Qatar-2022 Kosta-Rika milliy jamoasi yarim himoyachisi Yelsin Texeda uchun faoliyatidagi 3-jahon chempionati bo‘ldi.
O‘z nomi bilan rossiyalik jurnalistlar e’tiborini tortgan futbolchi turnirda gol urish asnosida ham nazarga tushdi. Rossiya federasiyasi birinchi prezidenti sharafiga nom olgan stopper guruh bosqichi 3-tur o‘yinida kimsan Manuel Noyerni ojiz qoldirdi. Aytish o‘rinli, bu Yelsin uchun JCHdagi debyut gol bo‘ldi.
- Suhbat boshida ozgina ortga qaytamiz, JCH-2018 vaqti ismingiz tufayli Rossiyada sizga qanday munosabatda bo‘lishdi?
- Ha, esimda, ismim haqida tez-tez so‘rashgan va hammaga buning tarixini aytib bergandim. Ota-onam Rossiya sobiq prezidentini juda yaxshi ko‘rishgan, shuning uchun menga shunday ism qo‘yishgan.
— Yelsinlar oilasiga nima deyishni xohlardingiz?
- Aytadigan biror gapim yo‘q, shunchaki, ismim shunday va bu o‘zimga juda yoqadi. Ochig‘i, Yelsinlar oilasi haqida hech narsa bilmayman ham.
- Yelsinning siyosiy faoliyati bilan tanishmisiz? Ehtimol, ba’zi kitoblarini o‘qigandirsiz...
- Yelsin kimligini bilaman, ammo u haqda to‘liq ma’lumotga ega emasman, qiziqmaganman ham. Muhimi, ismim yoqadi. O‘zi Yelsin ismini otam tanlaganmi yoki onam - bunisini ham bilmayman.
— Sizga Rossiya klublaridan takliflar tushmaganmi?
- Hozircha yo‘q. Lekin qaysidir jamoa menga o‘z eshigini ochsa, tayyorman. Chunki Rossiyadek go‘zal va chiroyli mamlakatda o‘ynash o‘zgacha tajriba bo‘lardi. Qolaversa, bilishimcha, Rossiyada binoyidek chempionat va kuchli klublar bor. Xullas, u yerda o‘ynash imkoniyatini mamnuniyat bilan qabul qilardim.
- Rossiya termasi Qatar-2022ga bormadi. Bu masalada nima deya olasiz?
— Rossiya termasi munosib futbolchilarga ega ekanligidan xabarim bor. Lekin Yevropada raqobat baland, kuchli terma jamoalar juda ko‘p (aftidan, Yelsin Rossiya termasi saralashdan chetlashtirilganini bilmaydi).
- Rossiya safaridan qanday taassurotlar qolgan?
— Rossiyaga JCH-2018 startidan vaqtliroq tashrif buyurgandik, chunki jamoamizning o‘rtoqlik uchrashuvida maydonga tushishi rejalashtirilgandi. Ajoyib mamlakat, faqat biroz sovuqligini aytmaganda.
- Kosta-Rika termasi nemislarga qarshi uchrashuv davomida «pley-off»ga chiqish uchun real imkoniyat hosil qildi. O‘sha pallada qanday holatga tushdinglar?
- So‘z bilan ifodalashim qiyin. Butun jamoa shuni xohlagandi. O‘yin tugashiga 13 daqiqa qolgandi, bizda yana imkoniyatlar yuzaga keldi. Faqat yakuni o‘xshamadi, afsusdaman...
- Manuel Noyerdek kiper darvozasiga to‘p kiritganingizda, nimani his qildingiz?
- O‘zimni yo‘qotib qo‘yishimga sal qoldi. Odatda uncha ko‘p gol urmayman, jahon chempioni sanalgan Germaniya termasi darvozasini nishonga olish, yana mundialda... To‘g‘risi, bunday gol har qanday futbolchiga alohida zavq bag‘ishlaydi.
— Qatar-2022 siz uchun 3-mundial bo‘ldi. Endi to‘rtinchi turnirda ham qatnashishni rejalashtirayotgandirsiz...
- Albatta. Bu yo‘lda qattiq ishlash, o‘yinchilik sifatlarimni yaxshilab borishga tayyorman. Xudoning o‘zi jamoamiz bilan 4-jahon chempionatiga chiqishimda yordam berishidan umidvorman.
- JCH-2022dagi eng murakkab va yaxshi o‘yinlar...
- Har qanday o‘yin oldidan biroz asabiylik kuzatiladi. Axir JCHda sayyoramizning eng kuchli jamoalari o‘ynaydi. Startda Ispaniya termasi darvozamizni 7 marta nishonga oldi - juda og‘ir kun. Yaponlar ancha tezkorlar, Germaniya termasi esa jismoniy jihatdan kuchli. Xullas, Qatarda bir-biridan murakkab raqiblar bilan to‘qnash keldik. Tushunish kerak, bunday guruhdan «pley-off»ga chiqish oson emas. Ehtimol, boshqa kvartetga tushganimizda, yakun o‘zgacha ko‘rinish olarmidi?
- Sizningcha, joriy jahon chempionatida qaysi jamoa g‘alaba qozonadi?
- Buni hech kim bilmaydi. Kuchli va munosib jamoalar ko‘p. Masalan, menga Fransiya termasi uslubi yoqadi. Braziliya jamoasi ham o‘ta dahshatli. O‘ylaymanki, shu ikkisidan biri g‘alaba qozonadi.
MUHAMMADXON tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
