Ispaniyalik Xosep Gvardiolaning «Manchester Siti»da shuncha ushlanib qolishini kim kutgan yoki taxmin qilgandi?
Kataloniyalik mutaxassisning APLda missiya boshlaganiga ham 6 yil bo‘libdi. Hozirgi bosh murabbiylarga qarasak, birgina Yurgen Klopp APLga undan oldinroq bosh suqqan. Aniq-rog‘i, germaniyalik mutaxassis Angliyada kataloniyalik hamkasbidan 9 oy oldin ish boshlagandi. Asosiy fakt shuki, Pep shu 6 yil ichida «Manchester Siti» qiyofasini butunlay o‘zgartirib yubordi - ham o‘yin, ham tarkib nuqtai nazaridan.
Xosep Gvardiola 2015|2016 yillar mavsum yakunida APL turnir jadvalida 4-o‘rinni egallagan jamoa boshqaruvini qo‘lga oldi. Mana, «Manchester Siti» ortda qolgan vaqt davomida 4 marta chempion bo‘ldi va yana ikki bora kuchli uchlikka kirdi. Pep esa yo‘l-yo‘lakay jamoa tarkibini butunlay yangilashga ham ulgurdi. Har holda, 2016 yilgi «Siti»dan hozir birgina Kevin de Bryuyne qoldi, xolos. Taqqoslash uchun aytsak, «Tottenxem»da mavsum-2015|2016-dagi tarkibidan 5 nafar futbolchi bor - Ugo Lyoris, Garri Keyn, Son Xyun Min, Ben Devis, Erik Dayer. «Liverpul» va «MYU»da esa o‘sha mavsum o‘ynaganlar 4 nafardan.
Keling, endi Gvardiola kelishidan so‘ng «Manchester Siti» tarkibi qanday o‘zgarganini ko‘rib chiqamiz. Pep boshqaruvidagi ilk kelishuvlar bo‘yicha Ilkay Gyundogan, Leroy Sane, Nolito, Jon Stounz, Aleksandr Zinchenko va Klaudio Bravo «shaharlik»ka aylanishgandi. Chililik kiper o‘sha vaqt Angliya milliy jamoasi a’zosi sanalgan Jo Xart o‘rnini egallagan. Chunki u mavsumoldi yig‘inlarida Gvardiola talablariga mos kelmadi. Yakunda Jo ijara safariga jo‘nadi va «Siti»ga boshqa qaytmadi. Zinchenko ham ilk mavsumda ijara muddatini o‘tadi, farqi shuki, u PSVdan qaytgach, asosiy tarkibga bosh suqa boshladi. «Manchester Siti» mavsum yakunida Martin Demikelis bilan shartnoma muddatini uzaytirishni istamagan bo‘lsa, Samir Nasri va Elyakim Mangalani ijara kelishuvi bo‘yicha boshqa jamoalarga berdi.
Gvardiola chinakam qayta qurishni esa keyingi mavsumdan boshlandi, chunonchi, jamoa uning debyutida 3-o‘rin bilan cheklandi. Pepning talabi bilan darvozabon Ederson xarid qilindi, shuningdek, qanot himoyachilari Benjemin Mendi va Kayl Uoker hisobiga mudofaa mustahkamlandi. Aksincha, yoshi katta himoyachilar - Aleksandar Kolarov, Bakari Sanya va Pablo Sabaletaga javob berildi. Har uch futbolchi 30 yoshdan oshgandi, shuning uchunmi, asosiy e’tibor himoyaga qaratildi. To‘g‘ri, eski tarkibdan Yaya Ture va Vensan Kompani anchagacha chidashdi, ular Pep bilan tegishlicha 2018 va 2019 yillarda xayrlashishdi. Umuman, Gvardiola himoyaga qimmatbaho futbolchilar olish tendensiyasiga qattiq turdi - Ruben Diash (68 million yevro), Joau Kanselu (65 million yevro), Emerik Lyaport (65 million yevro), Benjemin Mendi (55,7 million yevro), Jon Stounz (55,3 million yevro), Kayl Uoker (55,6 million yevro). Lekin rekord transfer hujum guruhi vakiliga to‘g‘ri keldi, baribir. Eslatma, «shaharliklar» o‘tgan yili Jek Grilish xaridiga 117,5 million yevro ajratishdi. Avvalgi rekord Kevin de Bryuyne transferida qayd etilgan bo‘lib, summa birdaniga 41 «limon»ga oshdi.
«Siti» oxirgi yillarda aynan Gvardiola davrida porlagan afsona darajasidagi futbolchilardan ham voz kechdi. Deylik, 2020 yili David Silva ketdi, 2021 yili esa klub tarixidagi eng yaxshi to‘purar Serxio Aguero vaqti tugadi. Bu yil yozda «Manchester» safiga Pep davridan oldin qo‘shilgan yana ikki futbolchiga javob berildi. Ya’ni 2013 yildan buyon «shaharliklar» safida to‘p surgan 37 yoshli Fernandinyo qadrdon klubi - «Atletiko Paranaense»ga qaytdi, 2015 yili shartnoma tuzgan Rahim Sterling esa «Chelsi» tomon og‘di. «7 mavsum 11ta yirik sovrin. Butun hayot uchun xotira, - deb yozdi Sterling ketayotganida. - Bu yillar davomida murabbiylar shtabi rivojlanishimda katta rol o‘ynadi. Klubdoshlarim men uchun sherikdan ham katta ma’no kasb etishdi. Klubning barcha xodimlari, bizni hamisha chinakamiga qo‘llab-quvvatlagan muxlislardan ham minnatdorman. Qisqasi, «Manchester Siti»ga daxldor har bir kishiga rahmat. Klubga nisbatan hurmatimni to‘liq ifoda etolmayman. Birgalikda qanday yo‘lni bosib o‘tdik-a... Manchesterga kelganimda 20 yoshli yigitcha edim, bugun haqiqiy mard odam bo‘lib ketyapman».
Asosiy fakt: 2016 yilning iyun oyidagi tarkibga qarasak, «Siti»da birgina Kevin de Bryuyne qoldi. Belgiya milliy jamoasi yetakchisi «shaharliklar» safidan 2015 yilning avgust oyida joy olgandi. U 2021 yili shartnomasi muddatini mavsum-2024|2025 yakunigacha uzaytirdi. Gvardiola ham yarim himoyachi bilan xayrlashishni rejalashtirayotgani yo‘q: «Kevin jamoa uchun juda muhim ijrochi. U o‘z pozisiyasi bo‘yicha dunyo futbolida eng zo‘ri, shubhasiz. Ayniqsa, aql bilan yugurish asnosida bo‘sh hududlar ochishi maqtovga loyiq. Shunchaki, qoyilmaqom ijrochi. Qisqasi, juda zo‘r». Pepning shartnomasi esa 2023 yilning yozigacha amalda bo‘ladi. Kutilishicha, tomonlar hamkorlik muddatini 2025 yilgacha uzaytirishadi. Ehtimol, kataloniyalik shunchaki, Kevin de Bryuynedan oldin ketishni ham xohlamas...
Ravshan IBROHIM tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
