Hurlik, ozodlik epkinlari halqimizga keng imkoniyat eshiklarini ochib berdi.
Bundan bahramand bo‘lgan elimiz ertangi kunga yuksak ishonch bilan fidoiylik ko‘rsatayapti. Ayniqsa, bu borada o‘z umrini halq manfaati yo‘lida baxsh etgan nuroniylar ham ana shu xayrli va savob ishdan chetda qolishmayapti. Quyida «charm to‘p»ga oshno tutinib, millionlar o‘yini ravnaqiga hissa qo‘shganlardan biri, Mehnat faxriysi, «Do‘stlik» ordeni, «O‘zbekistonda futbolni rivojlantirishdagi xizmatlari uchun» esdalik nishoni sohibi Ozod Parmonov suhbatini e’tiboringizga havola etamiz.
- Ozod Davronrovich, suhbatni inson uchun g‘oyat qadrli va aziz bo‘lib qolgan beg‘ubor bolalik yillaringizdan boshlasak.
- Qishlog‘imiz viloyatimizning Yakkabog‘ tumaniga tutash hududda joylashgan bo‘lib, o‘zining bir so‘zli, mehnatkash, tanti odamlari bilan ma’lum va mashhurdir. Shuning uchun bo‘lsa kerak men ham dangal, o‘z so‘zida turadigan, davlat va halq manfaatini ustun qo‘yadigan odamlarni xush ko‘raman. Yosh bo‘lsamda hayotga bo‘lgan qiziqishim o‘zgacha bo‘lgan. Katta yoshdagi odamlar suhbatini zimdan kuzatib, o‘zimga zarur bo‘lgan o‘gitlarni olganman. Bo‘sh vaqt topdimmi maktabimizdagi stadionda to‘p tepib, o‘sha paytdagi butun o‘zbek halqining ko‘nglidan joy olgan «Paxtakor» nomini olgan sevimli jamoamizga havas qilib ulg‘aydik. 1962 yilda «Paxtakor»ning sobiq chempionati oliy ligasida kuchli oltilikka kirgani zavqimizga zavq qo‘shgan. O‘z davrida o‘zbekning Pelesi deya e’zozlangan Hamid Rahmatullayev, Idgay Tazetdinov, Oleg Qahhorov, Vitaliy Suyunov, Maqsud Sharipov, Akmal Azizxo‘jayev ismi shariflarini o‘zimizcha e’tirof etib, to‘p tepgan bo‘lsak, tengqurlarim hatti-harakatim, qaddi-qomatimni Krasniskiyga qiyoslab «Gena» deb chaqirishardi. Jamoadoshlarim orasida o‘zimizning Yuriy Pshenichnikov, Oleg Motorin, Birodar Abduraimovlari ham bor edi.
- Viloyat partiya qo‘mitasida faoliyat ko‘rsatganingizda B.Abduraimovni Qarshi jamoasiga bosh murabbiylikka ham taklif etgan ekansiz...
- Ha, Birodar akani o‘tgan asrning 80-yillarida Qarshiga taklif qilib, o‘sha paytdagi viloyatimiz rahbari Ruzmet G‘oyipov huzuriga olib kirganman. Qizg‘in va samimiy suhbat bo‘lgandi. Birodar aka Qashqadaryo futboli, uning iqtidorli yoshlariga munosib baho bergan. Biroq ayrim sabablarga ko‘ra, reja amalga oshmay qoldi. Lekin, do‘stligimiz, bir-birimizga bo‘lgan hurmat saqlanib qolgan. Birodar Hasanovich har gal Qarshiga kelganida o‘sha damlarni eslab, «Qashqadaryo futboli hali so‘zini aytadi», - degan edim-ku, deb alohida ta’kidlashdan charchamaydi.
- Viloyatga birinchi rahbar bo‘lganingizda Qashqadaryo futbolida inqilobiy o‘zgarishlarga bosh-qosh bo‘lgan ekansiz...
- Ish faoliyatimning birinchi kunidan futbolga e’tibor qaratganman. Qarshi shahridagi sobiq «Mehnat» stadionini 37 kun ichida rekonstruksiya qildik. 30 ming tomoshabinga mo‘ljallangan stadionda barcha shart-sharoitlar yaratildi. Faqat elektron tablo o‘rnatishga ulgurmay qoldik. Alohida futbol jamoasi uchun baza barpo etdik. Oldimizda bitta vazifa turardi - «Mash’al» (Muborak)ning oliy ligadagi o‘rnini «Nasaf»ga olib, viloyat markazida bosh jamoa tuzish uchun astoydil intildik. Bu bo‘yicha turli fikr-mulohazalar bo‘ldi. Yakunda «Nasaf» nomi bilan jamoa Qarshi shahrida kuchlilar safida bo‘lishiga erishdik.
- Yoshingiz ulug‘lik sari yuz tutib borayapti. Sizni futbolimizdagi nimalar tashvishlantiradi?
- Bir vaqtlar ustalar jamoasi degan nom bo‘lar edi. Ana shu xayrli ishda yuqori pog‘onadagi sport mutasaddilari bosh qosh bo‘lgan ya’ni sport ustasi, xizmat ko‘rsatgan sport ustasi, birinchi, ikkinchi, uchinchi darajali futbolchi degan nom qaysidir ma’noda «charm to‘p» sohibiga ruhiy madad bergan. O‘z ustida ishlashga undagan. Imkon darajasida ana shu xayrli ish ko‘rib chiqilsa. Uzoq, chekka hududlarda iqtidorlar ko‘p. Bu bo‘yicha seleksiya ishlari yanada jonlantirilsa deyman. Murabbiylarimizni Yevropadagi top jamoalarda tajriba almashishlari yo‘lga qo‘yilsa. Legioner o‘yinchi, murabbiy masalasida ham biznikilardan bir pog‘ona yuqori bo‘lganlar yurtimizga taklif etilsa, ayni muddao bo‘lardi. Men bu fikr mulohazalarni oddiy muxlis sifatida izhor etdim. Chunki biz keksalar ham jamiyatimizda bo‘layotgan har bir o‘zgarish, Yangi O‘zbekistonni barpo etishda yurtboshimiz tomonidan olib borilayotgan xayrli va savob ishlarga befarq emasmiz.
- Maroqli suhbatingiz uchun dil tashakkurini qabul qilgaysiz.
- Fursatdan foydalanib, «InterFutbol» gazetasi ijodiy jamoasi, ko‘p sonli mushtariylariga minnatdorchilik bildiramiz. Ular nafaqat o‘zbek futboli, qolaversa bizni dunyo futboli yangiliklaridan voqif etib turishibdi. Gazeta ijodiy jamoasidagi xolislik, kuyinchaklik ila yo‘g‘rilgan maqolalar sog‘lom turmush tarzimiz asosi - millionlar o‘yiniga xizmat qilishiga qat’iy ishonaman.
SUHBATDOSH HAQIDA MA’LUMOT
Ozod Parmonov 1950 yil 19 avgustda Qamashi tumanidagi Qorabog‘ qishlog‘ida tavallud topgan. O‘rta ma’lumotni tumandagi O‘zbekiston maktabida olgan. Dastlab qishloq xo‘jalik texnikumi, so‘ng Moskva davlat pedagogika institutida tahsil olib, uni Nizomiy nomli Toshkent davlat pedagogika universitetida yakunlagan. Bir necha o‘quv yurtlariga rahbarlik qilgan. G‘uzor va Kitob tumanida birinchi rahbar bo‘lib faoliyat ko‘rsatgan. 1995 yilning noyabr oyidan 1998 yilning iyun oyiga qadar viloyat hokimi vazifasida ishlagan. Oilali, olti farzand va ko‘plab nabira va chevaralarning sevimli bobosi.
Husan TEMIROV suhbatlashdi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
