David Luis futboldagi eng taniqli chehralardan biri ekanligini barchamiz yaxshi bilamiz. U to‘p bilan bo‘ladimi yoki to‘psiz, maydondagi eng sovuqqon futbolchi edi.
«Chelsi», «PSJ» va «Arsenal»ning sobiq markaziy himoyachisi FIFA rasmiy saytiga intervyu berib, unda Gabigol, Vinisius Junior, «Flamengo» muxlislari va Yevropaning klublar o‘rtasidagi jahon chempionatidagi monopoliyasini tugatish imkoniyatlari haqida gapirdi.
- Klublar o‘rtasidagi JCH-2012da «Kumush to‘p»ga ega chiqqandingiz, ammo finalda «Chelsi» «Korintians»ga yutqazgandi. O‘sha kampaniyada nima bo‘lgandi sizlarga?
- Men, shubhasiz, ushbu turnirda ikkinchi eng yaxshi futbolchi nomini chempionlikka o‘zgartirgan bo‘lardim. Afsuski, o‘sha kuni «Korintians» juda yaxshi o‘ynadi. Ayniqsa, Kassio o‘zgacha edi va adolatli tarzda turnirning eng yaxshi futbolchisi deb topildi. Bu futbol. Ammo futbolchi sifatida doimo eng katta musobaqalarda o‘ynashni xohlaysiz, klublar o‘rtasidagi jahon chempionati esa har bir futbolchi ishtirok etishni hohlaydigan turnirlardan biridir. Men ko‘p marta g‘alaba qozonganman, shuning barobarida ko‘p marta yutqazganman ham. Klublar o‘rtasidagi mundial kubogi hozircha kolleksiyamda yo‘q. Shunday ekan, endilikdagi asosiy missiyam aynan shu sovrinni qo‘lga kiritishdir.
- Qatar-2019 finalida «Flamengo»ning «Liverpul»ga qo‘shimcha taymdagi mag‘lubiyati haqida qanday fikrdasiz?
- «Flamengo» o‘sha finalda juda yaxshi o‘ynagandi, ammo, afsuski, mag‘lub bo‘ldi. O‘sha yillarda «Liverpul» o‘ta kuchli bo‘lganini unutmaylik. Ular maydonning hamma joyida yaxshi edilar - hujumda ham, himoyada ham. Ular Chempionlar ligasida, Premyer-ligada g‘alaba qozonishdi. Shunday ekan, o‘shanda «Flamengo» bunday jamoaning hayotini qiyinlashtirish uchun juda yaxshi ish qildi.
- «Flamengo»ga 2022 yilgi Libertadores kubogi finalida yordam berdingiz. Faoliyatingizdagi eng yaxshi lahzani qaysi kun bilan bog‘lash mumkin?
- Bu mening faoliyatimdagi eng yaxshi sahifalardan biri edi. Kutilmaganda keldi. Deyarli butun faoliyatimni Yevropada o‘tkazdim, u yerda futbolchi sifatida o‘sganman. Hech qachon Braziliyaga qaytish niyatim yo‘q edi. Birdan hamma narsa o‘zgardi. O‘sha kuni mening ikkinchi Libertadores finalim edi. Va men «Flamengo»ga g‘alaba qozonishiga yordam bera oldim. Bu orqali Ham Chempionlar ligasi, ham Libertadores kubogida g‘alaba qozongan sanoqli futbolchilar guruhiga kirdim. Adashmasam, ular 13 yoki 14 nafarni tashkil etishadi, shuning uchun men uchun bu alohida narsa edi.
- 2019 yilda Libertadores finalida «Flamengo»ning ikkita goliga mualliflik qilgan Gabigol yana bu o‘yinda g‘olib bo‘ldi. U haqida qanday fikrdasiz?
- U ajoyib futbolchi, «Flamengo»dagi eng katta nomlardan biri. U futboldagi eng yaxshi ishni qilish - gol urish uchun tug‘ilgan. Gol urishni yaxshi ko‘radi, bo‘lgandayam buni katta o‘yinlarda qiladi. Umid qilamanki, bu ishini «Flamengo»da uzoq vaqt davom ettira oladi.
- Yevropa jamoalari ketma-ket 9ta klublar o‘rtasidagi JCH chempionligini qo‘lga kiritishdi. «Flamengo» Janubiy Amerikadagi qurg‘oqchilikni to‘xtata oladimi?
- Shunga umid qilaman. Birinchidan, bizda yarim final bor, bu juda va juda qiyin bo‘ladi. Bunga hech qanday shubha yo‘q. Bu jamoalar (Evropa va Janubiy Amerikadan tashqarida) tobora yaxshilanmoqda, shuning uchun biz qo‘limizdan kelganicha tayyorlanyapmiz va ularning qiyinchiliklariga jiddiy yondashyapmiz. Final esa yanada qiyin bo‘ladi. Lekin biz borimizni beramiz.
- Santa Klaus kiyimini kiyib, Rojdestvo uchun sovg‘alar tarqatdingiz. Yigitlardan birortasi sizdan ushbu turnir chempionligini so‘raganmi?
- (Kuladi) Ularning deyarli hammasi so‘radi! Bu nafaqat barcha bolalarning, balki butun Flamengo xalqining yana jahon chempioni bo‘lish orzusi. Bunday kattalikdagi klub uchun ancha vaqt bo‘ldi. Aytishim mumkinki, biz har kuni shu haqda o‘ylaymiz.
- «Real Madrid» Marokashda g‘alaba qozonish uchun favorit hisoblanadi. Ular haqida qanday fikrdasiz?
- Dunyoning eng yaxshi murabbiylaridan biriga ega bo‘lgan sayyoramizning eng yaxshi jamoalardan biridir. Shubhasiz, ular asosiy favoritlardir. Ular o‘zlarining tarixlari, nou-xaulari, mukammalligi va o‘yinchilarining sifati tufayli ishtirok etadigan har bir musobaqada favorit hisoblanishadi. Lekin futbolda hamma narsa bo‘lishi mumkin. Jahon chempionatida buni yana bir bor ko‘rdik. O‘yinlarni kichik detallar bilan hal qilish mumkin. Biz o‘z qurolimizni eng yaxshi tarzda tayyorlashga harakat qilamiz, shunda duch keladigan har qanday vaziyatga tayyorlangan musobaqalarga yetib boramiz.
- Vinisius Junior va Karim Benzema haqida qanday fikrdasiz?
- Men Vinisius uchun juda xursandman, ayniqsa Yevropaga kelganida unga qilingan munosabatdan so‘ng erishgan barcha narsalaridan. Ko‘pchilik unga, o‘yiniga ishonmadi. Fidoyilik, mehnatsevarlik va kamtarlik orqali u dunyoning eng yaxshi o‘yinchilaridan biri ekanligini isbotlashga muvaffaq bo‘ldi. U «Real Madrid»ga ochlik va ambisiyalarga to‘la holda keldi. Birinchi jamoada debyut qilgandi, lekin kutilmaganda uni «Kantera» (yoshlar jamoasi)ga jo‘natishdi. Bunday munosabat ko‘pchilik o‘yinchilarni vayron qilgan bo‘lardi, lekin Vinisius boshini egdida, juda ko‘p ishladi va endi o‘zi ekkan narsasining mevasini olmoqda. Benzemaga kelsak, u allaqachon dunyoning eng yaxshi futbolchisi sifatida tan olingan. U aql bovar qilmas sifatga ega. Shubhasiz, dunyoning eng yaxshi hujumchilaridan biri.
- 2021 yilda Braziliyaga qaytganingizdan beri ajoyib formadasiz. Bu sizning faoliyatingizdagi eng yaxshi davr bo‘lishi mumkinmi?
- Bilmayman. Dunyoning eng yirik musobaqalarida, o‘yinlarida o‘ynagan paytlarim bo‘lgan. Lekin 35 yoshda bo‘lish, sayyoramizning eng yirik klublaridan birida o‘ynash, klub ishtirok eta oladigan eng yirik musobaqalarda o‘ynash, shubhasiz, faoliyatimdagi eng yuqori ko‘rsatkichlardan biri. Har bir klubimda unvonlar yutish imkoniyatiga ega bo‘ldim. Yutuqlarga erishishimda yordam bergan barcha insonlar va klublardan juda minnatdorman. Bu, shubhasiz, faoliyatimdagi eng go‘zal lahzalardan biri.
- «Flamengo» muxlislari haqida qanday fikrdasiz?
- Muxlislar oldidagi qarzim uchun «Flamengo» bilan shartnoma imzoladim. Men ularga qo‘shilishdan oldin ham ularning mehrini his qildim. Flamengo ahli boshqa dunyodan. Shubhasiz, hamma odamlar ko‘pchilikka baxt keltira oladigan holatda bo‘lishni xohlaydi. Bu klub bilan o‘yinlarda g‘alaba qozonish, unvonlarni qo‘lga kiritish ajoyib tuyg‘u. «Flamengo»da ekanligimdan juda xursandman.
Manba: FIFA.com,
M.PO‘LATOV tayyorladi
Dinamo
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
