Yurgen Klopp jamoasi o‘zining mavsumoldi tayyorgarlik yig‘inini o‘yinchilarning chidamlilik darajasini aniqlab beradigan an’anaviy laktat testi bilan boshladi.
Qoida juda oddiy:
** Ishtirokchilar bir nechta marralar seriyasini yuqori tezlikda yugurib bosib o‘tadilar;
** Har bir marra nihoyasida o‘yinchilarning quloqlari solinchagidan qon namunasi olinib, uning tarkibidagi sut kislotasi miqdori aniqlanadi;
** Sut kislotasi miqdori ko‘p bo‘lgan ishtirokchi yugurishni to‘xtatadi. Musobaqa bitta futbolchi qolgunicha davom etadi.
O‘ziga xos musobaqaning o‘ziga jalb etadigan jihatlari yo‘q - har yili testda «qizillar»ning eng keksa faxriysi Jeyms Milner g‘olib chiqadi. Jamoaning ikkinchi sardori 2015 yildagi debyut mavsumidan beri peshqadamlikni hech kimga bermay kelmoqda.
Robertson dastlabki testdan o‘ta olmagandi
Laktat testi - Endryu Robertsonning Liverpulga kelganidan keyingi dastlabki sinovi edi. Shotlandiyalik futbolchi o‘sha voqeani quyidagicha xotirlaydi: «Yangi jamoamdagi ilk kunimni yaxshi eslayman. O‘shanda biz 6-7 kishi edik, chunki mavsumoldi yig‘ini endigina boshlanayotgandi. Biz nemislar xush ko‘radigan laktat testini topshirishimizga to‘g‘ri kelgandi. Denni Ingz bilan yonma-yon chopa boshladim va tez orada ko‘nglim aynidi. Aslida, bu o‘ta og‘ir mashq.
Tibbiy ko‘rikdan o‘tishim ikki kunga cho‘zildi. Hech narsa yemaganim sababli, buni charchoq alomati, deb o‘yladim. Yo‘l-yo‘lakay Ingz menga nimalardir dedi. Lekin men o‘zimni yomon his etardim. Qusqini og‘zimda ushlab turishga uringan bo‘lsamda, chiday olmadim. Bu g‘oyat dahshatli edi. Birinchi kun!
Xayriyatki, o‘sha kuni Klopp u yerda emasdi. Ammo uch kundan keyin qaytib keldi. O‘zini tanishtirgach, meni «Janob Nosog‘lom», deb atadi. Adoyi-tamom qildi!»
Milner katta futboldagi 21-mavsumini boshlamoqda. U umuman spirtli ichimlik ichmaydi. Shu bois, uni Ronalduga tenglashtirib, Grilishga ibrat qilib ko‘rsatadilar
Milner - zamonaviy futbolga professional yondashuv bo‘yicha namuna bo‘la oladigan o‘yinchi. Jeyms o‘z debyutini 2002 yilda, 16 yosh, 309 kunlik paytida «Lids» tarkibida nishonlagandi. U APL tarixidagi ikkinchi eng yosh futbolchi hisoblanadi.
Jeyms jamoaga kelgan paytida «qizillar»ning ayrim vakillari hali dunyoga kelishga ham ulgurmagan edilar. Masalan, Xarvi Elliot va Kelvin Remzilar 2003 yilda tug‘ilishgan, Fabiu Karvalyu esa 2 oylik chaqaloq bo‘lgan. Yana 4 nafar futbolchi 1 yoshda bo‘lganlar.
23 yoshli Trent Aleksander-Arnold faxriy jamoadoshining baquvvatligidan hayratda: «Biz kuchli jamoamiz, baquvvat o‘yinchilarimiz ko‘p. Lekin Milli... bilmadim, uning yoshida yuksak sport formasini saqlab qolgan chayir futbolchini yana uchratishimga ishonmayman. Kuchli chempionatning eng sara jamoalaridan birining yetakchisi bo‘lish uchun beqiyos kuch va qat’iyat talab etiladi. Ayniqsa, uning yoshi va uzoq yillik faoliyatini inobatga olganda».
O‘ziga nisbatan o‘ta talabchanlik va spirtli ichimliklardan yiroqligi jihatidan Milnerni Krishtianu Ronalduga qiyoslashadi. «Manchester Siti»ning sobiq shifokori Pol Uebster yaqinda quyidagicha fikr bildirdi: «Chelsi»ga qarshi o‘yinda Milnerning o‘yini e’tiborimni tortdi. U maydondagi o‘yinchilarning eng zo‘ri edi. Boz ustiga, Jeyms juda yosh, xushbichim ko‘rinardi. Menimcha, uning organizmidagi yog‘ miqdori 8 foizdan oshmasa kerak.
Milnerda Ronalduga o‘xshash jihatlar mavjud. O‘zim Krishtianu bilan ishlagan emasman, ammo uni nazorat qiladigan mutaxassislarni yaxshi bilaman. Aslida, ulardagi qat’iyat arzimas jihatdek tuyuladi. Lekin yuksak natijalarga ana shu ikir-chikirlar olib keladi».
Jek Grilish namoyish etgan yozdagi bazmi-jamshid yana bir chorlovga sabab bo‘ldi. «Liverpul»ning sobiq o‘yinchisi Sten Kollimor klublarni o‘z o‘yinchilariga spirtli ichimliklar ichishni taqiqlashga da’vat etdi: «Fan haqiqatni gapiradi - alkogol sport natijalariga jiddiy salbiy ta’sir ko‘rsatadi. Krishtianu Ronaldu, Zlatan Ibragimovich va Jeyms Milnerlar aynan shu sababli unga yaqinlashmaydilar. Buning samarasini amalda ko‘rib turibmiz, shunday emasmi?
Futbolda mavsumlar oralig‘i o‘ta qisqa ekanligini tushunaman, «mazza» qilib hordiq chiqarishni hatto mavsum davomida umuman ichmaydigan o‘yinchilar ham istaydilar. Biroq busiz ham risoladagidek dam olish mumkin ekanligini Ronaldu, Ibragimovich va Milnerlar amalda isbotladilar. Jek Grilish, Fil Foden va boshqa britaniyalik yosh futbolchilar uchun bu illatdan voz kechish oson emas, chunki u kundalik turmush tarzimizga singib ketgan. Lekin agar futbolda alkogol iste’moli taqiqlansa, u nafaqat natijalar, balki ijtimoiy hayotga ham ijobiy ta’sir etishi mumkin.
O‘zimni avliyo maqomida ko‘rsatish fikridan yiroqman, bir paytlar «Liverpul»da o‘ynagan davrimda ozroq sharob yoki pivo ichib turardim. Lekin hozir klublar o‘z futbolchilariga talabchanroq bo‘lishlarini istardim.
Ayrim futbolchilar e’tiroz bildirishlari mumkin: «Bema’ni safsatangni yig‘ishtir, Sten. Axir sen bizni lazzat olishning iloji bo‘lmagan hududga chorlayapsan», deb. Yo‘q, Zlatan, Krishtianu va Jeymsning salomatligi, ishlari va kayfiyati avvalgidan zo‘rroq bo‘lsa bordirki, aslo kam emas. Demak, ular hayotdan chinakamiga lazzat olishmoqda. Xullas, biz shu yigitlardan ibrat olishimiz lozim, Pol Gaskoyn kabi ko‘ngilxushliklar asiridan emas. Futbol olami esa spirtli ichimliklar bilan bog‘liq qiziqarli ma’lumotlarga e’tiborni kuchaytirib, o‘yinchilarga nisbatan talabchanroq bo‘lishi kerak».
MUHAMMADSODIQ tayyorladi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
