«RB Leypsig»ning 11-raqamli hujumchisi - Timo Verner ortga qaytdi!
26 yoshli futbolchi shartnoma ostiga imzo chekkani hamono maxsus matbuot anjumanida qatnashib, qaytishi sabablariga to‘xtaldi, yana Angliyadagi faoliyati yuzasidan xulosa chiqardi, yangi maqsadlari haqida gapirdi.
Qaytishdan keyingi ilk kun
- Leypsigdagi birinchi kun mashaqqatli, lekin shuning barobarida ancha qiziqarli o‘tdi! Qaytish juda yoqimli, ko‘plab tanish chehralarni yana ko‘rib turganimdan xursandman.
Kutib olish jarayoni
- «RB Leypsig» tarkibiy tuzilmasida o‘zgarishlar katta emas - men o‘ynagan vaqtdagi ko‘plab futbolchi va xodimlar hamon klubdalar. Ilk mashg‘ulot davomida ular bilan quvonchli lahzalarni esladik - ajib xotiralar. Yigitlar bilan yana ko‘rishish o‘zgacha tuyg‘u bag‘ishladi. Yaxshiki, qo‘shiq kuylashimga to‘g‘ri kelmadi! Jamoa safiga ilk marta qo‘shilganimda, bu «ish»ni zimmamdan soqit qilgandim, shuning uchun bu safar shunchaki, ikki qator saflangan futbolchilar orasidan yugurib o‘tdim, xolos. Lekin ayrim yigitlar boshimga urishdi. Bu qo‘shiq aytishdan osonroq har holda.
Qaytish sababi
- Boshqa variantlarni ko‘rib chiqmaganimni aytsam, yolg‘on gapirgan bo‘laman. Lekin barchasini o‘ylab ko‘rgach, «RB Leypsig»ga qaytish eng to‘g‘ri yo‘l ekanligini tezda angladim. Futbolchi uchun klubdan tashqari, bosh murabbiy ham juda muhim. Domeniko Tedesko bilan g‘oyat iliq gaplashdik - ikkimiz ham Baden-Vyurtembergdanmiz, axir. Qisqasi, o‘zaro munosabatimiz zo‘r. Tedesko bilan suhbat ham «RB Leypsig» tanlovi bo‘yicha ishonchimni mustahkamladi. Albatta, klub tanlashda bo‘lajak jahon chempionati haqida ham o‘yladim. Zero, mundialga eng yuqori sport formasida tayyorlanishni istayman. Buning eng yaxshi yo‘li - doimiy o‘yin amaliyoti. Afsuski, «Chelsi»dagi ikkinchi mavsumda bunday bo‘lmadi. Qisqasi, moslashishga uzoq vaqt talab qilinmaydigan va o‘ynash imkoniyati balandroq klubga kelishni xohladim. Binobarin, «RB Leypsig» uslubini yaxshi bilaman, o‘z navbatida, klub ham men qanday o‘ynashimdan xabardor. Yana bir jihat - shaharning o‘zi. Bu yerda o‘zimni uydagidek his qilishimni ko‘pchilik biladi. Ha, London ajoyib shahar va uni qo‘msashim turgan gap. Lekin odatiy nemis nonvoyxonalariga yana tashrif buyurish, an’anaviy nemischa buyumlarni sotib olish juda yoqimli. Shuningdek, bu yerda uyimga ham yaqinroqman. So‘nggi 2 yil mobaynida otamning uyiga atigi bir marta bosh suqishga vaqt topdim. O‘ylaymanki, endi bunga imkoniyat ancha oshadi. Qolaversa, Bundesliga darajasi ham binoyidek. Menimcha, Germaniya ligasi saviya bo‘yicha APLdan uncha uzoq emas. Endi muxlislar bilan uchrashuvni intiq holda kutyapman. Ular bilan har doim ajoyib munosabatda bo‘lganman. Leypsigliklar eng qiyin pallalarda ham meni qo‘llab-quvvatlashdan to‘xtamadilar. Shunday fanatlar qarshisida yana maydonga tushish o‘zgacha kayfiyat ulashadi, albatta.
Angliyadagi faoliyati yuzasidan xulosa
- Angliyada ishim uncha yurishmagandek ko‘rinadi. Vaholanki, birinchi mavsumda «Chelsi»ning eng yaxshi to‘purari bo‘ldim, qolaversa, CHLda g‘alaba qozondik. Debyut mavsumida bundan ortig‘iga umid bog‘lash ham mumkin emas. Faqat keyingi mavsum hammasi chappasiga ketdi. Misol uchun, VAR tizimi tomonidan bekor qilingan gollar soni bo‘yicha rekord o‘rnatdim, menimcha. Ochig‘i, bu ham ishonchimga biroz ta’sir ko‘rsatdi. Yana koronavirus va jarohatlar bilan kurashishimga to‘g‘ri keldi, yakunda barchasi jamoadagi o‘rnimga ta’sir qilmay qolmadi. Shundan so‘ng avvalgi sport formasiga qaytolmadim va men uchun o‘yin vaqtini ko‘zlagan holda ketish mantiqiy qaror edi.
Jamoaning yangi
tuzilmasi
- Tushunaman, ko‘pchilik birdaniga gollar urishimni kutadi, o‘zim ham cho‘zib o‘tirishni xohmalayman. Lekin klubga o‘yin chizgilari yoki an’analarni buzish uchun kelganim yo‘q. Bunday inson emasman, hech qachon o‘zimni jamoadan ustun qo‘ymayman. Har doim jamoada o‘z o‘rnimni topganman. Aytganimdek, bu yerda men bilan birga o‘ynagan va muvaffaqiyatga erishgan futbolchilar bor. Misol uchun, Kristofer N~Kunku bilan ajoyib yilni o‘tkazgandim. Kristofning ko‘plab gollariga assistentlik qilganman, o‘z navbatida, u deyarli barcha gollarimda bevosita ishtirok etgan. O‘shanda kuchli tandem sifatida yaxshi taassurot qoldirgandik, o‘ylaymanki, endi yangi ijrochilar bilan ham ajoyib ishlarni bajaramiz.
Rivojlanish strategiyasi
- Menimcha, 2020 yildan buyon saviyam bir qadar oshdi. APLda doimiy tarzda o‘z ustingizda ishlashingiz va takomillashib borishingiz talab etiladi. Raqobat darajasi juda yuqori, axir har bir futbolchi boshlang‘ich tarkibdan joy olishni xohlaydi. Hozir 26 yoshdaman, o‘rganishda davom etish muhimligini juda yaxshi bilaman. Yashirmayman, chidamlilik va jismoniy tayyorgarlik bobida to‘liq barqarorlashmagandim va bularni rivojlantirish uchun APL eng maqbul liga edi. Tumanli o‘lkada har bir duelni to‘g‘ri qabul qilishingiz kerak, aks holda, yutqazishingiz muqarrar. Misol uchun, to‘p uchun kurashda tanamdan ko‘proq foydalanishni o‘rgandim.
Yangi maqsad-rejalar
- Oldimga aniq bir marralarni qo‘yib olishim noo‘rin. Qolaversa, «RB Leypsig»ga endi qaytdim, shuning uchun «Chempion bo‘lishni xohlayman» qabilida jarangdor gapirishimdan ma’no yo‘q. Faqat aytishim mumkinki, bizda «RB Leypsig» tarixidagi eng yaxshi tarkib bor. Ha, Bundesliganing boshqa jamoalari ham yaxshi tarkibga ega. Nima bo‘lishidan qat’iy nazar, jamoamga ishonaman va kuchli ishonch hamda puxta jismoniy tayyorgarlik bilan ko‘p narsaga erishish mumkinligini yaxshi bilaman.
MUHAMMADXON tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
