Jahon futbolida Fransiya kubogidek sensasiyalarga to‘la turnir topilmasa kerak.
Quyi divizion vakillarining aql bovar qilmas yurishlariga yetarlicha misollar keltirish mumkin. To‘g‘ri, mamlakat kubogining joriy mavsumi 1|32 finali yuraklarni o‘ynatuvchi kutilmagan natijalarsiz yakunladi. Lekin Fransiya chempionati piramidasida beshinchi o‘rinda turuvchi divizion vakili - «Korte» shunday «syurpriz» ulashishga juda-juda yaqin kelgandi. Diqqat qiling, havaskorlardan tuzilgan bu jamoa o‘ta kuchli «Nissa»ga qarshi bahsning asosiy vaqtini 1:1 hisobida yakunladi. Agar «Korte» futbolchilari penaltilar seriyasida sovuqqonlikni saqlab qolishganidami, «Nissa» toza sharmandalikka yo‘liqardi...
«Nissa»ning Fransiya kubogi 1|32 finalidan muammosiz o‘tishi kutilgandi. Har holda, qur’a Liga 1ning eng barqaror ishtirokchilaridan biriga Beshinchi divizion vakili «Korte»ni tortiq etdi. Bu klubning o‘ziga xos tomoni shuki, u Korsika oroli sharafini himoya qiladi. Korsikaliklar esa hech qachon o‘zlarini to‘laqonli fransuz hisoblashmaydi. Mahalliy aholi shevasi ham italyan tiliga o‘xshab ketadi. Korsikada fransuzcha emas, faqat italyan tilida so‘zlashuvchi odamlar ham yetarli. Tarixga nazar solsak, Fransiyaning eng nomdor imperatori Napoleon Bonapart ham korsikalik bo‘lgan. U bolaligida italyan tilida gapirgan va faqat 10 yoshni qarshi olganidan keyingina fransuzchani o‘rgana boshlagan.
Futbolga qaytsak, «Korte»ning logotipi Korsikaning yana bir klubi «Ayachcho»nikiga o‘xshash. E’tiborlisi, «Korte» hududning ushbu ancha nomdor vakilidan 2 yil oldin tuzilgan. Ya’ni «Korte»ga 1908 yili asos solingan («Ayachcho» esa 1910 yilda tashkil etilgan). Yana bir tomoni, uzoq vaqt davomida Korsika hududiy chempionatidan nariga o‘tolmagan «Korte» 2020 yilga kelibgina Beshinchi divizionga ko‘tarildi. Xullas, Korsika klubi kamtarona tarixi va maqomiga qaramay, 1|32 finalda «Nissa»ga haqiqiy jang taklif qildi va yuqori divizion vakilini «oyog‘idan tortib qolishi» hech gap emasdi. Har holda, «Korte» futbolchilari 11-daqiqada hisobni ochishdi va asosiy vaqtni 1:1 hisobida yakunlashga muvaffaq bo‘lishdi. Ha, «Nissa» 39-daqiqadayoq maydonda kamchilik bo‘lib qoldi, lekin kuchlar nisbatida farq katta edi, baribir. Mehmonda o‘ynagan Liga 1 klubi har tugul ikkinchi bo‘limda hisobni tenglashtirish yo‘lini topdi. Muhimi, «Korte» barchasini penaltilar seriyasigacha cho‘zdi va «Nissa»ni kubok uchun kurashdan chiqarib yuborishga yaqin keldi. Biroq «lotereya»da omad havaskorlardan yuz o‘girdi - 3:5.
Insof yuzasidan aytish kerak, «Nissa» aslida yaqqol ustun ko‘rindi o‘yin davomida. Jamoaning tahlikali penaltilar seriyasigacha borishida esa bosh «aybdor» - bu «Korte»ning 35 yoshli darvozaboni Jak-Andre Lyusiani. Gap hech qachon professional darajada o‘ynamagan oshpaz haqida ketmoqda. U A La Pasta Corte oilaviy restorani egasi va bosh oshpazidir. Jak-Andre taomlarni yaxshi tayyorlaydi. Har holda, TripAdvisor saytida uning restoraniga ancha yuqori baho berilgan - 4,5 ball. Ma’lum bo‘lishicha, Lyusianining oilaviy restoranida asosan italyancha taomlar tayyorlanadi. Endi diqqat qiling, shu oshpaz uchrashuv davomida «Nissa» futbolchilari yo‘llagan 16ta zarbani bartaraf etdi. Professionallarga qarshi 16ta «seyv»! Bejiz Fransiya matbuotida Jak-Andrening ishonchli harakatlari alohida ta’kidlanmadi. «Nissa» klubi rasmiy sayti ijodkorlari ham Lyusianini maqtashdan o‘zlarini to‘xtatib qololmadilar: «Darvozabon emas, o‘tib bo‘lmas devor! Shunchaki, respekt!» Korsikaliklar yuritadigan Corse Matin saytida esa Lyusianiga «Bahaybat» ta’rifi ishlatildi. To‘xtang, endi asosiy fakt: sofascore portali pazanda-kiperning o‘yiniga maksimal baho qo‘ydi - 10,0 ball. Bunaqasi hatto Lionel Messi va Krishtianu Ronalduga ham butun faoliyati davomida 1-2 marta nasib etgan, xolos. Oddiy aytganda, sofascore portalidan 10 ball olish eng yetuk yulduzlarga ham orzudek gap...
M.HOSHIMOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
