“Andijon” hamda Qirg‘izistonning “Muras Yunayted” (2:2) jamoalari o‘rtasidagi uchrashuvdan keyin mehmonlar bosh murabbiyi Valeriy Berezovskiy bir qator savollarga javob qaytardi.
- Valeriy Yuryevich, o‘rtoqlik uchrashuvidan olgan taassurotlaringiz bilan o‘rtoqlashsangiz.
- Avvalambor, rahbariyatimizga juda kerakli qarorni qabul qilishgani uchun minnatdorchilik bildiraman. Bunday o‘yinlar orqali do‘stligimiz yanada mustahkamlanadi, bordi-keldimiz yaxshilanadi va do‘stona munosabatlarimiz bundan-da yaxshilanadi. O‘ylaymanki, ikkala davlat o‘rtasidagi munosabatlarning yaxshilanib borayotgani ikki tomon uchun ham foydali. Mana, xalqaro o‘rtoqlik uchrashuvi orqali ham bu narsa namoyon bo‘lmoqda. Biz ikki qardosh millat va ikki qardosh mamlakatmiz. Uzoq yillardan beri biz qo‘shni sifatida birga yashaymiz. Mana bunday o‘rtoqlik uchrashuvlari esa do‘stligimizni yanada mustaxkamlaydi. Sportning qator turlari, xususan futbolda ham qo‘shni davlatlar bilan hamkorlik qilish albatta uning taraqqiyotiga hissa qo‘shadi.
Oxirgi yillardagi o‘zbek futbolining yutuqlari va yurtingiz bilan hamkorlik qilish bizga albatta foyda keltiradi. Ayniqsa, o‘zbekistonlik yoshlar, U23, U20 terma jamoalarining yutuqlarini doimo kuzatib boramiz. O‘zbekistonda futbol yanada rivojlanyapti. Azaldan o‘zbek futboli o‘zining jozibadorligi bilan barchamizni maftun etib kelgan. Bunday o‘rtoqlik uchrashuvlaridan faqat xursand bo‘lamiz. Bu yerda bizni juda yaxshi kutib olishdi. Maydonning holati ham zo‘r. “Andijon”ni juda yaxshi jamoa ekanligini maydonda ko‘rdik. Ha, tushunaman, bu o‘rtoqlik uchrashuvi. Agar rasmiy o‘yin bo‘lganida balki ikkala jamoa futbolchilari boshqacha o‘yin ko‘rsatishlari mumkin edi. O‘ylaymanki, bugun har ikkala jamoa chiroyli o‘yin namoyish qildi. Bellashuv haqida nima deyishim mumkin? Birinchi bo‘limning dastlabki 30 daqiqasi bizning rejamiz asosida o‘tdi. Iloji boricha raqib o‘yinchilariga imkoniyat qoldirmaslikka harakat qildik. Ajoyib o‘ynab gol urishga muvaffaq bo‘ldik. Bizda tanaffus bo‘lgani sababli hozir mashg‘ulotlarimiz biroz kamaygan payt. O‘z navbatida “Andijon” ham yaxshi harakat qilib, muvozanatni tenglashtirishga erishdi. Ikkinchi raqam ostida o‘ynab raqibning bo‘sh hududlarini poylab qarshi hujumlarga e’tibor qaratdik. Yaxshi o‘ynadik, deya olaman. Baribir oz-moz kamchiliklar, individual xatoliklar ham ko‘zga tashlandi. Shunday bo‘lsa-da, o‘yindan va natijadan qoniqdim.
- Jamoalarning avvalgi birinchi uchrashuvidagi o‘yinni ham ko‘rgandim. Oldingi uchrashuvga nisbatan bu safar jamoangiz ancha yaxshi o‘ynadi. Bu borada sizning fikringiz qanaqa?
- Afsuski, bizni mamlakatimizda sizlarnikiga nisbatan sifatli maydonlar kam. Maydon sifati albatta o‘yinga o‘z ta’sirini ko‘rsatadi. Hattoki, Jaloloboddagi o‘z maydonimizda bo‘ladigan uchrashuvlarda o‘ynashga ba’zi holatlarda qiynalamiz. Bishkekdagi “Spartak” maydonini ancha sifatli deyishim mumkin. O‘yinchilarim yaxshi maydon va yetarli sharoitlar bo‘lganida chiroyli o‘yin ko‘rsata oladilar. Ko‘ngildagidek maydon bo‘lsa, futbolchilarimiz ham yaxshi natijalarni qo‘lga kiritishiga ishonaman. Taklif qilishgani uchun katta rahmat. Biz bu uchrashuvdan nihoyatda mamnun bo‘ldik. Hamkorlik qilish orqali ko‘plab natijalarga erishishimiz mumkin va bunday hamkorlikdan boshimiz osmonga yetadi.
- Qirg‘izistonda futbol asta-sekinlik bilan rivojlanyapti. 5-6 yil avvalgiga nisbatan ancha rivojlanish bor...
- Albatta, bugungi kunda Qirg‘iziston futboli rahbariyati tomonidan bu sport turini rivojlantirishga jiddiy e’tibor qaratilyapti. Bizda tajribali murabbiylar joriy qilinyapti va ularning malakasini oshirish bo‘yicha ishlar amalga oshirilyapti. Xorijdan ham bir qator mutaxassislar jalb qilinyapti. Bu borada milliy terma jamoamiz ham asta-sekinlik bilan xalqaro maydonlarda yuqori natijalarga erishmoqda. Gapingizga qo‘shilaman, to‘g‘ri yutuqlarimiz katta emas, ammo kichik bo‘lsa-da, o‘sha yutuqlarga erishilyapti.
- Sizga “Andijon” futbolchilaridan ko‘proq kimlarning o‘yini yoqdi?
- Taktik, o‘yin tashkil qilish, jismoniy jihatdan o‘yinchilaringiz biznikiga nisbatan kuchliroq bo‘lishi mumkin. To‘g‘risi, asosan o‘zimizning futbolchilarni ko‘proq kuzatib bordim. Chunki ushbu uchrashuvda bizning o‘z vazifamiz bor edi. Yana bir bor ko‘rdimki, “Andijon” ajoyib jamoa ekan va bunga guvoh bo‘ldim. Bu jamoaning o‘yinlari hamda natijalarini kuzatib bordim. Jamoangizni hozirda turnir jadvalining 6-o‘rinda borayotganini ham bilardim. “Andijon” klubining natijalari bilan tanishib chiqdim. Yaqinda “Paxtakor”ni mag‘lub etdi. Oldingi yillarga nisbatan olib qaraganda, bu yil klubda o‘sish bo‘layotganini, jamoa quyida emas, balki peshqadamlarga asta-sekin yaqinlashib borayotganini ko‘rish men uchun yoqimli bo‘ldi. O‘ylaymanki, shunday tarzda ishlashni davom ettirsa, keyingi yillarda yuqori o‘rinlar uchun kurashadigan jamoaga aylanadi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
