"Navbahor" – "Andijon" (2:2) o‘rtasidagi uchrashuvdan keyin tashkil qilingan matbuot anjumanining dastlabki qismida andijonliklar bosh murabbiyi Aleksandr Xomyakov jurnalistlarning savollariga javob qaytardi.
- Bunday derbilar hissiyotlarga boy va boshqacha ruhda o‘tadi. O‘ylaymanki, ushbu safargi vodiy derbisi ham o‘zini oqladi. Hissiyotlarga, gollarga, vaziyatlarga boy bo‘ldi. Ob-havo ham turtki bo‘ldi, o‘yindan avval yomg‘ir yog‘di. Maydon futbol o‘ynash uchun yaxshi holatda edi. O‘ylaymanki, qiziqarli uchrashuv guvohiga aylandik. Oxirigacha intriga saqlanib turdi. O‘yin yakuni asabiy o‘tdi. Maydonda kamchilik bo‘lib qolganimizdan keyin ham hisobni tenglashtirish uchun oldinga tashlangan futbolchilarimga qoyil qolish kerak. Albatta, bizni bundan boshqa yo‘limiz ham yo‘q edi. Barchasini juda yaxshi tushunib turgandik. Chunki bizni juda katta muxlislar armiyasi qo‘llab-quvvatlab turgandi. Ular bizga qayg‘urishyapti, ishonishyapti hamda doimgidek g‘alabani kutishyapti. Murabbiy sifatida bir qancha holatlar meni qoniqtirmadi. Bir qator rejalarimiz o‘xshamadi. Raqib bizga o‘ynashimiz uchun imkoniyat yaratib berdi. Bunday paytda boshqacharoq o‘yin ko‘rsatsak bo‘lardi. Birinchi va ikkinchi bo‘limdagi tezkor gollar esa bizni taslim qilmadi. O‘yin yakunida ochko olishni uddaladik. Albatta, buning uchun yigitlarga rahmat.
- Oxirgi yillarda Namanganda "Andijon" ajoyib o‘yin namoyish qilyapti va noqulay raqibga aylanib boryapti. Ayting-chi, bu uchrashuvda nima o‘xshadi va nima o‘xshamadi? Shuningdek, "Navbahor" maydonida eng og‘ir o‘yin qaysi bo‘lgan?
- Savol uchun rahmat. Har bir uchrashuv qiyin o‘tadi. O‘yinda aynan nimalar o‘xshagan yoki o‘xshamagani haqida gapirmoqchi emasman. Rejamiz bo‘yicha biz boshqacharoq o‘yin ko‘rsatmoqchi edik. Ikkala bo‘lim boshida gollar o‘tkazib yuborganimiz yomon. "Navbahor" to‘rttalik uslubiga o‘tganidan keyin bizda muammolar ko‘zga tashlandi. Aytganimdek, bu yerdagi har bir bellashuv og‘ir o‘tadi. Ba’zida o‘ylaganlaring amalga oshadi, ba’zida esa yo‘q. "Navbahor" yaxshi jamoa. Omad biz tomonda bo‘ldi. Bir futbolchi kam bo‘lib qolganimizda ham yigitlar qo‘lini tushirishmadi. O‘z imkoniyatini kutishdi. Uchrashuvdan yaxshi jihatlarni ko‘rsa bo‘ladi.
- Oldingi uchrashuvlarga nisbatan tarkibda rotatsiya bo‘lishiga nima sabab?
- Bilasizmi, ob-havo tufayli ayrim o‘yinchilarimiz betob bo‘lib qolishdi. Kreziu shamollagandi. Oleg Zoteevda isitma bor edi. Tavakkal qilib uni maydonga tushirishni istamadik. Zaxiradan o‘yinga qo‘shilganlar yaxshi kirishib ketishdi, omadli bo‘ldi va eng asosiysi, kerakli golni urdik.
- Hakam futbolchimizga qizil kartochka ko‘rsatdi. O‘sha vaziyatdan oldin ko‘pchilik "Navbahor" o‘yinchisiga qizil ko‘rsatishini kutgandi. Buni kutganmidingiz?
- O‘sha epizod bizdan uzoqda edi. Raqib o‘yinchisi qo‘pollik ishlatgandek ko‘ringandi. Bizning o‘yinchimizga qo‘pol o‘ynagandek, edi. Lekin hakam xalqaro tajribaga ega. Bizning o‘zbek hakamlarimiz orasida bayroqdori. Ayrim vaziyatlar uchun bahslashish mumkindir, biroq umumiy olganda unga ortiqcha e’tirozlar yo‘q.
- "Andijon"ning ikkala golini "Navbahor" futbolchilari kiritishdi. Jamoangiz ko‘p ham vaziyat yarata olgani yo‘q. Bunday o‘yin bilan OCHLga qanchalik tayyor bo‘la olasizlar?
- Ha, menga yoqmadi. Lekin futbol xatolardan iborat. Hech kim xato qilmasa futbolning jozibasi yo‘qoladi. Muxlislar shu bois stadionga keladilar. Bizda ham, "Navbahor"da ham xatolar uchrab turdi. O‘yinda muammolarimiz bor. Hamma o‘z muammolarini to‘g‘rilash harakatida. Tajovuzkor o‘ynashga harakat qilyapmiz, ammo himoyada o‘tkazib yuboryapmiz. OCHLga hali vaqt bor. Kamchiliklarimiz ustida ishlaymiz. OCHL bahslarida boshqa daraja bo‘lamiz.
- Tarkibdan qoniqyapsizmi? OCHL uchun yana kuchaytiriladimi?
- Albatta, yig‘ilgan tarkibdan qoniqish hosil qilyapman. Bu jamoa bilan jiddiy maqsadlarni bajarishga harakat qilamiz. Hozircha biroz vaqt kerak. Ko‘plab yangi futbolchilar bor. Bir-birini tushunishi uchun vaqt talab qilinadi. Ko‘ramiz, vaqt oliy hakam. Himoyada va hujumda, o‘yinni tashkil qilish bo‘yicha ishni davom ettiramiz.
- "Neftchi", "Navbahor" va "Andijon" kabi vodiy klublarining sovrinli o‘rinlar uchun imkoniyatini qanday baholaysiz?
- "Qo‘qon-1912" ham bor. Men bashoratchi emasman. Hozir yaqqol favorit yo‘q. Endigina 3-turni o‘tkazdik, nima deyishim mumkin? Har bir jamoada imkoniyat bor. Chunki har bir klub oxirigacha kurash olib boryapti. Natijaga bir qator omillarning ta’siri bo‘ladi.
- Bu mavsumda "Andijon"ning maqsadi qanday?
- Yuqori maqsad bor. Medallar uchun kurashamiz. Har bir o‘yinda muxlislarimizni xursand qilish uchun o‘ynaymiz.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
