
Joriy mavsumda Moreno nafaqat «Vilyarreal»ning eng yaxshi to‘purari, balki tengsiz assistenti ham hisoblanadi: u «g‘ovvoslar» hujumidagi asosiy miya, bosh konstruktordir. O‘tgan mavsum Jerar 11ta samarali uzatmani amalga oshirgandi. «Vilyarreal» tarixida hujumchilar orasida faqat Roberto Soldado bir mavsum ichida bundan ko‘proq assist qayd etgandi. To‘g‘ri, Robertoning pleymeykerlik sifati namoyon bo‘lgan payt gollari soni kamaygandi. Jerar esa har ikki rolni ajoyib tarzda uyg‘unlashtirmoqda.
Moreno «Vilyarreal» tarixidagi eng sermahsul beshta duetning uchtasida bevosita ishtirok etgan. Mavsum-2019|2020da u Santi Kasorla bilan tandem hosil qilgan bo‘lsa, mavsum-2014|2015da Lusiano Vyetto, o‘tgan mavsumda esa Pako Alkaser unga sheriklik qilgandi.
Morenoning rivojlanishida Unai Emerining rolini alohida e’tirof etish o‘rinli. Ushbu mutaxassis hujumchilarni kashf etish salohiyatini yana bir bor ko‘rsatdi. Aynan Emeri qo‘l ostida Edinson Kavani (49 gol), David Vilya (31 gol), Kevin Gameyro (29 gol), Karlos Bakka (28 gol) singari forvardlar faoliyatlaridagi eng sermahsul mavsumlarni o‘tkazishgandi. Roberto Soldado hamda Alvaro Negredo esa Unai bilan ishlashganida, sermahsullik bobida faoliyatlaridagi eng yaxshi ikkinchi ko‘rsatkichlarni qayd etishgan. Endi ushbu ro‘yxat Emeri boshchiligida nafaqat ajoyib to‘purar, balki yetakchi va yo‘lboshchiga aylangan Jerar hisobiga to‘ldirildi.
A.AHMEDOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
