Fransiya terma jamoasi safida jahon chempionligini qo‘lga kiritgan, «Sevilya» bilan Yevropa Ligasida g‘olib chiqqan Stiven Nzonzi ayni payt JCH-2022 mezboni - Qatarning «Al-Rayyan» klubida faoliyat yuritmoqda.
FIFA rasmiy saytiga bergan eksklyuziv intervyusida u 2018 yilgi mundial finali, yoshligida uni ilhomlantirgan futbol yulduzlari va boshqa qator qiziqarli mavzular haqida fikrlarini bildirdi.
- Jahon chempioni bo‘lish qanday?
- Bu eng katta orzu. Bolalikda mundialda qatnashish g‘ayrioddiy tuyuladi. Lekin undagi g‘alaba... buni tasavvur qilib bo‘lmaydi.
- JCH-2018 finali arafasidagi muhit qanday edi?
- Meni hayratda qoldirgani, finalgacha bo‘lgan o‘yinda futbolchilar ancha bo‘shashgandek tuyulishgandi. Ehtimol, hamma stressda bo‘lgan va hech kim buni ko‘rsatishni xohlamagandir, lekin haqiqatan ham o‘sha kun boshqalaridan farq qilmasdi. «Ertaga finalda o‘ynaymiz», degan hissiyot yo‘q edi bizda. Kilian Mbappe va Usmon Dembele kabi yosh futbolchilar o‘zlari bilan yengillik va ishonch havosini olib kelishdi va o‘sha payt tarkibga kuch bag‘ishlashdi.
- Final va Didye Desham sizni maydonga chorlagan onlar haqida qanday xotiralar bor?
- Biz katta hayajon va adrenalin bilan bo‘lsa-da, to‘liq diqqatimizni jamlagandik. Uchrashuvdan oldingi chigalyozdi mashg‘uloti paytida bosimni his qilasiz, ammo bu o‘yin va diqqatni jamlash darajasini oshirishga ham imkon beradi. Maydonga tushganingizdan keyin esa jamoaga yordam berish va bor kuchingizni sarflash uchun ushbu bosimdan foydalanishingiz kerak. Mana shunday o‘yinlar orqali imkoniyatdan unumli foydalanish kerakligini his qilasiz. Qachonki, sizda shunday tuyg‘u bo‘lsa va bosimni ijobiy hal qila olsangiz, bu ajoyib. Shuningdek, hayajon ham bor narsa. Bu his-tuyg‘ularni hech qachon qayta boshdan kechira olmaysiz.
- Didye Deshamga qanday ta’rif berasiz va Fransiya termasi uning qo‘l ostida nimaning hisobiga muvaffaqiyat qozondi, deb o‘ylaysiz?
- Uning eng kuchli tomonlaridan biri - raqobatbardoshligi. Bu hamma his qilishi mumkin bo‘lgan narsa. Boshqacha aytganda, bizda birovni xursand qilish uchun emas, g‘alaba qozonish uchun ishlaydigan murabbiy bor. U haqiqatan ham eng yuqori cho‘qqilarni ko‘zlaydi. Faoliyatimda unga o‘xshab raqobatbardoshlik darajasi yuqori bo‘lgan boshqa murabbiyni uchratmadim. Qolaversa, menimcha, u guruhni boshqarishda yagona va bu uning yana bir kuchli tomoni. Desham o‘yinchilarga ancha yaqin, hazil-huzulni o‘rniga qo‘yadi, biroq hurmatni uyg‘otadigan qobiliyatga ham ega. Ishlash, jiddiy bo‘lish va g‘alaba qozonish vaqti kelganini bilamiz.
- 33 yoshda Fransiya termasi safida jahon chempioni, «Sevilya» bilan esa Yevropa Ligasi g‘olibi bo‘ldingiz. Barcha orzu-maqsadlaringizga erishdingizmi?
- Yo‘q, chunki men sportchiman va yana sovrinlar yutib, ko‘proq finallarda qatnashishni xohlayman. O‘yinchi bo‘lganingdan keyin hech qachon erishilgan darajadan to‘liq qoniqib bo‘lmaydi. «Sevilya» bilan Ispaniya kubogi finali, biz g‘alaba qozongan Yevropa Ligasi finalida qatnashish, shuningdek, Chempionlar Ligasida ishtirok etish imkoniga ega bo‘ldim. Bu g‘oliblik nashidasini qayta-qayta his qilish va g‘alabani tez-tez tatib ko‘rish istagini uyg‘otadi. Demak, yo‘q, men barcha maqsadlarimga erisha olmadim, lekin qo‘lga kiritgan yutuqlarim bilan juda faxrlanaman.
- Bolaligingizda kimlar qalbingizda futbolga mehr uyg‘otishgan?
- Menga shunday ta’sir o‘tkazgan birinchi futbolchi «PSJ» klubi va Nigeriya terma jamoasi vakili Okocha (Jey-Jey) bo‘ldi. Hujumkor, texnik jihatdan iqtidorli, dribling qila oladigan futbolchilarni yoqtirardim, lekin bu mening o‘yin uslubim emas. Keyin avlodimdagi barcha futbolchilar orzu qiladigan «o‘nlik»lar - Ronaldinyo va Zidanni alohida e’tirof etmoqchiman. Shunga qaramay, birinchi navbatda, baribir, Okochaning nomini tilga olaman. Men uchun u ajoyib futbolchi edi, har bir harakatlari yoqardi: yugurishi, driblingi, zarbasi... Jey-Jey o‘sha payt «PSJ»da to‘p surardi, shuning uchun deyarli har dam olish kunlari uning o‘yinlarini rohatlanib tomosha qilardim.
- JCH tarixidagi eng kuchli besh futbolchini ajratib ko‘rsating.
- Top beshlikmi? Bu oson. Pele, Maradona, Ronaldo, Ronaldinyo va Zidan. Bularning barchasi jahon kubogini qo‘lga kiritgan futbolchilar.
MUHAMMADXON tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
