«Inter» 2020/2021 yillar mavsumida skudettoni qo‘lga kiritgandi, o‘tgan mavsumda hamshahri «Milan»dan 2 ochkoga ortda qolib, vise-chempionga aylandi.
Joriy mavsumda «neradzurri» ichki chempionatda yetakchi uchlikda bormoqda, YECHLda chorak finalga yetib keldi. Jamoaning 5 yil avvalgi holatini inobatga olsak, hozirgi ko‘rsatkichlari chakki emas.
Lekin boshqa tomondan, «Inter» faqat YECHL yo‘llanmasi uchun emas, balki chempionlik uchun kurasha oladigan klub. U yerdagilarning hammasi izzattalab: o‘yinchilar, murabbiy, rahbariyat, ayniqsa, jamoani muntazam ravishda yuksak cho‘qqilar sari chorlab turadigan bosh direktor Juzeppe Marotta. «Qora-ko‘klar» chindan ham beqaror mavsumni o‘tkazishmoqda, ammo buning sabablari yo‘q emas. Klub o‘z sohibining aybi bilan murakkab moliyaviy holatga tushib qoldi va rivojlana olmayapti. Hozir «Inter» samarali transferlarga ham, infratuzilmaning kelajakda foyda keltiradigan darajaga ko‘tarilishiga ham umid qila olmaydi. Jamoa joyidan jilmay qoldi. gap Lukakuning yomon sport formasida ekanligi yoki Simone Inzagi kerakli pallada shogirdlarini qo‘zg‘ata olmayotganida ham emas. Iqtisodiy salohiyat zamonaviy futbolning eng muhim omili, «neradzurri»ga aynan shu yetishmayapti.
Italiyaning Calcio Finanza nashrining ta’kidlashicha, «qora-ko‘klar» prezidenti Stiven Chjanni 300 mln. yevroli qarziga oid ish yuzasidan ozodlikdan mahrum etishlari mumkin. Ma’lumotlarga ko‘ra, Xitoy qurilish banki (dunyodagi eng yirik banklardan biri) funksionerni qarzini to‘lamaganlikda ayblamoqda. Kreditorlar Chjanga nisbatan Italiya, Gonkong va AQSHda jinoiy ish qo‘zg‘atishdi. Agar sud uning qarzlarni to‘lamaslik uchun o‘z daromadlarini yashirganini aniqlasa, qamoq jazosiga tortilishi mumkin.
Prezidentning holati klubga to‘g‘ridan-to‘g‘ri ta’sir ko‘rsatadi. Avvalgi moliya yilini «Inter» 140 mln. yevro zarar bilan yakunlagandi. Hatto jamoaning YECHLdagi ishtiroki va yangi mavsumda ham nufuzli turnirda qatnashishi ham yetakchi o‘yinchilarning tarkibda qolishlarini ta’minlay olmaydi. Mutasaddilar hozirning o‘zida Lukakuni xarid qilish va Milan Shkrinyarning yangi shartnomasi uchun mablag‘ topa olmayaptilar. Bu ikki futbolchi mavsum yakunida jamoani tark etadilar, ularning o‘rnini bosadigan o‘yinchilar xarid qilinadimi, yo‘qmi, ma’lum emas. «Inter»da yechimini kutayotgan muammo faqat shu emas. Iyun oyida Samir Xandanovich, Edin Jeko, Danilo D`Ambrozio, Stefan de Vrey va Robin Gosenslarning shartnoma muddatlari nihoyasiga yetadi. Hoqon Chalxanoglu, Genrix Mxitaryan, Matteo Darmian va Alessandro Bastonilar esa kelishuvga binoan, yana 1 yil to‘p suradilar, xolos.
Bu o‘yinchilarning amaldagi shartnomalari muddatini uzaytirish va yangi xaridlar uchun «neradzurri»ga mablag‘ zarur. Biroq sohibi zimmasida 300 mln. qarzi bor klub pulni qayerdan oladi? YECHLning chorak finaliga chiqqani uchun jamoa 20 mln. yevro oladi. Risoladagidek rag‘bat, ammo vaziyatga umumiy baho berganda, unchalik sezilarli emas.
Xullas, mavsumlar oralig‘ida «Inter» tarkibida jiddiy o‘zgarishlar yuz berishi mumkin. Vaziyatdan kelib chiqadigan bo‘lsak, jamoa eng qimmat o‘yinchilaridan voz kechishga majbur. Masalan, Denzel Dyumfris, Nikolo Barella, Marselo Brozovich va Lautaro Martineslarning bozori chaqqon bo‘lishi aniq. shunga o‘xshash voqea 2021 yilda bo‘lib o‘tgandi. O‘shanda «neradzurri» chempionlik mavsumidan keyin Chjan bilan birgalikda Romelu Lukaku va Ashraf Hakimilardan judo bo‘lgandi. To‘g‘ri, jamoa risoladigidek mablag‘ga ega bo‘ldi. Biroq belgiyalik va marokashlik ijrochilarsiz tarkib ancha zaiflashib qoldi.
Buni tezda ilg‘ab olgan Antonio Konte rahbariyatning mazkur siyosati yaxshilikka olib bormasligini tushundi va jamoani tark etdi. Simone Inzagi esa hech qayoqqa ketgani yo‘q, boriga shukr, yo‘g‘iga sabr qilgan holda ishlamoqda. Vaholanki, tarkibni kuchaytirish u yoqda tursin, hatto saqlab qolish ham gumon ekanligini yaxshi biladi. qo‘shimchasiga, jiddiy bosim ostida ishlamoqda. Chunki agar jamoa mavsumni YECHL yo‘llanmasisiz yakunlaydigan bo‘lsa, bosh murabbiyga chiqish eshiklari ochib qo‘yilishini yaxshi biladi. Boshqa daromad manbalari bo‘lmagan «neradzurri» faqat xalqaro turnirlardagi muvaffaqiyatli ishtirok evaziga pul ishlashi mumkin.
Jamoaning hozirgi tarkibiy salohiyati yangi mavsumda YECHLda to‘p surish huquqini va joriy mavsumda yarim finalga chiqishini ta’minlay oladi. Biroq yaqin kelajakdagi holati mavhumligicha qolmoqda. Chjan «Inter»ni sotishi mumkin, qabilidagi ma’lumot ham yo‘q emas. Unga ko‘ra, xitoylik funksionerni 1,2 mlrd. yevro qoniqtiradi. Biroq klubni sotib olishga tayyor turgan «jazman» xaridor hozircha, mavjud emas. Hammasi tezda o‘zgarishi ham mumkin, ammo «qora-ko‘klar» o‘ta qaltis davrni boshdan kechirmoqdalar.
S.RAHMONOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
