2022 yil futbol mavsumi o‘zining betakror o‘yinlari bilan tarixga muhrlanib qoldi. Qatarda bo‘lib o‘tgan mundial yilida o‘zbek futboli ham bir qator yutuqlarga erishdi.
Ayniqsa, Coca Cola - Cuperliga chempionati va kubok bahslaridagi murosasiz uchrashuvlar xuddi kechagidek yodimizda. O‘zining kombinasion o‘yinlari, quvnoq, shiddatli xujumkor hatti-harakati bilan alohida ajralib turgan «Nasaf» qayd etgan natijalar e’tirofga loyiq. Bu klub homiysi bilan birga taniqli mutaxassis Ro‘ziqul Berdiyev boshchiligidagi murabbiylar shtabi olib borgan keng ko‘lamli ishlar samarasi bejizga Ro‘ziqul Sa’dullayevich Superliganing eng yaxshi murabbiyi deb topilmadi. Maxsus muxbirimizning «Nasaf» bosh murabbiyi bilan suhbati 2022 yil yakunlari hamda 2023 yildan ko‘zlanayotgan marralar haqida.
- «Coca Cola - Cuperliga-ning eng yaxshi murabbiyi» deb topildingiz. Albatta, bu e’tirof zimmangizga katta mas’uliyat yuklaydi...
- To‘g‘ri aytasiz. Bu yuksak ishonchdan xursandman. Ko‘rsatilgan e’tirof uchun katta rahmat. Bilim va tajribamni futbolimiz ravnaqi yo‘lida sarflayman.
- Yakunlangan yil «ajdarlar» uchun chinakkam kurash yili, zavq-shavqqa to‘la damlar oni, so‘nggi daqiqalarda qo‘ldan chiqarilgan alamli bahslardan iborat bo‘lib qoldi...
- Haqiqatdan ham chempionat har yilgiga nisbatan kurashlarga boy bo‘ldi. Mavsum uzoq davom etdi. E’tiborli tomoni biz barcha turnirlarda muvaffaqiyatli qatnashdik. Alamli o‘yinlar haqida gap ketganda ko‘plab durang natijalar qayd etib, ochko yo‘qotdik. Bu mavsum oxirida o‘z ta’sirini ko‘rsatdi. Biroq, muxlislarga zavq, g‘alaba onlari ulashiladigan o‘yinlar ko‘p bo‘ldi.
- Yakunlangan mavsumda «Nasaf» O‘zbekiston jamoalari o‘rtasida eng ko‘p o‘yin o‘tkazgan klub deb e’tirof etildi. Yevropaning top klublari bilan taqqoslaganda bizning jamoalar ular ishtirok etgan o‘yinning hatto yarmini ham o‘tkazmaydi. Shunday ekan, biz o‘yinchilarda charchoq alomati degan gap-so‘zlarni tez-tez eshitib qoldik. Yoki milliy terma jamoa tarkibida bo‘lib o‘yin amaliyotini yo‘qotdi deb aytamiz. Ana shu fikr mulohazalarga munosabatingiz?
- Milliy terma jamoada o‘ynab qaytish hamma klublarda bor. Umuman o‘ynamasdan mashg‘ulotlar bilan cheklanib qolish holati ham uchrab turadi. Agar biz klublarimizni Yevropa jamoalari bilan taqqoslaydigan bo‘lsak, ularda ikkita, hatto uchtadan tarkib mavjud. Ushbu jamoalar tiklanish, vitaminizasiya jarayoniga juda katta e’tibor berishadi. Bunda iqlimimizni ham hisobga olish kerak. 45-50 daraja issiqda futbol o‘ynaymiz. Ularda esa aksincha, 25 daraja haroratda o‘yinlar namoyish etishadi. Jamoada 10ga yaqin tibbiyot xodimlari faoliyat ko‘rsatadi. Ular bevosita futbolchilarning tiklanish holati bilan mashg‘ul bo‘ladi. Bir o‘yindan so‘ng 3-4 kunda tiklanish jarayonini tasavvur qilib ko‘ring-a?! Top jamoalardagi futbolchilar yoshligidan jismoniy yuklamalarga tayyor. Bizning qit’amizdan Yaponiya, Janubiy Koreya jamoalari ular izidan borishga intilayapti.
- Barcha jamoalarda, shu jumladan «Nasaf»da ham hujum chizig‘ida muammolar bor. Buning yechimini qanday topsa bo‘ladi?
- Bu bo‘yicha ko‘proq ishlashimiz kerak. Bizda Dragan Cherandek mahoratli hujumchi masalasida ayrim qiyinchiliklar bor. 2022 yil mavsumida ham Husayn Norchayev ancha faollik ko‘rsatdi. Mavsum oxiridagi jarohati tufayli so‘nggi o‘yinlarda to‘laqonli ishtirok eta olmadi. Klubimiz qoshidagi maxsus futbol maktabida iqtidorli yoshlar bor. Ularni kuzatib borayapmiz. Eng avvalo bo‘lg‘usi futbolchining o‘zida ishtiyoq, g‘ayrat jo‘sh urishi lozim. Zafar Xolmurodov hujumchi bo‘lib tug‘ilmagan, biroq o‘zi intilib tupurarga aylangan. Bundan tashqari hujumlarni yakunlashda himoyachilar ham katta kuch hisoblanadi.
- Yangi mavsum oson bo‘lmasligi aniq. Chempionlik poygasida qatnashchilar soni ortsa-ortadiki, kamaymaydi. Shundan kelib chiqib «Nasaf» uch, hatto to‘rt frontdagi mavsumga qanday hozirlik ko‘rayapti? Jamoa o‘zagini saqlab qolish tarkibni kuchaytirish borasidagi ishlardan ko‘nglingiz to‘layaptimi?
- Mavsumga tayyorgarlikni dekabr oyida boshlagandik. Yanvarda ham bu davom etayapti. Mashg‘ulotlar kuniga ikki mahaldan olib borilmoqda. Og‘ir yuklamalar berilayapti.
Tarkibdagi o‘zgarishlarga kelsak, jamoaning asosiy o‘zagini saqlab qolishga erishdik. Jamoani Dilshod Saidov, Sharof Muhiddinov, Ivan Salovyov tark etishdi. Ular o‘rnini to‘ldirish rejasi bo‘yicha ishlayapmiz. Nazorat uchrashuvlari o‘tkazilayapti. «Buxoro» jamoasi bilan o‘yinda 5:1, 2:0 hisoblarida g‘alabaga erishdik. 2023 yil mavsumi yanada qiziqarli bo‘lishi kutilayapti. Barcha turnirlarda ishtirok etamiz. Maqsadimiz muxlislarni chiroyli o‘yinlar bilan xursand qilish. Musobaqalar mavqei baland jamoamizga ijara asosida to‘p surgan Abubakir Turdialiyev, Jo‘rabek Mannonov, Aziz Xolmurodov, Shohmalik Komilovlar qaytib kelishdi. Tarkibga Shuhrat Muhammadiyev, Javohir Siddiqov (ijara asosida)ni qabul qildik. 22 yanvardan mavsumga hozirlikni Turkiyada davom ettiramiz. Ukraina, Polsha, Gruziya, Qozog‘iston, Chernogoriya jamoalari bilan nazorat uchrashuvlari o‘tkaziladi. Keyin Turkiyadan Qatar tomon parvoz qilamiz. 19 fevral kuni OCHL 1|8 finali doirasida «Al-SHabab» (Saudiya Arabistoni) jamoasi bilan maydonga tushamiz.
- Raqib jamoani hozirdanoq o‘rganishni olib borayotgan bo‘lsangiz kerak?
- Xuddi shunday. «Al-SHabab» Saudiya Arabistonining yetakchi klublaridan biri. Tarkibida 8 nafar legoner o‘yinchilari bor. Qolgan futbolchilarning aksariyati mamlakat milliy terma jamoasining a’zosi. Tarkibni yanada kuchaytirish uchun izlanishdamiz. Xorij safarida safimizni yanada mustahkamlaymiz. Niyatimiz «Al-SHabab» to‘sig‘idan o‘tib, OCHL o‘yinlarida uzoqroqqa borish. Yurtimiz sharafini munosib himoya qilishdir. Bu borada viloyat hokimligi, futbol assosiasiyasi, bosh homiyimiz «Sho‘rtangazkimyo majmuasi» rahbariyati har tomonlama qo‘llab-quvvatlab turishibdi. Biz bu g‘amxo‘rlikka, albatta ijobiy natijalar bilan javob beramiz.
- Qatarda bo‘lib o‘tgan jahon chempionatidan olgan taasurotlaringiz?
- Barcha o‘yinlarning guvohi bo‘ldik. Uchrashuvlar vaqti haqida ham gap yo‘q. Mundialda natija birinchi o‘ringa chiqdi. Kombinasion o‘yinlar ikkinchi bosqichga tushdi. Ko‘p jamoalar asosiy e’tiborni himoyaviy qarshi o‘yinga qaratdi. Argentina g‘oliblikka munosib bo‘ldi. Fransiya, Xarvatiya, hatto Marokash o‘yinlari chakki emas. Demak, astoydil intilgan quruq qolmas ekan. 2026 yilda O‘zbekiston milliy terma jamoasini ham mundialda ishtirokini orzu qilib qolamiz.
Husan TEMIROV suhbatlashdi
Xorazm
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
