«Milan»ning o‘ng qanot himoyachisi Davide Kalabriya yaqinda klubning BMW bilan hamkorlik dasturi doirasida suratga olish jarayonida qatnashdi.
«Rossonerlar» rasmiy sayti vakillari esa fursatdan unumli foydalangan holda, undan qisqacha intervyu olishdi.
Milan shahri
- Milanga bog‘liq xotiralarim ajoyib, shahar menga har tomonlama ma’qul. Aslida Breshiyada tug‘ilganman, lekin Milan meni o‘ziga tamomila maftun qildi. Har holda, shaharda ko‘ngilochar maskanlar juda ko‘p. Qisqasi, hammasi ideal: odamlar ochiqko‘ngil, sayyohlar, o‘yin-kulgu... Oddiy aytganda, Milanda yashash uchun eng yaxshi sharoitlar mujassam.
Faoliyati va oliy maqsadi
- Ayni payt faoliyatimning eng yuqori cho‘qqisidaman. Umuman, yaqin bir necha yil men uchun juda muhim. Tushunarliki, hozir tezlikni tobora oshiradigan yoshdaman. Ambisiya va umidlar shunga yarasha katta, bu gap ham shaxsiy, ham jamoaviy maqsadlarga tegishli. Umuman, «Milan» o‘zining odatiy darajasini tiklashga munosib.
«San Siro»da ko‘rgan ilk o‘yini
- Hammasi esimda: ilk marta «Milan»ning CHLdan o‘rin olgan «Lill»ga qarshi o‘yinini bevosita stadionda ko‘rgandim. Yoshlar jamoasida shug‘ullanganim uchun «San Siro»ga ko‘p tashrif buyurolmasdim. Agar vaqt topsam, doim yashil sektorga borardim, chunki chiptasi nisbatan arzon edi. Ochig‘i, kun kelib, bu arenada o‘ynashni xayolimga ham keltirgan emasman. Bu haqda faqat 15-16 yoshdan keyin o‘ylay boshladim.
Ilk ampluasi
- Aslida sof yarim himoyachi edim, ehtimolki, o‘yinga ko‘proq aql bilan yondashishim tufaylidir. «Milan»ga ham yarim himoyachi sifatida keldim, keyin uch yarim himoyachi uslubida toblandim. Inzagi esa meni himoyaning chap tomoniga qo‘ydi. Muhimi, yangi pozisiyada o‘zimni yanada qulayroq seza boshladim. Keyingi mavsum murabbiy meni o‘ng tarafga o‘tkazdi va maydonda asl joyimni topdim.
«Milan»dagi debyuti
- O, qanday ajoyib lahza... To‘g‘ri, faoliyatimdagi eng yaxshisi emas. Oradan 1 yil o‘tgach, ijara safariga ketish yoki qolish masalasida qaror qabul qilishda rosa ikkilandim, chunki mavsum bo‘yi atigi 2-3ta o‘yinda maydonga tushgandim. Shunda Sinisha Mixaylovich oldiga chaqirib, shubhalarimni tarqatib yubordi: «Seni yaxshi ko‘raman, klubda qolishing kerak, hali vaqting ham keladi». O‘shanda 18 yoshli yigitcha edim. Mixaylovich qat’iyatli va bir so‘zli edi va unga to‘liq ishondim. Yakunda adashmaganim ma’lum bo‘ldi.
MUHAMMADXON tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
